ខេត្តបាត់ដំបង៖ ឯកឧត្តម ងួន រតនៈ អភិបាលខេត្តបាត់ដំបងបានជំរុញដល់អាជ្ញាធរស្រុកសង្កែ អោយជូនដំណឹងដល់ពលរដ្ឋរស់នៅជាប់ផ្លូវជាតិលេខ៥ ស្ថិតក្នុងភូមិសាស្ត្ររបស់ខ្លួនគ្រប់គ្រង ដែលប៉ះពាល់ជាមួយគម្រោងអភិវឌ្ឍន៍ផ្លូវនេះ ហើយទទួលបានសំណងពីការអភិវឌ្ឍន៍ សូមរុះរើសំណង់ឲ្យបានឆាប់រហ័ស ដើម្បីឲ្យការអនុវត្តគម្រោងកែលម្អផ្លូវ អាចសម្រេចបានតាមកាលកំណត់ ។
ក្នុងឱកាសអញ្ជើញចុះពិនិត្យមើលពីវឌ្ឍនភាព នៃការអនុវត្តនូវគំរោងកែលម្អ ផ្លូវជាតិលេខ៥ និងពិនិត្យស្ថានភាពកែលម្អផ្លាស់ប្តូរទីតាំងក្លោងទ្វារសាលានគរបាលជាតិភូមិភាគទី៥ ស្ថិតក្នុងឃុំកំពង់ព្រះ ស្រុកសង្កែ កាលពីចុងសប្ដាហ៍កន្លងទៅ ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ថា អាជ្ញាធរស្រុកត្រូវណែនាំអោយប្រជាពលរដ្ឋដែលទទួលបានសំណងសមរម្យហើយនោះ ត្រូវចូលរួមឲ្យបានគ្រប់គ្នា ពាក់ព័ន្ធការអភិវឌ្ឍន៍គម្រោងជួសជុលកែលម្អផ្លូវល្បឿនលឿននេះ ដើម្បីកុំឲ្យមានការរាំងស្ទះ។
ឯកឧត្តមបានបន្តថា សម្រាប់សាលានគរបាលជាតិភូមិភាគ៥ ក៏ត្រូវពន្លឿន រៀបចំការរុះរើនូវក្លោងទ្វារចាស់ ដើម្បីរំកិលទៅទីតាំងថ្មី ចៀសវាងការយឺតយ៉ាវដល់ការអនុវត្តគម្រោង និងជាគម្រូដល់ប្រជាពលរដ្ឋឲ្យពួកគាត់បានចូលរួមជាមួយអាជ្ញាធរ និងក្រុមការងារជួសជុលផ្លូវបានអនុវត្តតាមផែនការដែលបានគ្រោងទុក ។
យោងតាមការបញ្ជាក់ពីតំណាងក្រុមហ៊ុន និងជាអ្នកបច្ចេកទេសជួសជុលផ្លូវជាតិលេខ៥នៅចំណុចនោះ បានឲ្យដឹងថា ការសាងសង់នេះ រាល់ចំណុចផ្លូវឆ្លងកាត់ទាំងតូចទាំងធំទាំងអស់ត្រូវឆ្វៀលធ្វើផ្លូវឡាគួ ដើម្បីងាយស្រួលដល់ការធ្វើចរាចរណ៍ឆ្លងកាត់ និងបត់បានត្រឹមត្រូវដោយសុវត្ថិភាពទៅតាមទំហំផ្លូវជាក់ស្តែងទាំងអស់ ។
លោកបានបញ្ជាក់ថា ការងារដែលត្រូវធ្វើទីនោះ នឹងចាប់ផ្តើមអនុវត្តឆាប់ៗប៉ុន្មានថ្ងៃខាងមុខនេះ ដោយមិនពន្យាពេលវេលាក្នុងការអនុវត្តគម្រោង ហើយនៅទីនេះ ម្ចាស់គម្រោងក៏បានដោះស្រាយនូវសំណងផលប៉ះពាល់ជូនរួចរាល់ហើយដែរ ៕
