ខេត្តបាត់ដំបង៖ លោកវរ:សេនីយ៍ទោ ហេង ពិសិដ្ឋ អនុប្រធានការិយាល័យនគរបាលចរាចរណ៍ជើងគោកនៃស្នងការដ្ឋាននគបាលខេត្តបាត់ដំបងបានធ្វើការបកស្រាយក្រោយពីបានលេចឮព័ត៌មានថាមានការដាក់កុងត្រូលកាក់យកលុយពីពលរដ្ឋដឹកទំនិញតាមរថយន្តដោយឲ្យបង់លុយចាប់ពី១ម៉ឺនរៀលឡើងទៅដោយមិនបានចេញវិក័យប័ត្រ។
លោកវរ:សេនីយ៍ទោបានឲ្យអ្នកសារព័ត៌មានដឹងនៅថ្ងៃទី០៩ ខែឧសភា ឆ្នាំ២០២១នៅគោលដៅចំណុចជិតស្ពានកំរៀង ស្ថិតក្នុងស្រុកកំរៀង ខេត្តបាត់ដំបងថា ការដាក់ប៉ុស្តិ៍ត្រួតពិនិត្យនេះគឺដើម្បីការពារពលករឆ្លងដែនមកពីប្រទេសថៃនិងត្រួតពិនិត្យអ្នកធ្វើដំណើរដោយវាស់កំដៅបាញ់អាល់កុលហើយបើឃើញកំដៅរបស់គាត់ឡើងលើសពី ៣៧អង្សា ឡើងទៅត្រូវយកគាត់ដាក់នៅឆ្ងាយពីគេឲ្យគាត់អង្គុយពិសារទឹកលាងមុខលាងមាត់រួចវាស់កំដៅជាថ្មីបើកំដៅគាត់ចុះអនុញាតឲ្យគាត់អញ្ជើញធ្វើដំណើរ តែបើកំដៅនៅតែក្តៅយើងត្រូវរាយការជូនមន្ត្រីសុខាភិបាលដើម្បីយកគាត់ទៅពិនិត្យកំហាករកជម្ងឺកូវិដ១៩។
លោកអនុប្រធានការិយាល័យចរាចរណ៍ផ្លូវគោកបានបដិសេធចំពោះការចោទប្រកាន់របស់ប្រជាពលរដ្ឋដែលថាដាក់ប៉ុស្តិ៍ជំរិតទារលុយពីអ្នកដឹកទំនិញគ្រប់ប្រភេទគឺជាការមិនពិតទេហើយរឿងកាក់រថយន្តដឹកគោឆ្លងកាត់កាលពីប៉ុន្មានថ្ងៃមុននេះដោយមានការប្រកែកគ្នានោះគឺមកពីមានពលរដ្ឋបានមកប្តឹងករណីបាត់គោទើបខាងសមត្ថកិច្ចយើងធ្វើការឃាត់សួរនាំដោយហៅឲ្យម្ចាស់គោមកបង្ហាញមុខទើបឲ្យទៅ។
ទោះជាយ៉ាងណាក្តីពលរដ្ឋសង្ឃឹមថាការដាក់ប៉ុស្តិ៍ត្រួតពិនិត្យខាងលើនេះធ្វើទៅដោយគោរពតាមគោលការដោយមិនពុករលួយដូចពាក្យចាស់ថា(ត្រីងៀតឆ្លៀតពង)ពលរដ្ឋកំពុងតែខ្វះខាតនិងប្រឈមនិងជម្ងឺកូវិដ១៩ រកស៊ីដឹកទំនិញបន្តិចបន្តួចតែបែរជាត្រូវបង់ឲ្យសមត្ថកិច្ចគ្រប់កន្លែង៕