(ប៉ៃលិន) ៖ កសិករមួយគ្រួសារ បាននាំគ្នាប្រមូលផល បេះផ្លែត្រសក់ទ្រើងលក់ អស់រយ:ពេល១០ថ្ងៃមកហើយ ក្រោយពីបានត្រសក់នេះ រយ:ពេលជាង១ខែ លុះដុះលូតលាស់ផ្កាផ្លែ ក៏បេះយកទៅឱ្យម៉ូយនៅផ្សារសាមគ្គីហៅប៉ាហ៊ី បានប្រាក់សម្រាប់ផ្គត់ផ្គង់ជីវភាពប្រចាំថ្ងៃ ទោះបីជាបញ្ហាជំងឺកូវីដ-១៩ កំពុងតែកើតមានផ្ទុះឡើងនៅក្នុងបណ្តាខេត្តនានាមួយចំនួន ដូចជា ៖ ខេត្តបន្ទាយមានជ័យ កំពង់ចាម កំពង់ធំ ព្រៃវែង ស្វាយរៀង និងរាជធានីភ្នំពេញ ជាដើម តែមិនមានការប៉ះពាល់ដល់ជីវភាពពួកគាត់ប្រចាំថ្ងៃនោះទេ ។
បើតាមការរៀបរាប់ពីបុរសម្នាក់ ឈ្មោះ ហ៊ិន នូ អាយុ៥៦ឆ្នាំ មានប្រពន្ធ ឈ្មោះ ភាព រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន បានរៀបរាប់ឱ្យភ្នាក់ងារយើងដឹងកាលពីរសៀលថ្ងៃទី២៦ ខែមេសា ឆ្នាំ២០២១ ថា ៖ រហូតមកដល់ពេលនេះ គ្រួសាររបស់គាត់ ចាប់ផ្តើមប្រមូលផលបន្លែត្រសក់ទ្រើង ក្រោយពីដាំបានរយ:ពេលជាង១ខែ នៅលើផ្ទៃដី ដែលបានជួលគេ នៅក្បែរផ្ទះរបស់ខ្លួន ។
ប្រភពបន្តទៀតថា គាត់បានដាំបន្លែត្រសក់ទ្រើងនេះចំនួន២៨រង ហើយក៏មានដាំសណ្តែកកួរជាច្រើនរង បន្តបន្ទាប់ទៀត ក្រោយពីប្រមូលផលបន្លែត្រសក់អស់ គាត់ក៏នឹងចាប់ផ្តើមប្រមូលផលសណ្តែកកួរ ជាបន្តបន្ទាប់ដែរ ។
គាត់ពិតជាសប្បាយរីករាយ ដោយសង្កេតឃើញបន្លែត្រសក់របស់ខ្លួនក្នុងចំការ ដុះលូតលាស់ល្អ និងមានផ្កាផ្លែច្រើន អាចបេះផ្លែក្នុង១ថ្ងៃចាប់ពី១៨០ ទៅ២០០គីឡូក្រាម ហើយឈ្មួញទិញក្នុង១គីឡូក្រាមតម្លៃ១០០០ទៅ១៥០០រៀល ដែលពេលនេះ ក្នុង១ថ្ងៃ គាត់អាចរកប្រាក់ចំណូលបានចាប់ពី១០ទៅ១៥ម៉ឺនរៀល អាចយកមកដោះស្រាយសងជំពាក់បំណុលគេ មិនព្រួយបារម្ភនោះឡើយ ។
គាត់បញ្ជាក់ថា ការដាំបន្លែត្រសក់នេះ មិនប្រើជីគីមី ឬបាញ់ថ្នាំកំចាត់សត្វល្អិតនោះឡើយ គឺគ្រាន់តែប្រើជីធម្មជាតិ និង បូមទឹកស្រោចតែប៉ុណ្ណោះ លើកលែងតែពេលមានភ្លៀងធ្លាក់សើមដី ។ តែពេលខ្លះ ក៏ជួបនឹងបញ្ហាភ្លៀងខ្លាំងពេក បបណ្តាលឱ្យរលួយផ្កា និងដើមត្រសក់ ទទួលរងនូវការខូចខាតអស់ច្រើនដែរ ។
ជួនកាលទៀត មានសត្វល្អិត លំបាកក្នុងថែទាំដែរ ។ ម្យ៉ាងវិញទៀត ពួកគាត់ក៏មានសំណូមពរទៅខាងមន្ទីរកសិកម្មខេត្តប៉ៃលិន ឱ្យចុះទៅបង្រៀនណែនាំ ពីវិធីថែទាំ និងវិធីកំចាត់សត្វល្អិត ក៏ដូចជាធ្វើយ៉ាងណា ឱ្យទទួលបាននូវទិន្នផលខ្ពស់ ។
ចំណែកប្រជាពលរដ្ឋរស់នៅក្នុងភូមិខាងលើ ក៏មានការបន្លែផ្សេងៗគ្នាដែរ ដោយអ្នកខ្លះដាំ ស្ពៃ ខាត់ណា ជី ដើមខ្ទឹម ម្ទេស ត្រឡាច ល្ពៅ និងបន្លែផ្សេងៗជាច្រើនទៀត ដើម្បីបេះលក់យកថវិកាសម្រាប់ផ្គត់ផ្គង់ជីវភាព ទោះបីជាបញ្ហាកូវីដ១៩កំពុងវាយលុកប្រទេសកម្ពុជា ៕