ខេត្តបាត់ដំបង៖ អាជ្ញាធរខេត្តបាត់ដំបង បានបង្ហាញនូវការព្រួយបារម្ភ ពីបញ្ហាមានប្រជាពលរដ្ឋមួយចំនួនបានលួចឆ្លងព្រំប្រទល់ខេត្តតាមផ្លូវតូចៗក្នុងភូមិមិនគោរពតាមបទបញ្ជា និងចូលរួមអនុវត្តបម្រាមគោចររបស់រាជរដ្ឋាភិបាល បានគេចវេសការត្រួតពិនិត្យរបស់សមត្ថកិច្ច តាមផ្លូវជាតិ និងផ្លូវធំៗ ។
នាឱកាសនាំយកសម្ភារ និងសំណេះសំណាលកងកម្លាំងការពារព្រំដែនជាប់ប្រទេសថៃ និងសមត្ថកិច្ចប្រចាំតាមព្រំប្រទល់ខេត្ត នៅរសៀលថ្ងៃទី១២ ខែមេសា ឆ្នាំ២០២១ ឯកឧត្តម ងួន រតនៈ អភិបាលនៃគណអភិបាលខេត្តបាត់ដំបង មានប្រសាសន៍ថា នារយៈពេលប៉ុន្មានថ្ងៃនេះ មានករណីពលរដ្ឋរស់នៅក្នុងក្រុងបាត់ដំបងមកពីរាជធានីភ្នំពេញតាមម៉ូតូ ប៉ុន្តែមិនធ្វើដំណើរតាមផ្លូវជាតិនោះទេ គឺធ្វើតាមផ្លូវតូចៗឬតាមវាលស្រែ ជាទីតាំងដែលគ្មានសមត្ថកិច្ចឈរជើងប្រចាំការត្រួតពិនិត្យ ។
ឯកឧត្តមបានបន្តថា បញ្ហានេះធ្វើឲ្យមានការព្រួយបារម្ភខ្លាចមានការឆ្លងរីករាលដាលនៃជំងឺកូវីដ-១៩ ព្រោះខ្លាចពួកគាត់មកពីតំបន់នៃការផ្ទុះជំងឺនេះ ហើយមិនបានធ្វើចត្តាឡីស័កត្រឹមត្រូវ ដូចនេះសូមជំរុញដល់អាជ្ញាធរមូលដ្ឋាន ក៏ដូចជាសមត្ថកិច្ចពិនិត្យឲ្យបានច្បាស់លាស់ ហើយនិងរាយការណ៍ឲ្យបានឆាប់រហ័ស បើសិនមានករណីបែបនេះកើតឡើងទៀត ។
នឹងមួយវិញទៀត បញ្ហាការឆ្លងដែនរបស់ពលរដ្ឋមកពីប្រទេសថៃ សមត្ថកិច្ចការពារព្រំដែនត្រូវបង្កើនការយកចិត្តទុកដាក់ ឲ្យបានខ្លាំងក្លាបន្ថែមទៀត ព្រោះនារយៈពេលចុងក្រោយនេះ នៅប្រទេសថៃកំពុងមានការឆ្លងរាលដាលច្រើននៃជំងឺកូវីដ-១៩ក្នុងសហគមន៍ ខណៈនៅកម្ពុជាក៏មានការឆ្លងច្រើនករណីដែរនោះ ។
ឯកឧត្តម ងួន រតនៈ បានសង្កត់ធ្ងន់ថា ទោះបីការឆ្លងដែនរបស់ពលករមកពីថៃ តាមច្រកជាប់ខេត្តបាត់ដំបង មានការថយចុះ ហើយពុំទាន់រកឃើញករណីថ្មីនៃពលករ ឬពលរដ្ឋរស់នៅក្នុងខេត្តឆ្លងជំងឺកូវីដ-១៩ ប៉ុន្តែក៏ត្រូវមានការប្រុងប្រយ័ត្ន ត្រួតពិនិត្យឲ្យបានច្បាស់លាស់ពីដំណើរឆ្លងដែនរបស់ពួកគេ ពិសេសនៅក្នុងរដូវបុណ្យចូលឆ្នាំប្រពៃណីជាតិនេះ មិនត្រូវឲ្យមានអ្នកណាម្នាក់គេចវេសពីការធ្វើចត្តាឡីស័កជាដាច់ខាត ។
យោងតាមរបាយការណ៍របស់រដ្ឋបាលខេត្តបាត់ដំបង គិតត្រឹមថ្ងៃទី១២ ខែមេសា ឆ្នាំ២០២១ បានបង្ហាញថា អាជ្ញាធរខេត្តបានរកឃើញអ្នកពាក់ព័ន្ធព្រឹត្តិការណ៍សហគមន៍២០កុម្ភៈ និងអ្នកមកពីរាជធានី និងបណ្ដាខេត្តប្រឈមរស់នៅក្នុងខេត្តបាត់ដំបងមានប្រមាណជិត ៧០០នាក់ ដោយពួកគេត្រូវបានយកសំណាកទាំងអស់ និងបានរកឃើញវិជ្ជមានកូវីដ-១៩ម្នាក់ ត្រូវបានក្រុមគ្រូពេទ្យព្យាបាលជាសះស្បើយហើយ ៕