ការិយាល័យអប់រំ យុវជន និងកីឡាស្រុកពួក ខេត្តសៀមរាប ប្រកាសឲ្យបើកដំណើរការការសិក្សា ជាធម្មតាវិញឡើងវិញ ចំពោះសាលាទាំង១៩ ដែលបានផ្អាកមួយរយ:ពេលខ្លី កាលពីពេលថ្មីៗកន្លងមក។
តាមសេចក្ដីជូនដំណឹងការិយាល័យអប់រំ យុវជន និងកីឡាស្រុកពួក ចុះថ្ងៃទី១១ ខែមីនា ឆ្នាំ២០២១នេះ បានបញ្ជាក់ថា ក្រោយការស្រាវជ្រាវ និងពិនិត្យសំណាកលើកទី១ ចំពោះអ្នកពាក់ព័ន្ធផ្ទាល់ និងប្រយោលជាមួយស្ត្រីដែលមានផ្ទុកជំងឺកូវីដ-១៩ ឃើញថាលទ្ធផល គឺអវិជ្ជមានកូវីដ-១៩ ទាំងអស់នោះ ហេតុនេះ ដើម្បីជៀសវាងផលប៉ះពាល់ដល់ការសិក្សារបស់ សិស្សានុសិស្ស និងមានការយល់ព្រមពីថ្នាក់ដឹកនាំស្រុក ខេត្តផង ការិយាល័យអប់រំយុវជន និងកីឡាស្រុក ពួក សម្រេចបើកដំណើរការការសិក្សារបស់សាលាទាំង១៩ ជាធម្មតាវិញ ដោយអនុវត្តតាមវិធានការ ៣ការពារ និង ៣កុំ ឱ្យបានខ្ជាប់ខ្លួន ។
លោក លី ប៊ុនណា ប្រធានមន្ទីរអប់រំយុវជន និងកីឡាខេត្ដសៀមរាប បានមានប្រសាសន៍ថា តាមសំណើរបស់ការិយាល័យអប់រំ យុវជន និងកីឡាស្រុកពួក និងតាមការស្រាវជ្រាវ និងពិនិត្យសំណាកលើកទី១ ចំពោះអ្នកពាក់ព័ន្ធផ្ទាល់ និងប្រយោល ជាមួយស្ត្រីដែលផ្ទុកជំងឺកូវីដ-១៩ ហើយលទ្ធផល គឺអវិជ្ជមាន កូវីដ -១៩ ទាំងអស់នេះ មន្ទីរយល់ព្រមតាមសំណើរបស់ការិយាល័យអប់រំស្រុកពួក ដើម្បីជៀសវាងផលប៉ះពាល់ដល់ការសិក្សារបស់សិស្សានុសិស្ស ប៉ុន្ដែត្រូវអនុវត្តតាមវិធានការ ៣ការពារ ៣កុំ ឱ្យបានខ្ជាប់ខ្លួន។
សូមជម្រាបថា កាលពីថ្ងៃទី០៩ ខែមីនាឆ្នាំ២០២១នេះ សាលារៀនចំនួន ១៩កន្លែង នៅក្នុងឃុំចំនួន៤ ក្នុងនោះមាន ៖ ឃុំខ្នាត ចំនួន ៦សាលា, ឃុំពួក ចំនួន ៥សាលា, ឃុំសំរោងយាចំនួន ៣សាលា និងឃុំកែវព៌ណ ចំនួន ៥សាលា បានសម្រេចបិទមិនឲ្យសិស្សចូលរៀនជាបណ្ដោះអាសន្ន ក្រោយពេលស្ដ្រីម្នាក់ឆ្លងជំងឺកូវីដ-១៩ មកពីខេត្ដព្រះសីហនុ ចូលក្នុងសហគមន៍នៅស្រុកពួកនោះ ៕
