(ប៉ៃលិន) ៖ សេចក្តីណែនាំរបស់រដ្ឋបាលខេត្តប៉ៃលិន លេខ ០០៧/២១ សណន ចុះថ្ងៃទី១១ ខែមីនា ឆ្នាំ២០២១ ស្តីពីការទប់ស្កាត់ការរីករាលដាលនៃជំងឺកូវីដ-១៩ តាមការណែនាំរបស់រាជ រដ្ឋាភិបាល និងក្រសួងសុខាភិបាល ។ ដូច្នេះ យើងរាល់គ្នា ត្រូវតែអនុវត្តឱ្យបានខ្ជាប់ខ្ជួន ដើម្បីរក្សា ការពារខ្លួនពីមេរោគកូវីដ-១៩ ដ៏កាចសាហាវ ខណ:កំពុងតែមានការផ្ទុះឡើងក្នុងប្រទេសកម្ពុជា ។
ប្រភពព័ត៌មាននៅក្នុងលិខិតណែនាំ បានឱ្យដឹងថា ៖ ក្នុងការចូលរួមអនុវត្តតាមគោលការណ៍ ណែនាំរបស់រាជរដ្ឋាភិបាល និងក្រសួងសុខាភិបាល ដើម្បីទប់ស្កាត់ការរីករាលដានមេរោគកូវីដ-១៩ ក្នុងសហគមន៍ នោះរដ្ឋបាលខេត្ត សូមធ្វើការណែនាំដល់មន្ទីរ អង្គភាព កងកម្លាំងប្រដាប់អាវុធ រដ្ឋបាល ក្រុង ស្រុក និងសាធារណជនទាំងអស់ នៅក្នុងមូលដ្ឋានខេត្តប៉ៃលិន ដូចខាងក្រោម ៖
១. ត្រូវផ្អាករាល់ក្លឹបកម្សាន្ត (ខារ៉ាអូខេ រង្គសាល ឌីស្កូតែក និងបៀរហ្កាឌិន) ក្លឹបហាត់ប្រាណ ការរៀបអាពាហ៍ពិពាហ៍ បុណ្យទាន ការជួបជុំ ឬការប្រមូលផ្តុំគ្នាកុះករ នៅគ្រប់ទីកន្លែង ក្នុងករណីមិនចាំបាច់ ជាបណ្តោះអាសន្ន ។
២. ត្រូវផ្អាករាល់កិច្ចប្រជុំ សិក្ខាសាលា និង វគ្គបណ្តុះបណ្តាលផ្សេងៗ ។
៣. គ្រប់ច្រក ចេញ-ចូល នៅមន្ទីរ អង្គភាព និងកងកម្លាំងប្រដាប់អាវុធទាំងបី ត្រូវចាត់ឱ្យ មាន មន្ត្រីធ្វើការវាស់កម្តៅ បាញ់អាល់កុល និងត្រូវធ្វើការតាមដានពីសុខភាពរបស់មន្ត្រី ដែលមកបំពេញការងារ ឱ្យបានហ្មត់ចត់ ព្រមទាំងចូលរួមអនុវត្តការស្គេន QR Code «ទប់ស្កាត់កូវីដ-១៩» នៅតាមច្រកចេញចូល សម្រាប់ថ្នាក់ដឹកនាំ និងមន្ត្រីរាជការ ។
៤. ត្រូវអនុវត្តឱ្យបានម៉ឺងម៉ាត់ តាមការណែនាំរបស់ក្រសួងសុខាភិបាល និង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា (៣ការពារ ៣កុំ) ។
សេចក្តីប្រកាសព័ត៌មានរបស់រដ្ឋបាលខេត្តក៍បាន ណែនាំដល់ អាជ្ញាធរមានសមត្ថកិច្ច ត្រូវការគ្រប់គ្រង និងរឹតបន្តឹងបងប្អូនប្រជាពលរដ្ឋ ប្រសិនបើមានករណីសង្ស័យពាក់ព័ន្ធជាមួយជំងឺកូវីដ-១៩ សូមធ្វើការទំនាក់ទំនង ជាមួយអាជ្ញាធរមូលដ្ឋានរបស់ខ្លួន ឬមណ្ឌលសុខភាព ដែលនៅក្បែរលំនៅឋានរបស់ខ្លួនផងដែរ ។
លិខិតបញ្ជាក់ទៀតថា ទទួលបានសេចក្តីណែនាំនេះ សូមអាជ្ញាធរ ដែលពាក់ព័ន្ធគ្រប់លំដាប់ថ្នាក់ មន្ទីរ អង្គភាព កងកម្លាំងប្រដាប់អាវុធ រដ្ឋបាល ក្រុង ស្រុក និង សាធារណជនទាំងអស់ នៅក្នុងមូលដ្ឋានខេត្តប៉ៃលិន ត្រូវធ្វើការផ្សព្វផ្សាយឱ្យបានទូលំទូលាយ និង អនុវត្តឱ្យមានប្រសិទ្ធភាពខ្ពស់ ៕
