ខេត្តបាត់ដំបង៖ ខណៈកំណើនពលករត្រឡប់មកពីប្រទេសថៃ មានលំនៅដ្ឋាននៅក្នុងខេត្តបាត់ដំបងកាន់តែច្រើន ពិសេសពលករទើបដឹកមកពីបណ្ដាខេត្តផ្សេងៗជាប់ព្រំដែន ក្នុងរយៈពេលប៉ុន្មានថ្ងៃចុងក្រោយនេះ អាជ្ញាធរខេត្តបានសម្រេចយកសាលារៀនសរុបចំនួន ២២កន្លែង ដើម្បីធ្វើជាមណ្ឌលចត្តាឡីស័កសម្រាប់ពលករទាំងអស់នោះ ។
លោក យី សុងគី ប្រធានមន្ទីរអប់រំយុវជននិងកីឡា បានឲ្យដឹងថា អគារសិក្សារត្រូវយកជាកន្លែងសម្រាករបស់ពលករធ្វើចត្តាឡីស័ក មានចំនួនសរុប ៤២អគារ និង ៣១៦បន្ទប់ ដែលស្មើនឹងសិស្សានុសិស្សចំនួន ១១ ៧៤៤នាក់ ស្រី ៥៨៦៧នាក់ និងលោកគ្រូអ្នកគ្រូចំនួន ៤២២នាក់ ស្រី២០៨នាក់ ហើយសម្រាប់ការយកសាលាធ្វើជាមណ្ឌលចត្តាឡីស័កនេះ តាមក្រុង-ស្រុកយកមួយសាលា ប៉ុន្តែមានស្រុកខ្លះក៏យកដល់២សាលា ។
លោកបានបន្តថា ពាក់ព័ន្ធនឹងការយកសាលារៀនធ្វើជាមណ្ឌលចត្តាឡីស័ក រដ្ឋបាលខេត្ត និងមន្ទីរអប់រំខេត្ត រួមជាមួយអាជ្ញាធរតាមបណ្ដាក្រុងស្រុក បានស្វែងរកទីតាំងបណ្ដោះអាសន្ននៅក្បែរនោះ មានសាលារៀនក្បែរគ្នា អគាររដ្ឋបាលរបស់រដ្ឋ អគារឯកជន ផ្ទះសម្បែងរបស់ពលរដ្ឋ ផ្ទះគ្រូជាដើម ដើម្បីពិនិត្យលទ្ធភាពឲ្យពួកគេបានរៀនជាបណ្ដោះអាសន្ន ។
លោក យី សុងគី បានបញ្ជាក់ថា ដោយសារមានការបន្ទាន់ពេក មានសាលាមួយចំនួនតូចត្រូវផ្អាកមួយរយៈសិន ដើម្បីមន្ទីរ និងអាជ្ញាធរខេត្តរកកន្លែងសម្រាប់ឲ្យសិស្សបានរៀនសូត្រ ប៉ុន្តែបើការយកសាលាធ្វើជាមណ្ឌលចត្តាឡីស័កនៅតែអូសបន្លាយយូរ គឺតម្រូវឲ្យពួកគេរៀនកន្លែងផ្សេងបណ្ដោះអាសន្នបន្តទៀត ឬរៀនតាមបែប បណ្ដុំ និងរៀនតាមអនឡាញ ដែលក្រសួងអប់រំ យុវជននិងកីឡាបានអនុញ្ញាត ។
ក្នុងឱកាសអញ្ជើញចុះពិនិត្យមណ្ឌលចត្តាឡីស័កតាមស្រុកមួយចំនួន នៅថ្ងៃទី១០ ខែមិនា ឆ្នាំ២០២១ ឯកឧត្តម ងួន រតនៈ អភិបាលខេត្តបាត់ដំបង បានជំរុញដល់អាជ្ញាធរ សហការជាមួយកងកម្លាំងធ្វើយ៉ាងណារឹតបន្ដឹងចំពោះការធ្វើចត្តាឡីស័ករបស់ពលករទាំងអស់នោះ ដោយអប់រំពួកគេឲ្យយល់ដឹង និងការចូលរួមទប់ស្កាត់ការឆ្លងរាលដាលនៃជំងឺកូវីដ១៩ និងការផាកពិន័យ ។
ចំពោះកន្លែងចត្តាឡីស័កនេះ ឯកឧត្តមអភិបាលខេត្ត បានប្រាប់ឲ្យអាជ្ញាធរក្រុងស្រុក ត្រូវរៀបចំនូវបង្គន់អនាម័យ ភ្លើងអគ្គិសនីឲ្យបានល្អ សម្រាប់ពលករកំពុងធ្វើចត្តាឡីស័កប្រើប្រាស់ និងរៀបចំរបបអាហារឲ្យបានគ្រប់គ្នា ដោយក្នុងដំណាក់កាលកម្ពុជាកំពុងជួបបញ្ហាការឆ្លងរាលដាលនៃជំងឺកូវីដ១៩ក្នុងសហគមន៍នេះ សមត្ថកិច្ចការពារព្រំដែនត្រូវបង្កើនការយកចិត្តទុកដាក់ពីការលួចឆ្លងដែនខុសច្បាប់របស់ពលករដែលជឿតាមការញុះញង់របស់ពួកមេខ្យល់ហើយគេចវេសការធ្វើចត្តាឡីស័ក ។
នៅក្នុងរបាយការណ៍របស់រដ្ឋបាលខេត្តបាត់ដំបង បានបង្ហាញថា ចាប់ពីថ្ងៃទី៧ ខែមិនា អាជ្ញាធរខេត្តបាត់ដំបង បានបញ្ជូនពលករកំពុងធ្វើចត្តាឡីស័កក្នុងមណ្ឌល ស្រុកកំរៀង ភ្នំព្រឹក និងស្រុកសំពៅលូន ទៅតាមមូលដ្ឋាននានាក្នុងរាជធានីខេត្តជាង៩០០នាក់ និងពលករមានលំនៅដ្ឋានក្នុងខេត្តបាត់ដំបងត្រូវបានដឹកពីខេត្តបន្ទាយមានជ័យ ប៉ៃលិន និងឧត្តរមានជ័យ ជាង ១៣២១នាក់ ៕
