ខេត្តបាត់ដំបង! ក្រោយពីជួបគ្រោះជំនន់ទឹកភ្លៀងជន់លិចស្ទើរទូទាំង២៥ខេត្តក្រុង និងរាជធានីកាលពីអំឡុងចុងឆ្នាំ២០២០កន្លងទៅបានធ្វើអោយហេដ្ឋារចនាសម្ព័នជាច្រើនមានទាំង ផ្លូវ ស្ពាន ប្រឡាយ និងលូ បានរងការខូចខាតអស់ជាច្រើនខ្សែ ហើយក្នុងនោះអាជ្ញាធរនៅតាមបណ្តាខេត្តមួយចំនួនក៏បានឆ្លើយតបភ្លាមៗដោយបានធ្វើការជួសជុលនិងស្ថាបនាជាបន្តបន្ទាប់។
ដោយឡែកសម្រាប់ខេត្តបាត់ដំបងក្រោមការដឹកនាំរបស់ឯកឧត្តម ងួន រតនៈ អភិបាលនៃគណ:អភិបាលខេត្តបាត់ដំបង លោកបានខិតខំប្រឹងប្រែងយកចិត្តទុកដាក់ខ្ពស់បំផុតទៅលើសុខទុក្ខរបស់បងប្អូនប្រជាពលរដ្ឋដោយបានចុះដោះស្រាយភ្លាមៗរាល់ការលំបាកផ្សេងៗជាពិសេសបញ្ហាផ្លូវថ្នល់នេះតែម្តង ដែលកន្លងមកលោកបានដាក់ផែនការគ្រប់ឃុំស្រុកធ្វើការចុះពិនិត្យនិងជួសជុលកែលម្អរឡើងវិញជាបន្តបន្ទាប់មានទាំងផ្លូវក្រាលកៅស៊ូ ផ្លូវបេតុង និងផ្លូវដីគ្រួសក្រហមផងដែរ។
ជាក់ស្ដែងនៅរសៀលថ្ងៃទី១០ ខែមិនា ឆ្នាំ២០២១នេះ ក្រោមការចង្អុលបង្ហាញពីឯកឧត្តមអភិបាលខេត្ត មន្ទីរសាធារណការនិងដឹកជញ្ជូនខេត្តបាត់ដំបង ដែលមានឯកឧត្តម ព្រួយ រិទ្ធថា ជាប្រធាន លោកបានដឹកនាំក្រុមការងារចុះស្ថាបនាកែលម្អរផ្លូវកៅស៊ូមួយខ្សែប្រវែង ៦៥០ម៉ែត្រនិងទទឹង ១០ម៉ែត្រដែលរងការខូចខាតដោយជំនន់ទឹកភ្លៀងកន្លងមកនៅបណ្តោយផ្លូវលេខ១៣៥ ចាប់ពីចំណុចផ្លូវបំបែកផ្លូវលេខ៣ តភ្ជាប់ទៅផ្លូវបំបែកផ្លូវលេខ៤ ស្ថិតក្នុងភូមិសាស្ត្រកណ្តាលក្រុងបាត់ដំបង ដែលប្រើប្រាស់កញ្ចប់ថវិការបស់ខេត្ត។
ក្នុងឱកាសចុះត្រួតពិនិត្យការស្ថាបនាផ្លូវនាថ្ងៃនេះដែរ ឯកឧត្តម ព្រួញ រិទ្ធថា ប្រធានមន្ទីរសាធារណការនិងដឹកជញ្ជូន លោកបានបញ្ជាក់ថា ទន្ទឹមនិងការស្ថាបនាផ្លូវកៅស៊ូមួយខ្សែនេះដែរ ខាងមន្ទីរក៏បានរៀបចំប្រព័ន្ធលូថ្មីក្រៅគម្រោងនៅអមផ្លូវផងដែរជូនដល់ប្រជាពលរដ្ឋដើម្បីសម្រួលកាត់បន្ថយការជន់លិចដោយសារជំនន់ទឹកភ្លៀង ហើយជាមួយគ្នានេះឯកឧត្តមប្រធានក៏បានសំណូមពរទៅដល់បងប្អូនប្រជាពលរដ្ឋដែលរស់នៅអមសងខាងផ្លូវទាំងអស់ សូមមានការអធ្យាស្រ័យនិងចូលរួមជាមួយក្រុមការងារ ព្រោះកាលណាយើងអភិវឌ្ឍន៍ទីកន្លែងណាមួយគឺតែងតែមានការប៉ះពាល់បន្តិចបន្តួចជៀសមិនផុតនោះទេ ហើយក្នុងនោះយើងឃើញថាប្រជាពលរដ្ឋទាំងអស់នោះមិនមានការខឹងសម្បាអ្វីនោះទេ ថែមទាំងមានការត្រេកអរព្រមទាំងបានសហការដោយបានធ្វើការរុះរើរបងនិងសាបខាងមុខផ្ទះដោយខ្លួនឯងផងដែរ។
