(ខេត្តបាត់ដំបង)៖ ក្នុងឱកាសចុះត្រួតពិនិត្យនៅតាមមណ្ឌលកម្សាន្តមនុស្សពេញវ័យ និងតាមបណ្តាភោជនីយដ្ឋាន អាហារដ្ឋាននានា នៅក្នុងក្រុងបាត់ដំបង របស់ក្រុមការងារនៃមន្ទីរទេសចរណ៍ដោយមានការសហការជាមួយមន្ត្រីមន្ទីរសុខាភិបាល រួមនិងអាជ្ញាធរក្រុងបាត់ដំបងនាយប់ថ្ងៃទី០៩ ខែមិនា ឆ្នាំ២០២១នេះ មន្ទីរទេសចរណ៍ខេត្តបាត់ដំបងបាន ព្រមានបិទអាជីវកម្ម ភោជនីយដ្ឋាន អាហារដ្ឋានណាដែលមិនចូលរួមអនុវត្តវិធានសុវត្ថិភាពទេសចរដើម្បីការពារការរីករាលដាលនៃជំងឺកូវីដ-19។
លោក ហម អនុ -ប្រធានការិយាល័យគ្រប់គ្រងឧស្សាហកម្មទេសចរណ៍នៃមន្ទីរទេសចរណ៍ខេត្តបាត់ដំបងបានបញ្ជាក់ប្រាប់ឲ្យដឹងថា គោលបំណងដែលក្រុមការងារចុះអនុវត្តនាយប់នេះគឺដើម្បីធ្វើការផ្សព្វផ្សាយណែនាំទៅដល់អាជីវករនៅក្នុងវិស័យទេសចរណ៍ទាំងអស់ឱ្យចូលរួមអនុវត្តនៅក្នុងវិធានសុវត្ថិភាពទេសចរណ៍អោយបានត្រឹមត្រូវដើម្បីទប់ស្កាត់កុំឱ្យមានការរីករាលដាលនៃជំងឺកូវីដ19។
ហើយអ្វីដែលយើងត្រូវអនុវត្តនាពេលនេះក្នុងនោះមាន! /ទី១-ត្រូវវាស់កំដៅគ្រប់ភ្ញៀវដែលចូល ,/ទី២-គឺធ្វើការស្កែន (q r code)គ្រប់ភ្ញៀវមុននិងចូលមកទីតាំងនឹងដើម្បីបញ្ជាក់ពីពេលវេលា អត្តសញ្ញាណ នៅពេលណាដែលគាត់មាន បញ្ហាអ្វីកើតឡើងយើងងាយស្រួលនិងដឹងថាគាត់មកកន្លែងហ្នឹង និងបានជួបអ្នកណាខ្លះ /ទី៣-គឺត្រូវពាក់ម៉ាស់ក៏ដូចជារបាំងបិទមុខដល់បុគ្គលិកដើម្បីការពារខ្លាចភ្ញៀវឬចម្លងអ្វីផ្សេងៗ /ទី៤-គឺការបាញ់អាល់កុលគ្រប់ភ្ញៀវដែលចូលមកក្នុងអាជីវកម្ម គឺត្រូវសម្អាតដៃដោយសាប៊ូ ឬអាល់កុល ហើយអ្វីដែលសំខាន់គឺរក្សាគម្លាតសុវត្ថិភាពពីតុមួយទៅតុមួយ។
លោកបានបញ្ជាក់បន្ថែមថា ទាក់ទងក្នុងការចុះត្រួតពិនិត្យទៅលើអាជីវកម្មចំនួនជាង១០កន្លែងនាពេលនេះ ខាងមន្ត្រីជំនាញពិនិត្យឃើញថា រហូតមកដល់ពេលនេះឃើញថា អាជីវកម្មមួយចំនួនបានចូលរួមបានល្អ ហើយមួយចំនួនទៀតក៏នៅមានចំណុចខ្វះខាតហើយក្រុមការងារក៏បានធ្វើការណែនាំពួកគាត់បន្ថែម ដោយពួកគាត់សន្យាថានឹងចូលរួមអនុវត្តតាមការណែនាំរបស់ក្រុមការងារបន្ថែម។
លោកបន្តថា ចាប់ពីថ្ងៃស្អែកទៅក្រុមការងារនិងចុះជាប្រចាំធ្វើការត្រួតពិនិត្យតាមដានមើលការអនុវត្តប្រធានសុវត្ថិភាពនៅតាមអាជីវកម្មរបស់គាត់ទៀត ហើយក្នុងករណីបើមានអាជីវកម្មណាមួយមិនបានអនុវត្តតាមការណែនាំ ខាងក្រុមការងារនិងមានសិទ្ធិក្នុងការបិទផ្អាកអាជីវកម្មគាត់ជាបណ្តោះអាសន្ន ព្រោះកន្លងមកក្រុមការងារក៏ធ្លាប់បានធ្វើការបិទផ្អាកអាជីវកម្មមួយចំនួនមកហើយដែរដែលពួកគាត់មិនបានចូលរួមអនុវត្ត និងមិនមានអាជ្ញាប័ណ្ណហើយបើកដោយមិនមានការត្រួតពិនិត្យសុវត្ថិភាពអោយបានត្រឹមត្រូវ។
លោកប្រធានការិយាល័យដដែលបានបញ្ជាក់ថា នៅក្នុងព្រឹត្តិការណ៍២០កុម្ភះ សម្រាប់ខេត្តបាត់ដំបងនេះ យើងឃើញថាមិនទាន់មានករណីផ្ទុះឡើងនូវជំងឺគូវីដ-១៩ណាមួយនៅក្នុងសហគមន៍នោះទេ ប៉ុន្តែក្នុងនោះយើងក៏មិនត្រូវមានការហ្វេសប្រហែសដែរ យើងត្រូវចូលរួមការពារមិនថានៅតាមអាជីវកម្មទេសចរណ៍ទេ សូម្បីតែបងប្អូនប្រជាពលរដ្ឋនៅពេលចុះទៅទីកន្លែងណា ឬតាមទីផ្សារផ្សេងៗគឺត្រូវចូលរួមអនុវត្តអោយបាន ជាពិសេសគឺត្រូវពាក់ម៉ាស់ លាងដៃបាញ់អាល់កុលជាដើម។
ជាចុងក្រោយលោកសំណូមពរដល់អាជីវកម្មទេសចរទាំងអស់នៅក្នុងខេត្តបាត់ដំបងត្រូវពង្រឹងការអនុវត្តវិធានសុវត្ថិភាព ពិសេសអនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាយើង បីកុំ បីការពារអោយបានជាប្រចាំនៅគ្រប់ទីកន្លែងដើម្បីទប់ស្កាត់កុំអោយឆ្លងចូលសហគមន៍ ក៏ដូចជាក្នុងខេត្តបាត់ដំបងយើងទាំងមូលផងដែរ។
