ក្រសួងអប់រំ យុវជន និងកីឡា នៅយប់ថ្ងៃទី៨ ខែមីនានេះ បានចេញប្រកាសផ្អាកដំណើរការគ្រឹះស្ថានសិក្សាសាធារណៈ និងឯកជន ជាបណ្តោះអាសន្ន នៅស្រុកពាមរក៍ ខេត្តព្រៃវែង។ ការបិទសាលារៀននេះ ដើម្បីចៀសវាងការឆ្លងជំងឺកូវីដ១៩ ក្នុងសហគមន៍ទ្រង់ទ្រាយធំ ព្រមទាំងយោងតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន។
ការប្រកាសរបស់ក្រសួងអប់រំ ខាងលើនេះ បានធ្វើឡើង ភ្លាមៗ បន្ទាប់ពីសម្តេចតេជោ ហ៊ុន សែន បានប្រកាសថា នៅតំបន់អ្នកលឿង ស្រុកពាមរក៍ ខេត្តព្រៃវែង មានអ្នកឆ្លងកូវីដ១៩ ចំនួន ១១នាក់ទៀត ដែលឆ្លងពីគ្រូពេទ្យម្នាក់។ សម្តេចទុកលទ្ធភាពជូនអភិបាលខេត្ត ថាតើត្រូវបិទសាលារៀន ឬក៏បិទតំបន់ផ្ទុះជំងឺកូវីដ១៩ នោះ៕