ខេត្តបាត់ដំបង៖ ជនសង្ស័យម្នាក់ត្រូវបានកម្លាំងនៃអធិការដ្ឋាននគរបាលស្រុកគាស់ក្រឡចុះធ្វើការបង្ក្រាបឃាត់ខ្លួនភ្លាមៗ ក្រោយធ្វើសកម្មភាពលបលួចចូលផ្ទះខណះដែលក្មេងស្រីម្នាក់កំពុងដេកលង់លក់នៅលើគ្រែ។
លោកវរសេនីយ៍ឯក ប៉ាង ហៀង អធិការនគរបាលស្រុកគាស់ក្រឡបានអោយដឹងថា នៅក្នុងកិច្ចចុះប្រតិបត្តិការខាងលើនេះធ្វើឡើងនៅវេលាម៉ោង ៤និង៣០នាទី ទៀបភ្លឺ ថ្ងៃទី០៣.ខែមិនា. ឆ្នាំ២០២១ នៅចំណុចភូមិចំបក់ ឃុំហប់ ស្រុកគាស់ក្រឡ ខេត្តបាត់ដំបង បន្ទាប់ពីទទួលបានបណ្តឹងពីម្តាយក្មេងស្រីរងគ្រោះ។
ជនសង្ស័យត្រូវបានឃាត់ខ្លួន ឈ្មោះ និង សាវ័ន ភេទប្រុស អាយុ ៤៨ឆ្នាំ រស់នៅភូមិចំបក់ ឃុំហប់ ស្រុកគាស់ក្រឡ ខេត្តបាត់ដំបង ដែលជនសង្ស័យខាងលើនេះ នៅយប់ថ្ងៃកើតហេតុរូបគេបានលបលួចចូលក្នុងរបស់ជនរងគ្រោះ ឈ្មោះ ជា ធីតា ភេទស្រី អាយុ ១៤ឆ្នាំ រស់នៅក្នុងភូមិ.ឃុំ កើតហេតុ ជាមួយគ្នា ហើយបានធ្វើសកម្មភាពអោបថើបទៅលើក្មេងស្រីរងគ្រោះដែលកំពុងដេកលង់លក់នៅលើគ្រែខាងក្នុងផ្ទះ។
ខណៈដែលជនសង្ស័យកំពុងធ្វើសកម្មភាពអោបថើប ភ្លាមនោះក្មេងស្រីរងគ្រោះភ្ញាក់ដឹងខ្លួនទាន់ក៏បានធាក់ជនសង្ស័យមួយជើង ហើយបានរត់ទៅប្រាប់ម៉ែនិងបានប្តឹងទៅសមត្ថកិច្ចចុះអន្តរាគមន៍ឃាត់ខ្លួនបានភ្លាមៗតែម្តង។
លោកអធិការបានបញ្ជាក់បន្ថែមថា ករណីនេះដែរជនសង្ស័យក្រោយពីឃាត់ខ្លួនយកមកសាកសួរ រហូតមកដល់ពេលនេះត្រូវបានសមត្ថកិច្ចជំនាញនៃអធិការដ្ឋាននគរបាលស្រុកគាស់ក្រឡ បានកសាងសំណុំរឿងបញ្ជូនទៅកាន់ការិយាល័យជំនាញដើម្បីចាត់ការតាមនីតិវិធី។
