អគ្គនាយកដ្ឋានពន្ធដារ បានប្រកាសនៅថ្ងៃទី១១ ខែមករានេះថា ក្រុមការងារចម្រុះ រាជធានី-ខេត្ត ដឹកនាំដោយមន្ត្រីពន្ធដារ រួមសហការជាមួយអាជ្ញាធរមានសមត្ថកិច្ច ថ្នាក់ក្រោមជាតិ នឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ប្រចាំឆ្នាំ២០២០ នៅតាមគោលដៅមួយចំនួន លើកំណាត់ផ្លូវសំខាន់ៗ នៃរាជធានី-ខេត្ត ចាប់ពីថ្ងៃទី១ ខែកុម្ភៈ ឆ្នាំ២០២១ តទៅ។
តាមសេចក្តីប្រកាស ការចុះពិនិត្យ និងចាប់អ្នកមិនបង់ពន្ធផ្លូវលើយានជំនិះនេះ នឹងធ្វើឡើង តាមចំណារឯកភាពរបស់សម្តេចតេជោ នាយករដ្ឋមន្ត្រី ហ៊ុន សែន ចុះថ្ងៃទី៣០ ខែធ្នូ ឆ្នាំ២០២០។
សេចក្តីប្រកាសរបស់អគ្គនាយកដ្ឋានពន្ធដារ ក៏បានប្រកាសថា ក្នុងករណីម្ចាស់យានយន្តខកខានមិនបានប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២០ កន្លងទៅ សូមមេត្តារួសរាន់អញ្ជើញទៅប្រកាសបង់ពន្ធ និងបង់ប្រាក់ពិន័យតាមច្បាប់ជាធរមាន នៅអគ្គនាយកដ្ឋានពន្ធដារ ឬនៅតាមសាខាពន្ធដារខេត្ត-ខណ្ឌ ឬនៅសាខាធនាគារកាណាឌីយ៉ា អេស៊ីលីដា ធនាគារវឌ្ឍនៈ កម្ពុជាសាធារណៈ ជេ ត្រាស់ រ៉ូយ៉ាល់ ឬនៅសាខាធនាគារ ស្ថាបនា៕
