ខេត្តបាត់ដំបង ៖ នៅរសៀលថ្ងៃទី ០៥ ខែមករា ឆ្នាំ២០២១ នេះ ឯកឧត្តម អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ជាសមាជិកឧត្តមក្រុមប្រឹក្សាអង្គការសម្ព័ន្ធពិភពឥស្លាម( RABITA) និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា និងដោយបានការអញ្ជើញចូលរួមពី ឯកឧត្តម ងួន រតន: អភិបាលខេត្តបាត់ដំបង បានចុះជួបសំណេះសំណាលសាកសួរសុខទុក្ខ និងនាំយកកញ្ចប់អំណោយចែកជូនដល់ប្រជាពលរដ្ឋដែលរងគ្រោះដោយទឹកជំនន់កន្លងមក ចំនួន១,០០០គ្រួសារ ដោយក្នុងនោះមានស្រុកសង្កែ ៥១០គ្រួសារ ក្រុងបាត់ដំបង ៣៥០គ្រួសារ
និងមកពីស្រុកផ្សេងៗទៀតចំនួន ២៤០គ្រួសារ ដែលធ្វើឡើងនៅក្នុងបរិវេណសាលាបឋមសិក្សាឥស្លាមអាលីយ៉ាទុលហាំស្ថិតក្នុងភូមិតាកុក ឃុំនរា ស្រុកសង្កែ ខេត្តបាត់ដំបង។
ឯកឧត្តមទេសរដ្ឋមន្ដ្រី អូស្មាន ហាស្សាន់ បានថ្លែងថា ទោះបីជាទឹកជំនន់បានឆ្លងផុតទៅហើយក៏ពិតមែន ក៏ប៉ុន្តែតម្រូវការនិងភាពចាំបាច់របស់ប្រជាពលរដ្ឋ ក៏នៅតែត្រូវបានការយកចិត្តទុកដាក់ពីសំណាក់ថ្នាក់ដឹកនាំគ្រប់ជាន់ថ្នាក់ ដោយផ្តល់ជាទូទៅមិនប្រកាន់ពូជសាសន៍ ពណ៌សម្បុរ ឬសាសនាណាមួយឡើយ ហើយកញ្ចប់អំណោយទាំងអស់នេះ គឺជាការឧបត្ថម្ភរបស់អង្គការសម្ព័ន្ធពិភពឥស្លាម (RABITA) សហការជាមួយអង្គការមូលនិធិអភិវឌ្ឍន៍មុស្លិមកម្ពុជា។
ឯកឧត្តមទេសរដ្ឋមន្ដ្រី អូស្មាន ហាស្សាន់ បានបន្ត ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាបិតាស្ថាបនិក អគ្គមគ្គទេស៍ និងជាប្រតិបត្តិករនយោបាយ ឈ្នះឈ្នះ ដែលបានតស៊ូរំដោះប្រទេសជាតិឲ្យរួចផុតពីរបបប្រល័យពូជសាសន៍ និងបានខិតខំពុះពារកសាងសន្តិភាព ខឿនសេដ្ឋកិច្ច លទ្ធិប្រជាធិបតេយ្យ និងវឌ្ឍនភាពសង្គមដ៏គាប់ប្រសើរ។ហើយ «សន្តិភាព» របស់សម្តេចតេជោនាយករដ្ឋមន្ត្រី គឺជាកត្តាសារវន្តមិនអាចខ្វះបាន សម្រាប់ការសម្រេចជោគជ័យ លើសមិទ្ធផលជាតិជាបន្តបន្ទាប់ និងការអភិវឌ្ឍន៍លើគ្រប់វិស័យ ហើយក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុនសែន នាយកមន្ត្រីនៃយើងទាំងអស់គ្នា ដែលយើងសង្ឃឹមថា កម្ពុជាដ៏រាបណាមានសម្តេចលោកនៅដឹកនាំ គឺយើងនូវទទួលបាននៅជោគជ័យថ្មីៗបន្ថែមទៀត។
គួរបញ្ជាក់ថា អំណោយដែលត្រូវចែកជូនដល់បងប្អូនប្រជាពលរដ្ឋនាពេលនេះរួមមាន! -អង្ក ២០គីឡូក្រាម -មី ១០កញ្ចប់ -ត្រីខ ៤កំប៉ុង -ស្ករស ២គីឡូក្រាម -សាប៊ូ ៤ដុំ -ប្រេងឆារ ២លីត្រ -សាប៊ូលាងចាន ១ដប -និងអំបិល ២គីឡូក្រាម។
