ខេត្តបាត់ដំបង៖ នាថ្ងៃទី០៨ ខែវិច្ឆិកា ឆ្នាំ២០២១ ម្សិលមិញ សាខាកាកបាទក្រហមកម្ពុជា ខេត្តបាត់ដំបងដឹកនាំដោយឯកឧត្តមបណ្ឌិត ប៊ុត គឹមស៊ាន អនុប្រធានអចិន្ត្រៃយ៍គណៈកម្មាធិការសាខាតំណាងឯកឧត្តម សុខ លូ អភិបាលនៃគណៈអភិបាលខេត្តនិងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបងនិងសហការី បានចុះសួរសុខទុក្ខនិងនាំយកអំណោយមនុស្សធម៌ផ្តល់ជូន បងប្អូនប្រជាពលរដ្ឋខ្មែរ-ឥស្លាមដែលមានជីវភាពក្រីក្រ ចាស់ជរា ជនពិការ មានជីវភាពខ្វះខាតក្នុងបរិបទកូវីដ-១៩ ចំនួន៣៨គ្រួសាររស់នៅក្នុងសង្កាត់ក្តុលដូនទាវ ក្រុងបាត់ដំង។
ក្នុងឱកាសនោះ ឯកឧត្តមបណ្ឌិត ប៊ុត គឹមស៊ាន អនុប្រធានអចិន្ត្រៃយ៍គណៈកម្មាធិការសាខាខេត្តបានពាំនាំប្រសាសន៍របស់ ឯកឧត្តម សុខ លូ ប្រធានគណៈកម្មាធិការសាខាខេត្ត ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីអាណិតអាសូរ ព្រមជាមួយនឹងការគិតគូរពីសុខភាព និងជីវភាព រស់នៅរបស់ប្រជាពលរដ្ឋទាំងអស់ ដោយមិនប្រកាន់ពីនិន្នាការនយោ បាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោល "ទីណាមានការលំបាក ទីនោះមានកាកបាទក្រហមកម្ពុជា" ។
សូមអោយបងប្អូនប្រឹងប្រែងប្រកបមុខរបរដើម្បីជីវភាពរស់នៅបន្តទៀត ជាពិសេសត្រូវថែទាំសុខភាពឱ្យបានល្អ រស់នៅមានអនាម័យ និងអនុវត្តឱ្យបានខ្ជាប់ខ្ជួនវិធានការរបស់ក្រសួងសុខាភិបាល ទប់ស្កាត់ការរីករាលដាល ជំងឺកូវីដ-១៩ ។
ជាមួយគ្នានេះ ឯកឧត្តមបណ្ឌិត ប៊ុតគឹមស៊ាន ក៏បានជម្រាបជូនពីស្ថានការណ៍វិវត្តន៍ថ្មីនៃជំងឺកូវីដ១៩ ក្នុងព្រឹត្តិការណ៍សហគមន៍ ២០ កុម្ភៈ ព្រមទាំងសូមឲ្យបងប្អូនទាំងអស់បន្តចូលរួមទប់ស្កាត់ និងការពារការរីករាលដាលនៃជំងឺកូវីដ១៩នេះ តាមរយៈការបន្តអនុវត្តវិធានការរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី គឺ៖ ៣ ការពារ (១.ពាក់ម៉ាស់ ២.លាងដៃ ៣.គម្លាតសុវត្ថិភាពសង្គម និងគម្លាតសុវត្ថិភាពបុគ្គល ) និង ៣ កុំ ( ១.កុំចូលទៅកន្លែងបិទជិត គ្មានខ្យល់ចេញចូល និងប្រេីម៉ាសុីនត្រជាក់ច្រេីនពេក រកកន្លែងមានខ្យល់ចេញចូល ២.កុំទៅកន្លែងមនុស្សច្រេីនកុះករ ៣.កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដេីម ) ។
ហើយអំណោយដែលបានផ្តល់ជូននាពេលនេះក្នុងមួយគ្រួសារៗទទួលបាន -អង្ករ ២៥គីឡូក្រាម , ទឹកបរិសុទ្ធវីឃែរ០១ធុង -ក្រមា និងថវិកា មួយចំនួនផងដែរ។
