ខេត្តបាត់ដំបង : ភ្នំវត្តតាមាឃដែលជាសម្បត្តិធម្មជាតិសំបូរទៅដោយព្រៃឈើតូចធំដុះស្អេកស្កះយ៉ាងស្រស់បំព្រងស្ថិតក្នុងភូមិលាវ ឃុំអណ្តើកហែប ស្រុករតនមណ្ឌល ពេលនេះត្រូវបានក្រុមហ៊ុនដែលអះអាងថាជាគម្រោងអភិវឌ្ឍន៍របស់ជាតិ ជាមួយដៃគូរបស់ជប៉ុន ដាក់គ្រឿងចក្រទន្ទ្រានកាយយកអាចម៍ដីយ៉ាងអាណាធិបតេយ្យអស់ជាច្រើនថ្ងៃ តែខាងមន្ទីរជំនាញឆ្លើយថា នៅមិនទាន់បានដឹងព័ត៌មាននេះទេ។
យោងតាមប្រភពពីប្រជាពលរដ្ឋដែលរស់នៅក្បែរជើងភ្នំវត្តតាមាឃខាងលើនេះបានបង្ហើបប្រាប់អោយដឹងថា ភ្នំវត្តតាមាឃគឺជាភ្នំមួយដែលសំបូរទៅដោយព្រៃឈើធម្មជាតិដុះមានតូចមានធំយ៉ាងស្អេកស្កះសម្រាប់ជាកន្លែងសត្វព្រៃរស់នៅ ពេលនេះត្រូវបានក្រុមហ៊ុនដែលអះអាងថា ជាគម្រោងអភិវឌ្ឍន៍របស់ជាតិជាមួយដៃគូររបស់ជប៉ុនបានដាក់គ្រឿងចក្រចូលទន្ទ្រានកាយយកអាចម៍ដីជាច្រើនថ្ងៃមកហើយ តែមិនដឹងថាគេយកទៅលក់ឬយកធ្វើអ្វីនោះទេ ដែលក្នុងមួយថ្ងៃៗរាប់សិបឡាន ដោយមិនដែលឃើញមានអាជ្ញាធរឬមន្ត្រីជំនាញណាម្នាក់ចុះមកហាមឃាត់ឡើយ ដែលធ្វើអោយបាត់បង់សម្បត្តិធម្មជាតិរបស់រដ្ឋផងដែរ ។
ពាក់ព័ន្ធទៅហ្នឹងគ្រឿងចក្រដែលកំពុងជីកកកាយដីភ្នំវត្តតាមាឃខាងលើនេះដែរ លោក នៅ រតនា ប្រធានអង្គភាពស៊ីម៉ាក់ ដែលទទួលបន្ទុកការងារជួសជុលផ្លូវ នៅខេត្តបាត់ដំបង បន្ទាយមានជ័យ បានបញ្ជាក់ប្រាប់អ្នកយកព័ត៌មានយើងតាមរយះទូរស័ព្ទ នៅរសៀលថ្ងៃទី១៥ ខែធ្នូ ឆ្នាំ២០២០នេះថា លោកធ្វើការនេះតាមប្រសាសន៍សំណើររបស់ខេត្ត ដោយទីមួយខេត្តស្នើសុំលោកអោយជួយអភិវឌ្ឍន៍ ដល់អញ្ចឹងលោកជាក្រុមការងារអភិវឌ្ឍន៍ តាមរយៈសំណើផ្សេងៗ ភូមិធ្វើសំណើទៅឃុំ ឃុំធ្វើសំណើទៅស្រុក ស្រុកសុំការអនុញ្ញាតពិសេស អញ្ចឹងរាល់ផែនការរបស់លោក លោកបញ្ជូនចូលរួមក្នុងគណៈបញ្ជាការឯកភាពខេត្ត អញ្ចឹងលោកចេញអភិវឌ្ឍន៍នៅចំណុចណាៗលោកជាប្រតិបត្តករ អាជ្ញាធរខេត្តលោកអោយចូលយកដីនៅចំណុចណាៗ គឺសម្រេចនៅលើមូលដ្ឋាន។ អញ្ចឹងអង្គភាពរបស់លោកអត់មានពាក់ព័ន្ធនឹងការស្នើសុំខ្លួនឯងទេ ព្រោះមូលដ្ឋានគេស្នើសុំដើម្បីអភិវឌ្ឍន៍កន្លែងណាយើងអត់មានបរិភោគដើម្បីចូលរួមទេ ព្រោះយើងជាអង្គភាពរដ្ឋ អញ្ចឹងមូលដ្ឋានគេធ្វើសំណើរួចអស់ ទើបខាងលោកចុះធ្វើតាមសំណើររបស់គេតាមក្រោយ។
លោកបញ្ជាក់បន្ថែមថា រយៈពេលមួយឆ្នាំលោកធ្វើការជួសជុលផ្លូវនៅស្រុករតនៈមណ្ឌលប្រវែង ៣០គីឡូម៉ែត្រ ហើយនេះមិនមែនជាគម្រោងឯកជនដេញថ្លៃមូលនិធិឃុំ ភូមិស្អីទេ គម្រោងលោកគឺជាគម្រោងអភិវឌ្ឍន៍របស់ជាតិ ជាមួយដៃគូរបស់ជប៉ុន។
ចំពោះបញ្ហានេះដែរ លោក សឿម ប៊ុនរិទ្ធ អភិបាលរងខេត្តបាត់ដំបង និងជាអ្នកនាំពាក្យរបស់សាលាខេត្ត បានប្រាប់អោយអ្នកយកព័ត៌មានយើងដឹងថា រឿងនេះលោកនឹងអោយគេចុះធ្វើការស្រាវជ្រាវ។
ភ្នំវត្តតាមាឃស្រុករតន:មណ្ឌល ត្រូវបានគេដាក់គ្រឿងចក្រកាយទន្ទ្រានយកអាចម៌ដីយ៉ាងអាណាធិបតេយ្យ
ដោយឡែក លោក អ៊ាន មាឃ ប្រធានមន្ទីររ៉ែនិងថាមពលខេត្តបាត់ដំបង បានបញ្ជាក់ប្រាប់អោយអ្នកយកព័ត៌មានយើងដឹងនៅរសៀលថ្ងៃនេះដែរថា លោកនៅមិនទាន់បានដឹងព័ត៌មាននេះទេ ចាំស្អែកលោកនឹងអោយក្រុមការងារចុះទៅមើល។