ខេត្តបាត់ដំបង៖ ប្រជាកសិកររស់នៅក្នុងខេត្តបាត់ដំបងបានសម្តែងការសប្បាយរីករាយខណះដែលតម្លៃពោតទុំនៅរដូវប្រមូលផលនេះបានហក់ឡើងថ្លៃខ្ពស់ជាងឆ្នាំកន្លងទៅ ហើយទិន្នផលក៏បានខ្ពស់ផងដែរ បើទោះបីជាប្រទេសកម្ពុជាយើងជួបគ្រោះរាំងស្ងួត(កូនរដូវប្រាំង)ក៏ដោយ។
លោក វិច្ឆិកា ដែលជាកសិកររស់នៅភូមិស្រះទឹកថ្មី ឃុំតាក្រី ស្រុកកំរៀង បានប្រាប់អ្នកយកព័ត៌មានយើងអោយដឹងនៅព្រឹកថ្ងៃទី០១ ខែតុលា ឆ្នាំ២០២០នេះថា បច្ចុប្បន្នគ្រួសារលោកក្រៅពីធ្វើដំណាំស្រូវ ពួកគាត់បានឆក់យកឱកាសមួយទៀត គឺធ្វើដំណាំពោតក្រហម នៅលើផ្ទៃដី ២០ ហិកតា ហើយរាល់ថ្ងៃនេះកំពុងប្រមូលផលក្នុងតម្លៃខ្ពស់គួរសម។
លោកបន្តថា ពោតដែលកំពុងហក់ឡើងថ្លៃនាពេលនេះគឺជាប្រភេទពោតក្រហម ដោយបច្ចុប្បន្នក្នុងមួយគីឡូក្រាមពោតស្នូលលក់បានក្នុងតម្លៃ ៤.៥បាត ខណៈដែលឆ្នាំកន្លងទៅតម្លៃចាប់ផ្ដើមដំបូងលក់បានត្រឹមតែ ៣.៩បាតប៉ុណ្ណោះ ដោយឈ្មួញកណ្តាលមកប្រមូលទិញដល់កន្លែង ដើម្បីនាំចេញយកទៅលក់បន្តនៅក្នុងទឹកដីប្រទេសថៃ។
ជាមួយគ្នានេះលោក ឈឹម វជ្ជរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានអោយដឹងដែរថា នៅឆ្នាំ២០២០នេះ សម្រាប់ខេត្តបាត់ដំបង ល្បឿនការងារបង្កបង្កើនផលពោតក្រហមរបស់ប្រជាកសិករ មានទំហំផ្ទៃដី ៥២.៦៥៧ ហិកតា ថយចុះ ខណៈដែលឆ្នាំ២០១៩ មានទំហំ ៩៩.៧៩៧ ហិកតា៕
