នៅព្រឹកថ្ងៃចន្ទ ៤កើត ខែអស្សុជ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី ២១ ខែកញ្ញា ឆ្នាំ២០២០ នេះ សាខាកាកបាទក្រហមកម្ពុជាខេត្តព្រះសីហនុ ឯកឧត្តម គួច ចំរើន ប្រធានគណៈកម្មាធិការសាខា បានទទួលអំណោយពីសប្បុរសធម៌ ដើម្បីចូលរួមអបអរសាទរខួបទី១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២០ ក្រោមប្រធានបទ «ខ្ញុំ ស្រឡាញ់សន្តិភាព និងកាកបាទក្រហមកម្ពុជា»។
អំណោយដែលសាខាកាកបាទក្រហមកម្ពុជាខេត្តព្រះសីហនុទទួលបានពីសប្បុរសធម៌រួមមា៖ ព្រះតេជគុណ ប៊ុន ណេង ចៅអធិការវត្តឥន្ទញាណ ខេត្តព្រះសីហនុ ឧបត្ថម្ភ អង្ករ ២តោន មី ១១០កេសតូច ទឹកត្រី ទឹកស៊ីអ៊ីវ ៨០យួរ សម្ភារផ្ទះបាយ ៦០ឈុត និងថវិកាចំនួន ៤.០០០.០០០ រៀល (បួនលានរៀល) ឯកឧត្តម នាយឧត្តមសេនីយ៍ ឈិន ច័ន្ទពណ៌ និលោកជំទាវ បានឧបត្ថម្ភ មី ៥០កេសធំ (៣០០កេសតូច) ទឹកសុទ្ធ ៥០យួរ ភួយ ១៦៥ភួយ អាវ ៧៥អាវ។
ឯកឧត្តមប្រធាន បានថ្លែងអំណរគុណយ៉ាងជ្រាលជ្រៅចំពោះ ព្រះតេជគុណ ឯកឧត្តម នាយឧត្តមសេនីយ៍ និលោកជំទាវ ដែលបានឧបត្ថម្ភថវិកា និងសម្ភារ គ្រឿងឧបភោគ បរិភោគ ដល់កាកបាទក្រហមកម្ពុជាខេត្តព្រះសីហនុ ដើម្បីចូលរួមអបអរសាទរខួបទី១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២០ ក្រោមប្រធានបទ «ខ្ញុំ ស្រឡាញ់សន្តិភាព និងកាកបាទក្រហមកម្ពុជា» ដើម្បីបម្រើសកម្មភាពមនុស្សធម៌ ជូនដល់ប្រជាពលរដ្ឋក្នុងខេត្ត ដែលជួបការលំបាក ដោយគ្រោះធម្មជាតិ និងគ្រោះមហន្តរាយផ្សេងៗ ។ សូមគោរព សូមប្រសិទ្ធពរ បវរសួស្តីមហាប្រសើរ និងពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕