ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម អ៊ុក ដាមរី អ្នកតំណាងរាស្ត្រមណ្ឌលកណ្ដាល ឯកឧត្តម នូវ ប៉េងច័ន្ទតារា អភិបាលរងខេត្តកណ្តាលបានជួបសំណេះសំណាល សាកសួរសុខទុក្ខ និងនាំយកកូនត្រីអណ្តែង និងសម្ភារចិញ្ចឹមត្រីមួយចំនួនទៀត មកចែកជូនកសិករ នៅភូមិព្រែកតូច ឃុំព្រែកដាច់ ស្រុកលើកដែក ខេត្តកណ្តាល នាព្រឹកថ្ងៃទី០៧ ខែកញ្ញា ឆ្នាំ២០២០ ។
ក្នុងពិធីនេះដែរ ឯកឧត្ដម នូវប៉េង ច័ន្ទតារា អភិបាលរងខេត្តកណ្ដាល បានធើ្វរបាយការណ៍សង្ខេបអំពីវឌ្ឍនភាព នៃវិស័យកសិកម្មនៅទូទាំងខេត្តកណ្តាល ជាពិសេសផលិតកម្មបន្លែ ដែលទូទាំងខេត្តមានលទ្ធភាពផ្គត់ផ្គង់ ឲ្យទីផ្សាររាជធានីភ្នំពេញបានជាង ៤០០តោនក្នុង១ថ្ងៃ។
ឯកឧត្ដមអភិបាលរងខេត្តកណ្ដាលបានបន្តថា ដោយឡែក វិស័យវារីវប្បកម្ម នៅទូទាំងខេត្តកណ្ដាល មាន ២៨សហគមន៍នេសាទ តំបន់អភិរក្សមាន ៥កន្លែង និងអន្លុងអភិរក្សមាន ៨កន្លែង និងមាន ១៧គ្រួសារចិញ្ចឹមត្រី មានស្រះចិញ្ចឹម ១៧មានត្រីពូជ១៣៤,០០០ក្បាល ក្រៅពីនេះ ក៏មានកសិករចិញ្ចឹមត្រីតាមបែមាន ៨គ្រួសារ មានបែចំនួន ២០ ។
ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ការបង្កើនផលិតភាពផលិតកម្មស្បៀង និងការកាត់បន្ថយនូវភាពក្រីក្ររបស់ប្រជាពលរដ្ឋ គឺត្រូវបង្កើតការងារ តាមរយៈការពង្រឹង និងពង្រីកសកម្មភាពចិញ្ចឹមត្រី និងកង្កែប ដាំដំណាំ និងបន្លែបង្កា ជាលក្ខណៈគ្រួសារ ដើម្បីបង្កើតចំណូល ធានាសន្តិសុខស្បៀងក្នុងគ្រួសារ ស្របពេលដែលវិស័យមួយចំនួនទៀត កំពុងប្រឈមបញ្ហាដោយសារជំងឺឆ្លងកូវីដ-១៩ នាពេលបច្ចុប្បន្ន ។
ឯកឧត្ដមរដ្ឋមន្ត្រី ក៏បានស្នើដល់មន្ត្រីជំនាញរដ្ឋបាលជលផល ត្រូវបន្តចុះជួយផ្សព្វផ្សាយ បណ្តុះបណ្តាលបន្ថែមលើការងារបច្ចេកទេសចិញ្ចឹម បង្កាត់ ភ្ញាស់កូន វិធីលាយផ្សំចំណី ការថែទាំ និងប្រសិទ្ធភាពសេដ្ឋកិច្ច ហើយត្រូវបង្កើនសកម្មភាពចុះចែកកូនត្រី កូនកង្កែប និងតង់ចិញ្ចឹម ដល់គ្រួសារដែលចង់ពង្រីកអាជីវកម្មបន្ថែម និងអ្នកដែលចង់ ចាប់ផ្តើមចិញ្ចឹម។
សូមបញ្ជាក់ថា កសិករចំនួន ៥០គ្រួសារ ដោយក្នុងគ្រួសារនីមួយៗទទួលបានកូនត្រីអណ្តែង ៧០០ក្បាល ចំណី ៤បាវ និងតង់ប្លាស្ទិកចិញ្ចឹមត្រីចំនួន ១ ៕