កសិផលកម្ពុជា ចំនួន១៨ប្រភេទ ត្រូវបាននាំចេញទៅកាន់ទីផ្សារកូរ៉េ ដោយជោគជ័យ ខណៈអគ្គនាយកដ្ឋានកសិកម្ម កំពុងដាក់ពាក្យស្នើសុំនាំចេញកសិផលចំនួន២មុខបន្ថែមទៀត។
នេះបើតាមការបង្ហាញនៅក្នុងកិច្ចជំនួបពិភាក្សាការងាររវាងឯកឧត្តមរដ្ឋមន្ត្រី វេង សាខុន ជាមួយឯកឧត្តម Park Heung-kyeong ឯកអគ្គរដ្ឋទូតនៃសាធារណរដ្ឋកូរ៉េ កាលពីថ្ងៃទី២៦ ខែសីហា ឆ្នាំ២០២០។
មានប្រសាសន៍នាឱកាសនេះ ឯកឧត្តមរដ្ឋមន្ត្រីបានថ្លែងអំណរ គុណជូនចំពោះប្រជាជន និងរដ្ឋាភិបាលកូរ៉េ ដែលបានជួយឧបត្ថម្ភគាំទ្រដល់ការអភិវឌ្ឍវិស័យកសិកម្មកម្ពុជាក្នុងរយៈពេលកន្លងមក។ ជំនួយដ៏មានតម្លៃនេះ ពិតជាបានចូលរួមចំណែកក្នុងការកសាង និងអភិវឌ្ឍប្រទេសកម្ពុជាឲ្យមានការរីកចម្រើន ដែលបានស្តែងចេញជាលទ្ធផលយ៉ាងជាក់ច្បាស់ដូចយើងបានឃើញនាពេលបច្ចុប្បន្ន។
ឯកឧត្តមរដ្ឋមន្ត្រីក៏បានថ្លែងអំណរគុណជូនចំពោះរដ្ឋាភិបាលកូរ៉េដែលបានអនុញ្ញាតឲ្យកសិផលកម្ពុជានាំចេញទៅកាន់ទីផ្សារកូរ៉េចំនួន ១៨ប្រភេទ រួចមកហើយរួមទាំងស្វាយកែវរមៀតស្រស់ផង ហើយនៅមាន ២មុខទៀតដែលអគ្គនាយកដ្ឋានកសិកម្មកំពុងដាក់ពាក្យស្នើសុំ។ ឯកឧត្តមរដ្ឋមន្ត្រីសង្ឃឹម និងជឿជាក់ថារដ្ឋា ភិបាលកូរ៉េ តាមរយៈឯកឧត្តមឯកអគ្គរដ្ឋទូតនឹងបន្តជួយគាំទ្រ ដល់ការអភិវឌ្ឍវិស័យកសិកម្មឲ្យកាន់តែមានការរីកចម្រើនថែមទៀតនាពេលអនាគត។
ជាការឆ្លើយតប ឯកឧត្តមឯកអគ្គរដ្ឋទូត នឹងនាំយកនូវរាល់សំណើរបស់ឯកឧត្តមរដ្ឋមន្ត្រីទៅពិនិត្យពិចារណាឲ្យបានស៊ីជម្រៅ ដើម្បីផ្តល់ការគាំទ្រជាជំហានៗតាមការចាំបាច់ ក្នុងបំណងចូលរួមអភិវឌ្ឍវិស័យនេះឲ្យមានការរីកចម្រើនសមស្របតាមបរិបទនៃការប្រកួតប្រជែងទីផ្សារ កំណើនប្រជាជន និងកំណើនសេដ្ឋកិច្ច។
សូមបញ្ជាក់ថា កសិផលកម្ពុជាទាំង ១៨ប្រភេទ ដែលបាននាំចេញទៅកាន់ទីផ្សារកូរ៉េរួមមាន៖ គ្រាប់ស្វាយចន្ទី ស្ករត្នោត ដូងប្រេង កក់ក្រៀម ដំណាប់ស្វាយ ស្វាយស្រស់ ចំណិតផ្លែ ញក្រៀម ម្សៅញ ជ័រកៅស៊ូ ម្រេច ពោត ដំណាប់ផ្លែម្នាស់ ផ្សិតលីងជឺ សណ្តែកផ្កាយ ស្លឹកទៀបបារាំង ម្សៅម្រុំ និងស្លឹកគ្រៃ៕