ក្នុងកិច្ចប្រជុំពេញអង្គគណៈរដ្ឋមន្ត្រី កាលពីព្រឹកថ្ងៃសុក្រ ទី០៣ ខែកក្កដា ឆ្នាំ២០២០ សម្តេចតេជោ ហ៊ុន សែន បានលើកឡើងថា ករណីទំនាស់ដីធ្លី នៅស្រុកគាស់ក្រឡ ខេត្តបាត់ដំបង ក្រសួងស្ថាប័នពាក់ព័ន្ធ និងរដ្ឋបាលខេត្តបាត់ដំបង ត្រូវដកហូតត្រឡប់មកវិញនូវដី ដែលបុគ្គលឈ្មោះ សង ថន បានទន្ទ្រានរំលោភយក ដោយខុសច្បាប់ និងត្រូវប្រគល់ឲ្យរដ្ឋបាល ខេត្តបាត់ដំបង គ្រប់គ្រង និងរក្សាទុកសម្រាប់ធ្វើប្រទានកម្ម ជូនប្រជាពលរដ្ឋ ក្នុងគោលដៅសម្បទានសង្គមកិច្ច។
សម្តេចតេជោ ហ៊ុន សែន ក៏បានបន្ថែមថា អង្គភាពប្រឆាំងអំពើពុករលួយ ត្រូវធ្វើការងារនេះ បន្តទៅទៀត។ ដំណាក់កាលនេះ ជាពេល ដែលត្រូវធ្វើការវះកាត់រាល់ជនខិលខូចទាំងឡាយណា ដែលឃុបឃិតគ្នាយកដីរដ្ឋ និងដីរបស់ប្រជាពលរដ្ឋ ហើយប្រើកលល្បិចផ្សេងៗ គឺត្រូវផ្តន្ទាទោស ហើយនឹងឈានដល់ការដកហូតមុខតំណែង និងត្រូវបណ្តេញចេញពីគណបក្សប្រជាជនកម្ពុជាតែម្តង។ ចំពោះបណ្ណកម្មសិទ្ធិដីធ្លីទាំងឡាយណា ដែលចេញពីអំពើទុច្ចរិត គឺត្រូវធ្វើមោឃភាពចោល។
សូមរម្លឹកថា ជម្លោះដីនៅស្រុកគាស់ក្រឡ ខេត្តបាត់ដំបង បានកើតឡើងចាប់តាំងពីឆ្នាំ២០១៥ រវាងលោកឧកញ៉ា សង ថន និងប្រជាពលរដ្ឋប្រមាណ ៤០០ គ្រួសារលើដីទំហំជាង ៥០០០ ហិកតា នៅឃុំព្រះផុស និងឃុំឆ្នាល់មាន់។
ករណីជម្លោះដីធ្លីនោះ នាំឲ្យអង្គភាពប្រឆាំងអំពើពុករលួយ ឃាត់ខ្លួនលោកឧកញ៉ា សង ថន កាលពីថ្ងៃទី២៧ ខែមិថុនា ឆ្នាំ២០២០។ នៅព្រលប់ថ្ងៃទី០១ ខែកក្កដា ឆ្នាំ២០២០ អង្គភាពប្រឆាំងអំពើពុករលួយ ACU ក៏បាននាំខ្លួនលោក ស៊ូ អារ៉ាហ្វាត់ អភិបាលរង ខេត្តបាត់ដំបង ពាក់ព័ន្ធនឹងអំពើពុករលួយរឿងដីធ្លី នៅស្រុកគាស់ក្រឡ ខេត្តបាត់ដំបង។ លោក ស៊ូ អារ៉ាហ្វាត់ ធ្លាប់ជាប្រធានគណៈកម្មការថ្នាក់ខេត្ត ដោះស្រាយវិវាទដីធ្លី នៅស្រុកគាស់ក្រឡ។
កាលពីថ្ងៃទី២៧ ខែមិថុនា ឆ្នាំ២០២០ សម្តេចតេជោ ហ៊ុន សែន ក៏បានចេញអនុក្រឹត្យ បញ្ចប់មុខតំណែងលោក ម៉ៅ សុចាន់ ពីអភិបាលស្រុកគាស់ក្រឡ ខេត្តបាត់ដំបង ផងដែរ៕
