ខ្វាក់មាន់គឺជាការថយចុះនូវសមត្ថភាពក្នុងការមើលឃើញច្បាស់នៅពេលយប់ ឬនៅកន្លែងដែលមានពន្លឺមិនគ្រប់គ្រាន់ ។ ខ្វាក់មាន់ប្រភេទខ្លះអាចព្យាបាលបាន និងប្រភេទខ្លះទៀតមិនអាចព្យាបាលបាន។
មូលហេតុដែលបណ្តាលឲកើតជំងឺខ្វាក់មាន់មានដូចជា ៖
1. ខ្វាក់មាន់ពីកំណើត
ជំងឺនេះកើតមានច្រើនណាស់ ជាពិសេសកើតឡើងដោយសារតែហ៊្សែន ដែលភាគច្រើនឃើញមានចំពោះបុរស-ស្ត្រីដែលរៀបការជាមួយបងប្អូនជីដូនមួយនឹងគ្នា គឺមិនអាចព្យាបាលបានទេ ។ ជំងឺនេះអាចវិវឌ្ឍបន្តិចម្តងៗរហូតដល់អាយុ៥០ឬ៦០ឆ្នាំ អ្នកជំងឺមើលលែងឃើញតែម្តង ។
2. កង្វះវីតាមីនA
វិតាមីនAមានសារសំខាន់ណាស់ក្នុងការជួយដល់ភ្នែកទាំងគូរបស់មនុស្ស ហើយបើសិនជាកង្វះវិតាមីនAនោះកូនៗរបស់លោកអ្នកអាចនឹងថយចុះនូវការមើលឃើញបន្តិចម្តងៗរហូតងងឹត ។
3. បណ្តាលមកពីជំងឺផ្សេងៗ
ការថយចុះនូវការមើលឃើញនេះក៏អាចកើតឡើងដោយសារតែលោកអ្នកកើតមានជំងឺមួយចំនួនដូចជា ភ្នែកឡើងបាយ ទឹកដក់ក្នុងភ្នែក រលាកបាតភ្នែកជាកត្តាដែលធ្វើឲ្យភ្នែករបស់លោកអ្នកថយចុះនូវការមើលឃើញ ។
វិធីព្យាបាលជំងឺខ្វាក់មាន់ត្រូវអនុវត្តតាមវិធីមួយចំនួនដូចជា ៖
– ចៀសវាងរៀបការជាមួយបងប្អូនជីដូនមួយនឹងគ្នា
– ឪពុកម្តាយគ្រប់រូបគួរនាំកូនទៅបន្តក់ថ្នាំវីតាមីនA ហើយមានអាហារូបត្ថម្ភសម្រាប់បំប៉នកូនៗឱ្យគ្រប់គ្រាន់សម្រាប់ការលូតលាស់
– ប្រើសិនបើការមើលរបស់លោកអ្នកថយចុះគួរតែប្រញាប់ព្យាបាលនិងពិគ្រោះជាមួយគ្រូពេទ្យជំនាញ។
គេសង្កេតឃើញថា កុមារដែលកើតជំងឺខ្វាក់មាន់ភាគច្រើនដោយសារកង្វះវីតាមីនAហើយច្រើនកើតមានចំពោះក្មេងដែលមានអាយុក្រោម៦ឆ្នាំ ហើយស្រ្តីដែលមានផ្ទៃពោះក៏អាចកើតមានជំងឺប្រភេទនេះបានដែរដូច្នេះទើបគេទាមទារឲ្យស្រ្តីមានផ្ទៃពោះទទួលទានវីតាមីនAឲ្យបានគ្រប់គ្រាន់ដើម្បីសង្គ្រោះទារកពីជំងឺខ្វាក់មាន់ ៕
ប្រភព៖ EMAZOO កែសម្រួលដោយ ៖ Hour