ក្រុមហ៊ុនផលិតរថយន្តលំដាប់ពិភពលោក ចំនួន៧ និងក្រុមហ៊ុនពាណិជ្ជកម្មល្បីៗជាច្រើន បានសម្រេចបញ្ចប់អាជីវកម្មរបស់ខ្លួន នៅក្នុងប្រទេសរុស្សី និងបន្សល់ទុកបុគ្គលិករាប់រយនាក់ ដោយសារតែការការដាក់ទណ្ឌកម្មដោយកាត់ផ្តាច់ទីផ្សារពីសំណាក់លោកខាងលិច មកលើប្រទេសមួយនេះ។
យោងតាមការចុះផ្សាយដោយសារព័ត៌មាន CNA បានបញ្ជាក់ថា ក្រោយប្រធានាធិបតីរុស្ស៊ី លោក វ្ហាឌីមៀ ពូទីន លើកទ័ពទៅវាយប្រហារប្រទេសអ៊ុយក្រែន និងបន្ទាបពីប្រទេសរុស្សីទទួលរងទណ្ឌកម្មផ្នែកសេដ្ឋកិច្ច ជាបន្តបន្ទាប់, ក្រុមហ៊ុនផលិតរថយន្តចំនួន៧ ក្នុងនោះរួមមាន៖ Volvo របស់ស៊ុយអែត និងក្រុមហ៊ុន Daimler Truck បានសម្រេចផ្អាកចរន្តអាជីវកម្មរបស់ខ្លួន ជាបន្ទាន់ និងបន្សល់ទុកសម្ពាធដល់បុគ្កលិករាប់រយនាក់ នៅក្នុងប្រទេសរុស្សី។
ប្រភពដដែលបន្តថា ក្រោយមានការផ្តាច់អាជីវកម្មជាបន្តបន្ទាប់ ក្រុមហ៊ុនថាមពលយក្សមួយទៀត (BP) ដែលជាក្រុមហ៊ុនវិនិយោគបរទេសដ៏ធំបំផុតរបស់រុស្ស៊ី ក៏បានបោះចោលភាគហ៊ុន២០ភាគរយ ស្មើ២៥ពាន់លានដុល្លារ ដើម្បីដើរចេញប្រទេសរុស្ស៊ី។ក្នុងនោះក៏មាន ក្រុមហ៊ុន Volkswagen ដែលជាក្រុមហ៊ុនដឹកជញ្ជូនដ៏ធំមួយទៀត ក៏បានសម្រេចផ្អាកដំណើរការរបស់ខ្លួនជាបណ្ដោះអាសន្នផងដែរ៕