ខេត្តបាត់ដំបង! សេចក្តីរាយការណ៍មួយបានអោយដឹងថា កាលពីថ្ងៃទី ១៧ ខែធ្នូ ឆ្នាំ២០២១ វេលាម៉ោង ២១និង១០នាទីយប់មានករណីអគ្គិភ័យមួយបានកើតឡើងនៅចំណុចភ្នំស្លឹក ស្ថិតក្នុងភូមិបឹងអំពិល ឃុំស្តៅ ស្រុករតនមណ្ឌល ខេត្តបាត់ដំបង និងបណ្តាលឲ្យឆេះផ្ទះប្រជាពលរដ្ឋចំនួន០១ខ្នង (ទាំងស្រុង)។
ផ្ទះដែលត្រូវអគ្គិភ័យឆាបឆេះខាងលើមានទំហំ ៣ម៉ែត្រx៤ម៉ែត្រ ធ្វើអំពីឈើ ដំបូលប្រក់ស័ង្កសី ជញ្ជាំងស័ង្កសី ដែលមានម្ចាស់ឈ្មោះ សុខ ឃីម ភេទស្រី អាយុ ៥៨ឆ្នាំ រស់នៅក្នុងភូមិ ឃុំកើតហេតុខាងលើ ហើយសម្ភារខូចខាតក្រៅពីផ្ទះ០១ខ្នង ក្នុងនោះមានម៉ូតូចាស់ៗចំនួន ០២គ្រឿង និងសម្ភារក្នុងផ្ទះមួយចំនួនទៀត។
សេចក្តីរាយការណ៍ដដែលបានបញ្ជាក់ថា ករណីអគ្គិភ័យខាងលើនេះដែរបង្កឡើងដោយឈ្មោះ ណាត មករា ភេទប្រុស អាយុ ២៥ឆ្នាំ(ត្រូវជាកូនម្ចាស់ផ្ទះជាអ្នកដុត) ព្រមទាំងបានវាយម្តាយអោយរបួសត្រង់ខ្មងជើងខាងស្តាំ និងបាក់ដៃស្តាំ បែកក្បាលហើយក៏ដុតផ្ទះចោលតែម្តង។
ភ្លាមៗនោះដែរសមត្ថកិច្ចបានចេញរថយន្តពន្លត់អគ្គិភ័យចំនួន ០១ គ្រឿង និងបានប្រើប្រាស់ទឹកអស់ចំនួន ០១ឡានផងដែរដើម្បីគ្រប់គ្រងកុំអោយអណ្តាតភ្លើងឆេះរាលដាលទៅផ្ទះដទៃបាន។