បាត់ដំបង! ប្រជាកសិកររស់នៅក្នុងខេត្តបាត់ដំបង បានត្អូញត្អែរពីតម្លៃស្រូវឆ្នាំនេះធ្លាក់ថ្លៃនៅរដូវប្រមូលផល ខណៈដែលជី និងប្រេងសាំងឡើងថ្លៃ ប្រឈមនឹងមិនមានប្រាក់ចំណេញ។
ប្រជាកសិកររស់នៅក្នុងឃុំខ្នាចរមាស ស្រុកបវេល នៃខេត្តបាត់ដំបង នៅរសៀលថ្ងៃចុងសប្តាហ៍នេះ បានត្អូញត្អែរអោយដឹងដូចៗគ្នាថា តម្លៃស្រូវប្រភេទផ្ការំដួលឆ្នាំនេះបានធ្លាក់ថ្លៃជាបន្តបន្ទាប់រហូតជាង ១០លេខ នៅរដូវប្រមូលផល ធ្វើអោយពួកគាត់ប្រឈមការខាតបង់ និងមិនមានប្រាក់ចំណេញ ខណៈដែលជី និងប្រេងសាំងហក់ឡើងថ្លៃកប់ពពក។
ប្រជាកសិករដដែលបានបញ្ជាក់ថា ស្រូវប្រភេទផ្ការំដួលនៅរដូវប្រមូលផលឆ្នាំនេះ ប្រភេទស្រូវលេខ១ លក់បានក្នុងតម្លៃត្រឹមតែ០១តោន ៧៨ម៉ឺន និងចុះទៅដល់ ៧៣ម៉ឺន បើធៀបទៅនឹងរដូវប្រមូលផលដូចគ្នាទៅនឹងឆ្នាំមុន គឺចុះរហូតជាង ១០លេខ ដែលទូទាត់ថ្លៃជី ថ្លៃម៉ាស៊ីនច្រូតនិងថ្លៃប្រេងរួច សឹងតែមិនចង់មានប្រាក់ចំណេញ។
ជាមួយគ្នានេះពួកគាត់សំណូមពរទៅដល់មន្ត្រីជំនាញ ជាពិសេសថ្នាក់ដឹកនាំអោយជួយរកទីផ្សារជូនពួកគាត់ធ្វើយ៉ាងម៉េចអោយបានក្នុងតម្លៃចាប់ពី ៨០ ទៅ ៩០ម៉ឺនឡើងទើបសមរម្យ ដែលទូទាត់រួចនិងអាចសល់ប្រាក់ចំណេញខ្លះ។
ពាក់ព័ន្ធការលើកឡើងខាងលើមន្ត្រីជំនាញឃុំខ្នាចរមាស ក៏បានសំណូមពរនិងទទូចសុំឲ្យបងប្អូនប្រជាកសិករទាំងអស់ងាកមកលក់ស្រូវឲ្យសហគមន៍ឲ្យបានច្រើន ព្រោះលក់ស្រូវឲ្យសហគមន៍គេទទួលទិញទូលាយមិនកំណត់ចំនួន ហើយមានតម្លៃខ្ពស់ស្ថិតស្ថេរមិនឡើងចុះ មិនទម្លាក់ថ្លៃដូចឈ្មួញឡើយ ម្យ៉ាងទៀតសហគមន៍ជួយទិញស្រូវពីកសិករទោះជាស្រូវអន់បន្តិចក៏ជួយទិញក្នុងតម្លៃសមរម្យដែរ។
ចំណែកលោក ឈឹម វជ្ជរ៉ា ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តបាត់ដំបងបានប្រាប់ឲ្យដឹងដែរថា÷ ឆ្នាំនេះស្រូវដែលកសិករបង្កបង្កើនផលបានចំនួន ៣៩៧ ៦២៨ហិកតា នៃផែនការ ៣៣០ ០០០ហិកតា ក្នុងនោះស្រូវស្រាលកសិករដាំដុះបានចំនួន ២២៤ ៣៩៣ហិកតា, ស្រូវកណ្តាលចំនួន ១១៦ ៤៨៣ហិកតា និងស្រូវធ្ងន់ចំនួន ៥២ ៧២២ហិកតា ហើយការប្រមូលផលស្រូវរបស់ប្រជាកសិករនៅចំពោះមុខនេះគឺជាប្រភេទស្រូវបង្កើនរដូវ។
ដែលបច្ចុប្បន្នក្រុមឈ្មួញ និងក្រុមហ៊ុននានាប្រមូលទិញស្រូវសម្រាប់បម្រើការផ្គត់ផ្គង់ទៅក្រៅប្រទេស ធៀបនឹងរយ:ពេលដូចគ្នាតម្លៃស្រូវធ្លាក់ចុះបន្តិចដោយហាងឆេងទីផ្សារ។
