បាត់ដំបង! ក្រុមអាជីវករផ្សារបឹងឈូក ប្រមាណជិត ១០០នាក់ តំណាងអោយអាជីវករជាង ៥០០នាក់ បានផ្ទុះការតវ៉ាជាថ្មីដើម្បីស្នើរសុំអោយអាជ្ញាធរ ក៏ដូចជាឯកឧត្តម សុខ លូ អភិបាលខេត្ត ពិសេសឯកឧត្តម ច័ន្ទ សុផល អ្នកតំណាងរាស្ត្រមណ្ឌលខេត្តបាត់ដំបង ជួយដោះស្រាយអោយពួកគាត់បានលក់ដូរនៅកន្លែងដដែល ព្រោះពួកគាត់លក់ដូរនៅទីនោះជាង ២០មកហើយ។
ជាមួយការប្រមូលផ្តុំផ្ទុះការតវ៉ាជាថ្មីរបស់បងប្អូនអាជីវករផ្សារបឹងឈូក ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបងនេះដែរ ធ្វើឡើងនៅរសៀលថ្ងៃទី ២២ ខែវិច្ឆិកា ឆ្នាំ២០២១ នៅបរិវេណខាងមុខសាលាខេត្តបាត់ដំបង ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ក្នុងគោលបំណងដើម្បីស្នើអោយអភិបាលខេត្ត ក៏ដូចជាឯកឧត្តម ច័ន្ទ សុផល អ្នកតំណាងរាស្ត្រមណ្ឌលខេត្តបាត់ដំបង ជួយដោះស្រាយអោយពួកគាត់បានលក់ដូរនៅទីតាំងផ្លូវបេតុង ក្នុងបរិវេណផ្សារបឹងឈូកដដែល ដោយការស្នើសុំនេះបន្ទាប់ពីខាងរដ្ឋបាលខេត្តបានចេញលិខិតអោយពួកគាត់ផ្លាស់ប្តូរទីតាំងអាជីវកម្មរបស់ខ្លួនទៅលក់នៅទីផ្សារផ្សេង ដើម្បីអនុវត្តរៀបចំសណ្តាប់ធ្នាប់ របៀបរៀបរយ នៅផ្សារបឹងឈូក និងតំបន់ផ្សារបឹងឈូក ខណៈដែលពួកគាត់អ្នកខ្លះធ្លាប់លក់ដូរនៅទីនោះជាង១០ឆ្នាំ និងអ្នកខ្លះជាង២០ឆ្នាំមកហើយ តាំងតែពីកកើតផ្សារនេះឡើងមកម្លេះ ។
ក្រោយពីមានការប្រមូលផ្ដុំលើកឡើងរបស់ក្រុមអាជីវករមួយសន្ទុះក្រោយមក ខាងអាជ្ញាធររដ្ឋបាលខេត្តបាត់ដំបង បានចុះមកធ្វើការសម្របសម្រួលដោយតម្រូវអោយតំណាងអាជីវករចំនួន០៥នាក់ចូលទៅសាលាខេត្តដើម្បីពិភាក្សាររកដំណោះស្រាយ ប៉ុន្តែខាងអាជីវករមិនព្រម ដោយពួកគាត់ចង់បានវត្តមានឯកឧត្តម សុខ លូ អភិបាលខេត្តបាត់ដំបង ចេញមកនិយាយដោះស្រាយនៅចំពោះមុខពួកគាត់ទាំងអត់ ព្រោះពួកគាត់គិតថា ការចូលជួបជាច្រើនដងកន្លងមក មិនបានទទួលលទ្ធផលដូចអ្វីដែលពួកគាត់ស្នើសុំនោះទេ។
បន្ទាប់មកលោក យឹម សៀប អភិបាលរងខេត្ត បានចុះមកអន្តរាគមន៍ដោយស្នើសុំអោយអាជីវករវិលត្រឡប់ទៅផ្ទះវិញ ដោយលើកពេលចាំជួប ឯកឧត្តមអភិបាលខេត្តនៅរសៀលថ្ងៃស្អែកវិញ ព្រោះថ្ងៃនេះឯកឧត្តមអភិបាលជាប់ភារកិច្ចចុះទៅតាមស្រុក ភ្លាមនោះខាងអាជីវករក៏យល់ព្រមរំសាយដោយចាំមកនៅរសៀលថ្ងៃស្អែកបន្តទៀត។