ខេត្តបាត់ដំបង! កម្លាំងជំនាញផ្នែកប្រឆាំងគ្រឿងញៀននៃអធិការដ្ឋាននគរបាលក្រុងបាត់ដំបង បានចុះប្រតិបត្តិការបង្ក្រាបករណីរក្សាទុកដោយខុសច្បាប់នូវសារធាតុញៀន ០១ករណីក្នុងបទល្មើសជាក់ស្តែង។
លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបងបានអោយដឹងថា កិច្ចប្រតិបត្តិការនេះធ្វើឡើងនៅវេលាម៉ោង ១៥និង០០នាទី ថ្ងៃទី១២ ខែវិច្ឆិកា ឆ្នាំ២០២១ នៅចំណុចភូមិច្រាបក្រសាំង សង្កាត់វត្តគរ ក្រុងបាត់ដំបង ខេត្តបាត់ដំបង។
ជាមួយកិច្ចប្រតិបត្តិការនេះដែរជំហានដំបូងសមត្ថកិច្ចជំនាញបានធ្វើការឃាត់ខ្លួនជនសង្ស័យ ចំនួន០១នាក់ ឈ្មោះ អុិត ចាន់រិទ្ទ ហៅ ផ្លេះ ភេទប្រុស អាយុ៣០ឆ្នាំ មានទីលំនៅភូមិច្រាបក្រសាំង សង្កាត់វត្តគរ ក្រុងបាត់ដំបង ជាមួយនឹងវត្ថុតាងចាប់យកបានរួមមាន:
-ម្សៅក្រាមពណ៌សថ្លាច្រកក្នុងថង់ប្លាស្ទិកថ្លា ចំនួន០៥ថង់ សង្ស័យមានសារធាតុញៀន(ទម្ងន់ ១.៧៥ក្រាម ទាំងសំបក)
-ទូរស័ព្ទដៃ ចំនួន០១គ្រឿង
-ថង់ប្លាស្ទិកសម្រាប់ច្រករំលែកថ្នាំញៀនលក់មួយចំនួន។
ក្រោយឃាត់ខ្លួនជនសង្ស័យខាងលើ និងដោយមានការសម្របសម្រួលលើនីតិវិធីពី ឯកឧត្តម កែវ សុជាតិ ព្រះរាជអាជ្ញា នៃ អយ្យការ អមសាលា ដំបូង ខេត្ត បាត់ដំបងផងនោះ នៅវេលាម៉ោង១៥និង៤០ នាទីថ្ងៃដដែល សមត្ថកិច្ចបានបន្តឃាត់ខ្លួនជនសង្ស័យម្នាក់ទៀតឈ្មោះ ចេង ណាត ភេទប្រុស អាយុ ៣៤ឆ្នាំ នៅចំណុចភូមិកំពង់សីមា សង្កាត់វត្តគរ ក្រុងបាត់ដំបង ជាមួយវត្ថុតាងចាប់យកបានរួមមាន:
- កាំបិត ចំនួន០៤ដើម
- កាំភ្លើងកែច្នៃសប់ខ្យល់បាញ់គ្រាប់កង់ ចំនួន០១ដើម
- ម៉ូតូ០១គ្រឿង ម៉ាកយ៉ាម៉ាហា អុិចសាយទ័រ សេ១៥០ សេរីឆ្នាំ២០១៧ ពណ៌ខ្មៅ គ្មានស្លាកលេខ (ចាស់)
និងសំភារសម្រាប់ប្រើប្រាស់ថ្នាំញៀនមួយចំនួនទៀត។
ក្រោយពីឃាត់ខ្លួនជនសង្ស័យនិងវត្ថុតាងត្រូវបានសមត្ថកិច្ចនគរបាលក្រុងបាត់ដំបងកំពុងកសាងសំណុំរឿងបញ្ជូនបន្តទៅកាន់ការិយាល័យជំនាញនៃស្នងការដ្ឋាននគរបាលខេត្តបាត់ដំបងដើម្បីចាត់ការបន្តតាមផ្លូវច្បាប់៕