ភ្នំពេញ៖ ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ នៅក្នុងកិច្ចប្រជុំសាមញ្ញលើកទី៣០ របស់ក្រុមប្រឹក្សារាជធានីភ្នំពេញ នាព្រឹកថ្ងៃទី១១ ខែវិច្ឆិកានេះ បានសម្ដែងនូវការកោតសរសើរ ចំពោះអាជ្ញាធររាជធានីភ្នំពេញ កងកម្លាំងប្រដាប់អាវុធនិងអាជ្ញាធរ ខណ្ឌ សង្កាត់ទាំងអស់ ដែលបានពុះពារជំនះរាល់ការលំបាក ទាំងការទប់ស្កាត់បទល្មើសផ្សេងៗ ការរៀបចំសណ្ដាប់ធ្នាប់សាធារណៈពិសេសលើការទប់ស្កាត់នូវការរីករាលដាលជំងឺកូវីដ-១៩ បានយ៉ាងល្អប្រសើរ ដែលបានឈានទៅដល់ការចូលរួមបើកប្រទេសឱ្យដំណើរការជាប្រក្រតីឡើងវិញនាពេលបច្ចុប្បន្ននេះ។
ក្រៅពីនេះ ឯកឧត្តមម៉ប់ សារិន បានសម្តែងការគាំទ្រចំពោះ អាជ្ញាធររាជធានីភ្នំពេញលើការងារពន្ធដា ដែលបានប្រមូលចំណូលពន្ធ១០ខែកន្លងមកបានលើសផែនការនឹងបានលើកទឹកចិត្តអោយបន្តបង្កើនការប្រមូលចំណូលពន្ធពីរខែចុងឆ្នាំនេះឲ្យអស់លទ្ធភាពថែមទៀត ព្រោះនេះគឺជាចំណូលដ៏ធំរបស់រដ្ឋបាលរាជធានីភ្នំពេញ។
បន្ថែមពីលើនេះ ឯកឧត្តមប្រធានក្រុមប្រឹក្សាក៏បានវាយតម្លៃខ្ពស់ ចំពោះអាជ្ញាធរក៏ដូចជាកងកម្លាំងប្រដាប់អាវុធ ដែលបានបង្ក្រាបបទល្មើសផ្សេងៗ បានយ៉ាងល្អប្រសើរ ពិសេសគឺការយកចិត្តទុកដាក់បង្ក្រាបក្មេងទំនើងបាន ៤៧ករណី ឃាត់ខ្លួនជនពាក់ព័ន្ធបាន៦០នាក់។
ចំពោះការអភិវឌ្ឍហេដ្ឋារចនាសម្ព័ន្ធ រដ្ឋបាលរាជធានីភ្នំពេញ បានធ្វើការជួសជុលផ្លូវ លប់សំបុកមាន់បានច្រើនកន្លែង ច្រើនផ្លូវ ដើម្បីកាត់បន្ថយការកកស្ទះចរាចរណ៍និងគ្រោះថ្នាក់ចរាចរណ៍ ។
ការគ្រប់គ្រង បរិស្ថាន អនាម័យនិងការគ្រប់គ្រងសំណល់រឹង រដ្ឋបាលរាជធានីភ្នំពេញបានអនុវត្តបានយ៉ាងល្អប្រសើរ។
ក្នុងឱកាសនោះ ឯកឧត្តម ឃួង ស្រេងអភិបាលនៃគណៈអភិបាលរាជធានីភ្នំពេញបានលើកឡើងថា សម្រាប់រាជធានីភ្នំពេញនៅមានបញ្ហាប្រឈមជាច្រើនទៀត ដែលអាជ្ញាធរគ្រប់ផ្នែក បាននិងកំពុងយកចិត្តទុកដាក់ដោះស្រាយ និងបន្តគ្រប់គ្រងអោយបានល្អប្រសើរ ពិសេសបញ្ហាសំរាម នៅក្នុងដំណាក់ កាលចុងក្រោយនេះ ពោលគឺ ក្រោយពីបើកអោយមានការប្រកួតប្រជែង
ការប្រមូលសំរាមពីក្រុមហ៊ុនចំនួន៣នោះ ឃើញថា សំរាមនៅរាជធានីភ្នំពេញ មានលក្ខណៈល្អប្រសើរជាងមុន។
ឯកឧត្តម ឃួង ស្រេងបន្តថា គ្រប់កិច្ចការងារទាំងអស់ បើមិនមានការចូលរួមពីប្រជាពលរដ្ឋទេ គឺមិនអាចទទួលបានជោគជ័យឡើយ។ ដូច្នេះហើយទើប រដ្ឋបាលរាជធានីភ្នំពេញតែងធ្វើការផ្សព្វផ្សាយ ណែនាំដល់បងប្អូនប្រជាពលរដ្ឋធ្វើយ៉ាងណាអោយប្រជាពលរដ្ឋបានចូលរួមជាមួយអាជ្ញាធររាជធានីភ្នំពេញយើង។
ពាក់ព័ន្ធនឹងបញ្ហាសន្តិសុខ សណ្តាប់ធ្នាប់សាធារណៈ ការបង្ក្រាបបទល្មើសគ្រប់ប្រភេទអាជ្ញាធររាជធានីភ្នំពេញនឹងបន្តការខិតខំប្រឹងប្រែងបន្តទៀត ដើម្បីបង្កភាពកក់ក្តៅជូនប្រជាពលរដ្ឋនៅរាជធានីភ្នំពេញ។
គួរបញ្ជាក់ថា ទោះជាយ៉ាងណាក្តី អាជ្ញាធររាជធានីភ្នំពេញ នៅតែបន្តធ្វើយ៉ាងណា អោយបញ្ហាសំរាមនេះ មានភាពល្អប្រសើរជាងមុន ពិសេសធ្វើយ៉ាងណាអោយបងប្អូនប្រជាពលរដ្ឋទាំងអស់ចូលរួមលើការទុកដាក់សម្រាប់នេះឲ្យបានល្អប្រសើរ។
គួរបញ្ជាក់ថា ឯកឧត្តម ម៉ប់ សារិន ត្រូវបានប្រកាសឲ្យចូលកាន់តំណែងជាប្រធានក្រុមប្រឹក្សារាជធានីភ្នំពេញជាថ្មីម្ដងទៀត នៅក្នុងកិច្ចប្រជុំសាមញ្ញលើកទី៣០ របស់ក្រុមប្រឹក្សារាជធានីភ្នំពេញ នាព្រឹកថ្ងៃទី១១ខែវិច្ឆិកានេះ ជាមួយសមាជិក សមាជិការក្រុមប្រឹក្សាចំនួន២៦រូបទៀត៕