ព្រឹកថ្ងៃទី២៣ ខែសីហា ឆ្នាំ២០២១នេះ ឯកឧត្តម ហ៊ុន ម៉ានី និងលោកជំទាវព្រមទាំងក្រុមគ្រួសារបានអញ្ជើញប្រគល់កញ្ចប់ជំនួយដែលជាអំណោយរបស់ឯកឧត្តម និងលោកជំទាវព្រមទាំងសប្បុរសជននានា សម្រាប់ចែកជូនបងប្អូនប្រជាការពារ និងកងកម្លាំងប្រដាប់ក្នុងខណ្ឌទាំង១៤នៃរាជធានីភ្នំពេញ ប្រគល់ជូនឯកឧត្តមអភិបាលរាជធានីភ្នំពេញ និងលោកអភិបាលខណ្ឌទាំង១៤ នៅសាលារាជធានី។
អំណោយដែលបានរៀបចំជាកញ្ចប់រួចជាស្រេចនេះរួមមានក្នុងកញ្ចប់ មីជាតិ ១ កេស ត្រីខកំប៉ុង ១ យួរ ទឹកដោះគោខាប់ ៤ កំប៉ុង ឈុតថ្នាំដុសធ្មេញ និងសាប៊ូ និង ថវិកាមួយចំនួនផងដែរ សរុប ៣.០៧៥ កញ្ចប់។
ថ្លែងក្នុងពិធីប្រគល់អំណោយនេះផងដែរ ឯកឧត្តម ហ៊ុន ម៉ានី បានធ្វើការថ្លែងអំណរគុណដល់អាជ្ញាធរសាលារាជធានីគ្រប់ជាន់ថ្នាក់ ជាពិសេសក្រុមគ្រូពេទ្យ កងកម្លាំងប្រដាប់អាវុធ និងប្រជាការពារ ដែលបានខិតខំ មមាញឹក ទាំងថ្ងៃ យប់ បំពេញភារកិច្ចការពារសុវត្ថិភាពបងប្អូនប្រជាពលរដ្ឋ ជាពិសេសការទប់ស្កាត់ការឆ្លងរាលដាលក្នុសហគមន៍នៃជំងឺកូវីដ ១៩។
ឯកឧត្តមបានសង្កត់ធ្ងន់ថា៖ “កងកម្លាំង ដែលក្នុងនោះរួមមាន បងៗ ពូៗប្រជាការពារតាមខណ្ ឌសង្កាត់ មិនថាក្នុងដំណាក់កាលមុនកូវីដ ១៩ ក្នុងពេល កូវីដ ១៩ ឬតទៅមុខ គឺបានលះបង់កម្លាំងកាយ ពេលវេលាពីគ្រួសារ មិនថាថ្ងៃក្តៅ ភ្លៀង ឬថ្ងៃសម្រាក ហើយមិនថាក្នុងពេលស្ងប់ស្ងៀម ឬពេលចលាចលណាមួយក្នុងការអនុវត្តការងារដើម្បីជួយសម្រួលចរាចរណ៍ ថែរក្សាសណ្ដាប់ធ្នាប់ សុខសុវត្ថិភាព សុខដុមរមនា សម្រាប់ប្រជាជនក្នុងរាជធានីភ្នំពេញ។”
ជាមួយគ្នានេះដែរ ឯកឧត្តម ឃួង ស្រេង ក្នុងនាមរដ្ឋបាលរាជធានី និងមន្ត្រីរាជការ អាជ្ញាធរមូលដ្ឋាន និងកងកម្លាំងទាំងអស់សូបថ្លែងអំណរគុណដល់ ឯកឧត្តម ហ៊ុន ម៉ានី និង លោកជំទាវព្រមទាំងក្រុមគ្រួសារដែលជានិច្ចជាកាលតែងតែបានផ្តល់ការឧបត្ថម្ភជាបន្តបន្ទាប់ដល់រដ្ឋបាលរាជធានីភ្នំពេញ ជាពិសេស ក្នុងដំណាក់កាលនៃការផ្ទុះការឆ្លងរាលដាលនៃជំងឺកូវីដ ១៩។ កាយវិការដ៏ប្រពៃនេះបានបង្ហាញពីការយកចិត្តទុកដាក់ពីសំណាក់ថ្នាក់ដឹកនាំដែលបានផ្តល់ភាពកក់ក្តៅដល់មន្ត្រីរាជការ អាជ្ញាធរមូលដ្ឋាន កងកម្លាំង ក៏ដូចជា ប្រជាពលរដ្ឋទូទៅ។