រាជធានីភ្នំពេញ៖ ជំនន់ទឹកភ្លៀង បានហូរធ្លាក់ពីខេត្តកំពង់ស្ពឺ ធ្វើឱ្យស្ថានភាពទឹកស្ទឹងព្រែកត្នោតជន់ឡើងយ៉ាងឆាប់រហ័ស គួរឱ្យកត់សម្គាល់ ដោយមានការជន់លិចនៅផ្នែកខ្លះនៃតំបន់ទំនាបសណ្ដរស្ទឹងព្រែកត្នោត ក្នុងភូមិសាស្ត្រ ខណ្ឌដង្កោ រាជធានីភ្នំពេញ។
ឯកឧត្តម ឃួង ស្រេង អភិបាលរាជធានីភ្នំពេញ ក្នុងដំណើរចុះត្រួតពិនិត្យស្ថានភាពកម្ពស់ទឹកស្ទឹងព្រែកត្នោត ក្នុងភូមិសាស្ត្រ ខណ្ឌដង្កោ កាលពីព្រឹកថ្ងៃទី ២៤ ខែតុលា ម្សិលមិញ និយាយថា ដោយសារមានភ្លៀងធ្លាក់ខ្លាំង២ថ្ងៃជាប់គ្នា ទាំងក្នុងរាជធានីភ្នំពេញ និង បណ្ដាខេត្តមួយចំនួនទៀត នៅជាប់ព្រំប្រទល់នឹងរាជធានីនេះ ពិសេសខេត្តកំពង់ស្ពឺ ដែលជាតំបន់ខ្ពង់រាប បានធ្វើឱ្យទឹកហូរធ្លាក់យ៉ាងគំហុកមកក្នុងដងស្ទឹងព្រែកត្នោត។ ស្ថានភាពនេះ ធ្វើឱ្យទឹកស្ទឹងជន់ឡើងយ៉ាងឆាប់រហ័ស និងគួរឱ្យកត់សម្គាល់។
ឯកឧត្តម សូមអំពាវនាវដល់ប្រជាពលរដ្ឋ រស់នៅក្នុងតំបន់ទំនាបដីសណ្ដរស្ទឹងព្រែកតោ្នត បង្កើនការប្រុងប្រយ័ត្នខ្ពស់។ ជាពិសេសអ្នកដែលរស់នៅក្នុងភូមិសាស្ត្រសង្កាត់គងនយ សង្កាត់ទៀន សង្កាត់ស្ពានថ្ម សង្កាត់ព្រែកកំពឹស និងសង្កាត់រលួសនៃខណ្ឌដង្កោរ៕
