ខេត្តបាត់ដំបង៖ ពលករខ្មែរប្រុសស្រីចំនួនជាង១០០នាក់ ត្រូវបានសមត្ថកិច្ចថៃចាប់ប្រគល់ជូនមកអោយភាគីកម្ពុជាវិញ ក្រោយរកឃើញថាពួកគាត់ធ្វើចំណាកស្រុកខុសច្បាប់។
នគរបាលជំនាញបានប្រាប់ឲ្យដឹងនៅថ្ងៃទី ០៥ ខែវិច្ឆិកា នេះថា÷ កម្លាំងចម្រុះដែលមានវរសេនាតូចលេខ ៨១៩, កំលាំងប៉ុស្តិ៍អូរអន្លក់ ,កម្លាំងកងយោធភូមិភាគទី៥ និងកម្លាំងកងរាជអាវុធហត្ថស្រុក បានទទួលពលករខ្មែរចំនួន ១២៦នាក់ពីសមត្ថកិច្ចប្រទេសថៃ ក្រោយពួកគេពិនិត្យឃើញថាពលករខ្មែរខាងលើបានធ្វើចំណាកស្រុកដោយខុសច្បាប់។
ក្នុងចំណោមពលករខ្មែរទាំង ចំនួន១២៦នាក់ខាងលើក្នុងនោះមាន! ជាបុរសចំនួន ៦៨នាក់ ,ស្ត្រី ចំនួន ៤៧នាក់ និងក្មេងតូចៗចំនួន ១១នាក់ផងដែរ ដែលការប្រគល់ ទទួលនេះធ្វើឡើងនៅត្រង់ចំណុចច្រកអូរអន្លក់ ស្រុកកំរៀង ខេត្តបាត់ដំបង។
ក្រោយទទួលបានពលករខ្មែរទាំង១២៦នាក់ខាងលើត្រូវបានកម្លាំងគណ:បញ្ជាការកងឯកភាព រួមទាំងក្រុមគ្រូពេទ្យបានអនុវត្តត្រួតពិនិត្យវាស់កំដៅ និងធ្វើតេស្តសំណាករកជំងឺកូវីដ-១៩ ដែលជាលទ្ធផលពលករខ្មែរទាំង ១២៦នាក់ អវិជ្ជមានកូវីដ-១៩ទាំងអស់បន្ទាប់មកបានបញ្ជូនទៅធ្វេីចត្តាឡីស័ក នៅមណ្ឌលអូរល្វា ស្រុកសំពៅលូនរួចរាល់ផងដែរ៕
