នៅព្រឹក ថ្ងៃទី២៨ ខែកញ្ញា ឆ្នាំ២០២១នេះ មន្ត្រីនៃមន្ទីរសុខាភិបាលខេត្ត បានធ្វើតេស្តទៅលើអាជីវករចំនួន១៥០នាក់ ក្នុងចំណោម២៩៦នាក់ ស្រាប់តែរកឃើញវិជ្ជមានជំងឺកូវីដ ១៩ រហូតដល់៤៥នាក់នាក់។
អភិបាលរងខេត្តប៉ៃលិនលោក ចេង ញ៉ាន់ បានបញ្ជាក់ប្រាប់ភ្នាក់ងារយើងឱ្យដឹងនៅកន្លែងធ្វើតេស្តរកមេរោគកូវីដ ១៩ ថា ៖ ដោយសារតែអាជីវករទាំងអស់ ចង់ឱ្យខាងរដ្ឋបាលខេត្ត បើកផ្សារជូនពួកគាត់ចូលលក់ឡើងវិញ ក្រោយពីបិទទ្វារអស់រយ:ពេលជិត២ខែ ដោយ សារតែបញ្ហាអាជីវករកើតជំងឺកូវីដ ១៩ ទើបរដ្ឋបាលខេត្តសម្រេចចិត្ត ហៅអាជីវករទាំងអស់មកធ្វើតេស្តជាមុនសិន ដើម្បីរកមេរោគកូវីដ ១៩ លុះក្រោយពីមន្ត្រីសុខាភិបាលចាប់ផ្តើមពិនិត្យ ធ្វើតេស្តបានចំនួនប្រមាណ១៥០នាក់ ហើយរកឃើញអ្នកផ្ទុកមេរោគកូវីដ ១៩ រហូតដល់ទៅ៤៥នាក់ ។
ចំពោះអ្នកវិជ្ជមានជំងឺកូវីដ ១៩ទាំង៤៥នាក់នោះ ត្រូវបានរដ្ឋបាលខេត្តបញ្ជូនទៅព្យាបាលតាមផ្ទះរបស់ខ្លួន តែដាក់នៅដោយឡែកពីសមាជិកគ្រួសារ ដោយមានការតាមដានពីក្រុមគ្រូពេទ្យ។
បញ្ជាក់ផ្សារសាមគ្គីហៅផ្សារ(ប៉ាហ៊ី)នេះកន្លងមកបានបិទចំនួន២លើករួចមកហើយដោយចុងក្រោយបើកនៅថ្ងៃទី៦ខែកញ្ញាឆ្នាំ២០២១នេះពោលគឺទើបបើកបានជាង២០ថ្ងៃប៉ណ្ណុះ តែបើកឲ្យលក់តែផ្នែកខាងលើទេចំណែកផ្នែកខាងក្រោយកន្លែងលក់បន្លែត្រីសាច់នៅបិតរហូតដល់បច្ចុប្បន្ន៕
