ខេត្តបាត់ដំបង! ក្មេងស្រីក្រមុំ ០១នាក់បានរអិលជើងធ្លាក់ចូលក្នុងទឹកប្រឡាយគ្រាដែលខ្លួនមិនចេះហែលបណ្តាលអោយលង់ ស្លាប់ពេលបញ្ជូនទៅដល់មន្ទីរពេទ្យ។
លោកវរសេនីយ៍ឯក សុខ សារិន អធិការនគរបាលស្រុកបវេល បានបញ្ជាក់ឲ្យដឹងថា÷ ករណីលង់ទឹកបណ្តាលអោយមានមនុស្សស្លាប់ខាងលើនេះបានកើតឡើងកាលពីរសៀលថ្ងៃទី ០៦ ខែសីហា ឆ្នាំ ២០២១ នៅត្រង់ចំណុចប្រឡាយមានល័ក្ខ ស្ថិតនៅក្នុងឃុំបវេល ស្រុកបវេល ខេត្តបាត់ដំបង។
ស្ត្រីក្រមុំជាជនរងគ្រោះមានឈ្មោះ គេន ឃីម អាយុ ១៨ឆ្នាំ រស់នៅភូមិបវេល១ ឃុំបវេល ស្រុកបវេល ខេត្តបាត់ដំបង ដែលនៅថ្ងៃកើតហេតុជនរងគ្រោះជាមួយមិត្តភ័ក្តជាច្រើននាក់បាននាំគ្នាទៅលេងបាល់នៅលើដងផ្លូវក្បែរមាត់ប្រឡាយកន្លែងកើតហេតុខាង គ្រាដែលស្ត្រីរងគ្រោះលោតហក់ចាប់គ្រាប់បាល់ ភ្លាមនោះក៏បានរអិលជើងធ្លាក់ចូលក្នុងប្រឡាយទឹកជ្រៅលិចបាត់តែម្តង ។
លោកអធិការបានបញ្ជាក់បន្ថែមថា នៅពេលកើតហេតុភ្លាមៗ ក្រុមគ្រួសារមិត្តភក្តិបាននាំគ្នាចុះរាវរកយ៉ាងយូរទើបប្រទះឃើញជនរងគ្រោះដោយនៅមានជីបចរ ភ្លាមនោះក៏បានលើកដាក់រថយន្តដឹកបញ្ជូនទៅសង្គ្រោះនៅឯមន្ទីរពេទ្យ តែជាអកុសលនៅពេលដឹកបញ្ជូនដល់មន្ទីរពេទ្យ ជនរងគ្រោះបានផុតដង្ហើមស្លាប់បាត់ទៅហើយ។
ក្រោយមកសមត្ថកិច្ចមូលដ្ឋានបានចុះទៅពិនិត្យបង្ហាញថាជនរងគ្រោះពិតជាបានស្លាប់ដោយសារលង់ទឹកពិតប្រាកដមែន រួចបានប្រគល់សាកសពទៅឲ្យសាច់ញាតិដើម្បីយកទៅរៀបចំធ្វើបុណ្យតាមប្រពៃណី៕
