ខេត្តបាត់ដំបង! ក្នុងកិច្ចប្រជុំចុងបញ្ចប់នៃបេសកកម្មរបស់ក្រុមការងារសម្តេចតេជោហ៊ុនសែន និងសម្តេចកិត្តិព្រឹទ្ធបណ្ឌិត ប៊ុន រ៉ានី-ហ៊ុនសែន ដឹកនាំដោយនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង នៃ កងយោធពលខេមរភូមិន្ទនិងជានាយករងខុទ្ទកាល័យសម្ដេចតេជោហ៊ុន សែន ជាមួយនិងអាជ្ញាធរនៃរដ្ឋបាលខេត្តបាត់ដំបង និងថ្នាក់ដឹកនាំបណ្តាមន្ទីរសំខាន់ៗនិងមន្ទីរជំនាញពាក់ព័ន្ធក្នុងខេត្ត នៅឯទីស្នាក់ការទីលានបាល់ទាត់នៃវាលបែកចាន ក្រុងបាត់ដំបង នារសៀលថ្ងៃទី៣០ ខែសីហា ឆ្នាំ២០២១នេះជាលទ្ធផលពិនិត្យឃើញថារយៈពេលជិត០២សប្តាហ៍មកនេះ ក្រុមការងារសម្តេចតេជោហ៊ុនសែន និង សម្តេចកិត្តិព្រឹទ្ធបណ្ឌិត បានចុះប្រមូលទិញផ្លែមៀន “តាង៉ែន”ពីកសិករបានជិត០២ពាន់តោន។
ដោយក្នុងកិច្ចប្រជុំបូកសរុបវាយតម្លៃពីលទ្ធផលការងាររួមនៅក្នុងបេសកកម្មនៃយុទ្ធនាការក្នុងការចុះប្រមូលទិញផ្លែមៀន”តាង៉ែន” ដែលកំពុងផ្លែទុំ របស់បងប្អូនប្រជាកសិករ នៅក្នុងខេត្តបាត់ដំបង ដែលកន្លងមកនេះ បានប្រឈមនិងការខ្វះទីផ្សារលក់ដូរទៅប្រទេសថៃ និងគ្មានឈ្មួញថៃចុះមកបញ្ជាទិញដោយសារតែប្រទេសថៃ កំពុងតែជួបវិបត្តិអត់ទីផ្សារក្នុងការនាំផ្លែមៀន”តាង៉ែន” ទៅកាន់ទីផ្សារនៅប្រទេសចិនបាន ហើយក្រោយពីការចុះប្រមូលទិញអស់ពីចម្ការ របស់ប្រជាកសិករផ្ទាល់ដោយមិនមាននៅសេសសល់ផ្លែមៀន”តាង៉ែន” ទុំនៅតាមចម្ការ ទៀតនោះទេ។
របាយការណ៍ក្នុងកិច្ចប្រជុំនេះ បានបញ្ជាក់យ៉ាងច្បាស់ឲ្យដឹងថា៖ចាប់ពីថ្ងៃដំបូង នៅថ្ងៃទី១៧ ខែសីហា ឆ្នាំ២០២១នៃការបើកយុទ្ធនាការក្នុងការចុះប្រមូលទិញនេះ មកទល់រសៀល ថ្ងៃទី៣០ ខែសីហា ឆ្នាំ២០២១ ដែលជាថ្ងៃបញ្ចប់នូវយុទ្ធនាការខាងលើនេះ ក្នុងនោះក្រុមការងាររបស់សម្តេចទាំងទ្វេ បានចុះប្រមូលទិញផ្លែមៀនតាង៉ែននៅតាមបណ្តាស្រុកគោលដៅទាំង៦ និងបណ្តាស្រុកនានា នៅក្នុងខេត្តក្នុងនោះការប្រមូលទិញសរុបចំនួន ១.៧៧៨តោន ដោយក្នុងនោះបានចុះទិញដល់ចម្ការ សរុបចំនួន ១.០០០តោន។
ស្រុកគោលដៅ ដែលចុះទៅទិញរួមមាន៖ ស្រុករតនមណ្ឌល, ស្រុករុក្ខគីរី,ស្រុកភ្នំព្រឹក, ស្រុកសំពៅលូន, ស្រុកកំរៀង, ស្រុកសំឡូត និងស្រុកបាណន់ រួមនិងបណ្តាស្រុកនានាមួយចំនួនផងដែរ។