ខេត្តបាត់ដំបង! កម្លាំងនៃអធិការដ្ឋាននគរបាលស្រុកបាណន់បានចុះប្រតិបត្តិការបង្ក្រាបទីតាំងលួចលាក់បើកសង្វៀនល្បែងភ្នាល់ប្រជល់មាន់មួយកន្លែង ឃាត់ខ្លួនអ្នកប្រព្រឹត្តិចំនួន០៦នាក់ ដកហូតវត្ថុតាងពាក់ព័ន្ធមួយចំនួនផងដែរ។
លោក វរសេនីយ៍ឯក ប៉ាន់ វណ្ណនី អធិការនគរបាលស្រុកបាណន់ បានប្រាប់ឲ្យដឹងនៅរសៀលថ្ងៃទី ២៨ ខែកក្កដា ឆ្នាំ ២០២១នេះថា ជាមួយកិច្ចប្រតិបត្តិការបង្ក្រាបទីតាំងលួចលេងល្បែងស៊ីសងភ្នាល់ជល់មួយកន្លែងខាងលើនេះ បានធ្វើឡើងនៅត្រង់ចំណុចភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង។
ការចុះបង្ក្រាបបទល្មើសជាក់ស្តែងខាងលើនេះនគរបាលជំនាញបានឃាត់ខ្លួនអ្នកពាក់ព័ន្ធចំនួន ០៦នាក់មានឈ្មោះ ,ខាន់ សុខេង ភេទប្រុស អាយុ ៣៣ឆ្នាំ, ឈ្មោះ ងួន ប៊ុនហ៊ា ភេទប្រុស អាយុ ៥១ឆ្នាំ, ឈ្មោះ គឹម ពិសិដ្ឋ ភេទប្រុស អាយុ ៣៨ឆ្នាំ, ឈ្មោះ ឈាង ប្រុស ភេទប្រុស អាយុ ៣៧ឆ្នាំ, ឈ្មោះ ផេង ពី ភេទប្រុស អាយុ ៤០ឆ្នាំ និងឈ្មោះ ឈៀត ស៊ីណា ភេទប្រុស អាយុ ៣៩ឆ្នាំ ទាំងអស់គ្នារស់នៅក្នុងឃុំវត្តតាមឹម ឃុំចែងមានជ័យ ឃុំឈើទាល ឃុំស្នឹង នៃខេត្តបាត់ដំបង។
លោកអធិការបន្តថា, សម្ភារ:ដែលដកហូតបានរួមមាន ! -មាន់ជល់ ចំនួន០១ក្បាល , ម៉ូតូចំនួន០៥គ្រឿង , ជញ្ជីងថ្លឹងមាន់ ចំនួន០១គ្រឿង និងសម្ភារ:ផ្សេងៗមួយចំនួនទៀត។
ក្រោយពីឃាត់ខ្លួន អ្នកទាំង០៦នាក់ត្រូវបាននគរបាលជំនាញមូលដ្ឋានបានណែនាំអប់រំធ្វើកិច្ចសន្យាឲ្យបញ្ឈប់ និងបានណែនាំពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ ដើម្បីចូលរួមជាមួយក្រសួងសុខាភិបាល ក៏ដូចជារាជរដ្ឋាភិបាល រួចអោយវិលត្រឡប់ទៅលំនៅដ្ឋានវិញរៀងៗខ្លួនផងដែរ៕
