ទិវាមួយម៉ោងសម្រាប់ភពផែនដី មានន័យថា ពលរដ្ឋនៅទូទាំងពិភពលោក រួមទាំងនៅកម្ពុជាផង ចូលរួមបិទភ្លើងមួយម៉ោង ដើម្បីជួយទ្រទ្រង់ធម្មជាតិ សម្រាប់ប្រធានបទ នៃទិវាមួយម៉ោងសម្រាប់ភពផែនដីឆ្នាំនេះគឺ«ផ្តល់ក្តីស្រឡាញ់ ដល់ធម្មជាតិ» ដែលនឹងប្រារព្ឋធ្វើឡើងជារៀងរាល់ឆ្នាំ នៅថ្ងៃទី២៧មីនា។
នៅម៉ោង ៨:៣០ យប់ថ្ងៃទី២៧ ខែមីនា ឆ្នាំនេះ អ្នកអាចចូលរួមបិទភ្លើងមួយម៉ោងដើម្បីភពផែនដី និងសាកល្បងបទធិសោធន៍ រៀបចំពិសារអាហារពេលល្ងាច ក្រោមពន្លឺភ្លើងទៀន ជាមួយក្រុមគ្រួសាររបស់អ្នក។ រឿងមួយទៀត ដែលអ្នកអាចធ្វើបានសម្រាប់បង្ហាញក្តីស្រឡាញ់ចំពោះធម្មជាតិ គឺកាត់បន្ថយការប្រើប្រាស់ក្រដាសការិយាល័យ ដើម្បីចូលរួមថែរក្សាព្រៃឈើនិងធម្មជាតិ។
អង្គការWWF Cambodia នឹងរៀបចំកិច្ចពិភាក្សាមួយ តាមប្រព័ន្ឋអនឡាញ ដើម្បីស្វែងយល់អំពីប្រធានបទនេះបន្ថែមទៀត ដែលនឹងចាក់ផ្សាយផ្ទាល់លើទំព័រហ្វេសបុក Earth Hour Cambodia នៅម៉ោង ៧.០០ ល្ងាច ថ្ងៃសៅរិ៍ ទី ២៧ ខែមីនា ឆ្នាំ២០២១។
កាលពីឆ្នាំ២០០៧ ប្រទេសអូស្ត្រាលី ជាប្រទេសដំបូងគេបង្អស់ ដែលរៀបចំទិវាមួយម៉ោងសម្រាប់ភពផែនដី។ បន្ទាប់មកប្រទេសនៅលើពិភពលោក ក៏បានចាប់ផ្តើមធ្វើជាបន្តបន្ទាប់ និងមានការចូលរួមយ៉ាងទូលំទូលាយ មកដល់ពេលនេះ។ បើគិតមកដល់ឆ្នាំ២០២១នេះ មានរយៈពេល១៤ឆ្នាំហើយ ដែលអូស្ត្រាលី ប្រទេសលើពិភពលោក រួមទាំងកម្ពុជាផង បានរៀបចំទិវាមួយម៉ោងសម្រាប់ភពផែនដី៕
