លោក សុវណ្ណ ពិសេដ្ឋ អភិបាលស្រុកសេសាន ខេត្តស្ទឹងត្រែង បានប្រកាសឱ្យប្រជាពលរដ្ឋរស់នៅតាមដងទន្លេសេសាន និងទន្លេ ស្រែពក ខាងលើទំនប់វារី អគ្គិសនីសេសានក្រោមពីរ ត្រូវត្រៀមលក្ខណៈប្រុង ប្រយ័ត្ន ក្នុងពេលដែលរដ្ឋបាលខេត្តរតនគិរីបានចេញសេចក្តីប្រកាសពីករណីជំនន់ទឹកភ្លៀងបានជន់លិចនៅមូល ដ្ឋានរស់នៅរបស់ប្រជាពលរដ្ឋមួយចំនួន ក្នុងស្រុកលំផាត់ខេត្តរតនគិរី និងបន្តមកជន់លិច ដល់ឃុំក្បាលរមាសនិងនៅឃុំតាឡាតមួយចំនួនទៀត។
ក្នុងសកម្មភាពចុះពិនិត្យ ការរស់នៅរបស់ប្រជាពលរដ្ឋ នៅភូមិក្របីជ្រុំឃុំក្បាលរមាស និងភូមិស្វាយរៀងឃុំតាឡាតស្រុកសេសានខេត្តស្ទឹងត្រែង ថ្ងៃទី១៩ តុលាឆ្នាំ ២០២១ នេះ លោកអភិបាលស្រុកបានជូនព័ត៌មាននេះឱ្យប្រជាពល រដ្ឋត្រូវត្រៀមទូក ច្រវានិងមើល ថែមនុស្សមានវ័យចំណាស់ កុមារតូច ចៀសវាងកុំឱ្យកើត មាននូវករណីគ្រោះថ្នាក់ដោយយថាហេតុណាមួយដោយ សារជំនន់ទឹកភ្លៀងនេះ។
លោកបានអំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះសត្វមានពិសទិចឬខាំ និងចៀសវាងកុំឱ្យកុមារតូចជិះទូកឬលេងទឹកជាដើមដើម្បីយើងបង្ការគ្រោះថ្នាក់ទាំង អស់គ្នា។ បើបងប្អូនក្រុមគ្រួសារប្រជាពលរដ្ឋណារងផលប៉ះពាល់ ពិនិត្យមើលស្ថានភាពទឹកនេះ អាចលិចចូលដល់ក្នុងផ្ទះ ត្រូវរាយ ការណ៍មកអាជ្ញាធរមូលដ្ឋានដើម្បីជម្លៀសទៅរកទីទួលសុវត្ថិភាពបញ្ចៀសនូវគ្រោះ ថ្នាក់ឱ្យខានតែបាន។
លោក រឿន សម្បត្តិ មេឃុំក្បាលរមាសបានបញ្ជាក់ថា ព័ត៌មាននេះលោកបានជម្រាបជូនដល់ប្រជាពលរដ្ឋ ដែលងាយរងគ្រោះជាពិសេសបង ប្អូនដែលរស់នៅតាមជួរដង ទន្លេស្រែពក ទន្លេសេសានក្នុងឃុំក្បាលរមាសបានជ្រាបជាដំណឹងរួចហើយ។
លោកបានបន្តថា កត្តាប្រឈមនេះ អាជ្ញាធរមូលដ្ឋានបានដាក់កម្លាំងប្រចាំការ មានមន្ត្រីប៉ុស្តិ៍រដ្ឋបាល ប្រជាការពារ អាជ្ញាធរភូមិ នៅតាមគោលដៅដែលងាយរងគ្រោះដើម្បីពិនិត្យមើលសភាពការ ណ៍ជាក់ស្ដែង ប្រសិនបើមានករណីប្រឈមណាមួយក្រុម ការងារនឹងជួយគ្នាទៅវិញទៅ មកដើម្បីសង្គ្រោះប្រជាពលរដ្ឋយើងឱ្យរួចផុតពីគ្រោះថ្នាក់ចៀសវាងកុំឱ្យមានបញ្ហាប្រឈមកើតឡើងដោយសារជំនន់ទឹកភ្លៀងនេះ។
សូមបញ្ជាក់ថា ស្រុកសេ សានមានឃុំក្បាលរមាសនិងឃុំតាឡាត បានរងគ្រោះដោយសារជំនន់ទឹកភ្លៀងហូរធ្លាក់ពីទន្លេស្រែពកមកដោយ សារព្យុះទី៨ រងផលប៉ះពាល់និងមានភ្លៀងធ្លាក់ រយៈពេលមួយសប្តាហ៍កន្លងមកបច្ចុប្បន្នស្ថានភាពទឹកកំពុងតែបន្តឡើងនៅឡើយ ៕
ក្រសួងព័ត៌មាន
