ខេត្តបាត់ដំបង! អង្គការក្រុមការងារដើម្បីដោះស្រាយទំនាស់(ACT) បានដឹកនាំសិក្ខាកាមដែលជាបណ្តាញសារព័រត៌មាន និងសហគមន៍ប្រមាណចំនួន ២៧នាក់មកពីបណ្តា០៦ខេត្តនិងរាជធានី មានខេត្តសៀមរាប .ខេត្តបាត់ដំបង .ខេត្តកំពង់ឆ្នាំង .ខេត្តមណ្ឌលគិរី .ខេត្តកំពង់សោម និងរាជធានីភ្នំពេញ មកចុះទស្សនកិច្ចស្វែងយល់ និងផ្សព្វផ្សាយស្តីពីការអភិវឌ្ឍន៍ក្នុងសហគមន៍នានានៅក្នុងភូមិសាស្ត្រស្រុកសំឡូត នៃខេត្តបាត់ដំបង។
កញ្ញា ស្រី សុធាវី នាយិកាប្រតិបត្តិ(ACT) បានបញ្ជាក់ថា គោលបំណងដែលកញ្ញាដឹកនាំសិក្ខាកាមចុះទស្សនៈកិច្ចសិក្សារយះពេលបីថ្ងៃ គិតចាប់ពីថ្ងៃទី ២៦.២៧.២៨ ខែវិច្ឆិកា ឆ្នាំ២០២១នេះ គោលបំណងគឺដើម្បីអោយសិក្ខាកាមទាំងអស់ចូលរួមផ្សព្វផ្សាយស្តីពីការ អភិវឌ្ឍន៍នៅក្នុងសហគមន៍ផ្សេងៗ ហើយខាង(ACT)សង្ឃឹមថាពេលត្រឡប់ទៅវិញទាំងខាងអ្នកសារព័ត៌មាន និងទាំងខាងសហគមន៍ និងអាចប្រើប្រាស់ប្រព័ន្ធផ្សព្វផ្សាយរបស់ខ្លួនក្នុងការរួមចំណែកអភិវឌ្ឍន៍ប្រទេសជាតិ តាមរយៈការចូលរួមចំណែកពីប្រជាសហគមន៍នៅតំបន់នេះក៏ដូចជាសហគមន៍ដែលមកពីមណ្ឌលគិរីនិងខេត្តផ្សេងៗដែលមករៀនសូត្រហើយនិងយកចំណេះដឹងទាំងនេះទៅអភិវឌ្ឍន៍សហគមន៍របស់ខ្លួន អោយដូចទៅអ្វីដែលគាត់បានមកសិក្សារៀនសូត្រនៅក្នុងសហគមន៍នេះដែរ។
កញ្ញាបន្តថា ការជួយផ្សព្វផ្សាយបន្តពីស្ថានភាពសហគមន៍គឺជាផ្នែកមួយនៃការរួមចំណែកបង្ហាញអោយដឹងអំពី សហគមន៍របស់យើងថាគួររួមចំណែកយ៉ាងម៉េចគាំទ្រសហគមន៍ដទៃទៀតអោយមានភាពរីកចំរើនដូចជាសហគមន៍នៅក្នុងស្រុករបស់យើង ដោយយើងលើកទឹកចិត្តក្នុងការផ្សព្វផ្សាយនូវអ្វីដែលជាព័ត៌មាន ឬក៏ជាសារបែបសន្តិភាពរួមចំណែកក្នុងការអភិវឌ្ឍ ដែលជាទូទៅក្រុមការងារអង្គការដោះស្រាយទំនាស់បានបណ្តុះបណ្តាលពង្រឹងសមត្ថភាពដល់អ្នកសារព័ត៌មាននៅក្នុងការអនុវត្តវិជ្ជាជីវអោយសមស្របទៅតាមក្រមសីលធម៌នៃអ្នកសារព័ត៌មាន ដើម្បីរួមចំណែកលុបបំបាត់សារព័ត៌មានបែបហិង្សា ព្រោះកាលណាយើងប្រើប្រាស់ព័ត៌មានបែបបំភ្លឺស ឬនិយាយនិយមទៅលើអ្នកណាម្នាក់ដែលគាត់មានអំណាចវាធ្វើអោយព័ត៌មានរបស់យើងមិនបានគ្រប់ជ្រុងជ្រោយប្រកបដោយតម្លាភាពនោះទេ។
ជាមួយគ្នានោះដែរលោក ឌុក ម៉េង ប្រធានសហគមន៍កញ្ចាំង និងលោក សេង សាម័យ នាយសង្កាត់រដ្ឋបាលព្រៃឈើស្រុកសំឡូត បានអោយដឹងថា នៅស្រុកសំឡូតគឺមានសហគមន៍ចំនួន ១៤ ដែលជាសហគមន៍ព្រៃឈើ គ្រប់គ្រងដោយក្រសួងកសិកម្មរុក្ខាប្រមាញ់និងនេសាទ ដោយមានការចុះមើលផ្ទាល់ពីមន្ត្រីមូលដ្ឋានរបស់សង្កាត់ព្រៃឈើប្រចាំការនៅក្នុងស្រុកសំឡូត ដោយបានដាក់ផែនការចុះល្បាតជាទៀងទាត់រៀងរាល់ក្នុងមួយខែពីរដង ឬមួយដងផងដែរ។ ជាក់ស្តែងនៅសហគមន៍កញ្ចាំង ស្ថិតក្នុងភូមិកញ្ចាំង ឃុំស៊ុង ស្រុកសំឡូតនេះ គឺមានផ្ទៃដីចំនួន ៤០០ហិកតា ដោយចែកចេញជាប្លុកៗផ្សេងៗ ហើយក្នុងនោះក៏មានបញ្ហាប្រឈមខ្លះៗដោយសារការយល់ដឹងរបស់ប្រជាពលរដ្ឋនៅមានកំរិតតែងឆ្លៀតឱកាសលួចកាប់ទន្ទ្រាននិងឈូសឆាយយកកន្ទុយដីដែលនៅជាប់និងដីសហគមន៍ ប៉ុន្តែក្រោយមកគាត់មានការយល់ដឹងក៏បានប្រគល់មកអោយខាងសហគមន៍វិញ។
ជាចុងក្រោយលោកនាយសង្កាត់ក៏បានអំពាវនាវដល់ប្រជាពលរដ្ឋដែលរស់នៅក្នុងស្រុកសំឡូតទាំងអស់ ជាពិសេសនៅតាមបណ្ដាភូមិដែលមានសហគមន៍ គឺមានតែបងប្អូនទេដែលជាអ្នកថែរក្សាដើម្បីជួយខ្លួនឯងវិញ និងមួយវិញទៀតសូមជួយថែរក្សានូវអ្វីដែលយើងមានចាស់មិនអោយធ្វើចូលដល់ដី សហគមន៍ទៀតទេ គឺយើងទុកព្រៃដើម្បីប្រកបរបរ ឬទុកអោយក្មេងជំនាន់ក្រោយបានឃើញ។