លោក ញ៉ែម សៅគ្រី ប្រធានមន្ទីរព័ត៌មានខេត្តព្រៃវែង បានឱ្យទីភ្នាក់ងារសារព័ត៌មានកម្ពុជា (AKP) ដឹងនៅព្រឹកថ្ងៃទី២៤ ខែមីនា ឆ្នាំ២០២១នេះថា គិតចាប់ពីថ្ងៃទី១៧ ដល់ ថ្ងៃទី២៣ ខែមីនា ២០២១ ម្សិលមិញនេះ មានករណីសត្វស្លាប (ភាគច្រើនជាសត្វរនាលខ្យង) នៅតំបន់បឹងស្នេហ៍ ខេត្តព្រៃវែង បានស្លាប់ជិត១ពាន់ក្បាលហើយ ដោយឡែកចំពោះមូលហេតុនៃការស្លាប់របស់សត្វទាំងនោះ លោកប្រធានមន្ទីរ បានបញ្ជាក់ថា បើតាមប្រធានសហគមន៍ទួលពាន់តាឡី តំបន់បឹងស្នេហ៍ បានដាក់ការសន្និដ្ឋានបឋមថា សត្វស្លាបដែលបានស្លាប់នោះ គឺបណ្តាលមកពីពុលថ្នាំបាញ់ខ្យង ដែលប្រជាពលរដ្ឋបានបាញ់ក្នុងស្រែ ដើម្បីការពារស្រូវរបស់ពួកគាត់។
បន្ទាប់ពីទទួលដំណឹងពីសហគមន៍ទួលពាន់តាឡី ប្រចាំនៅតំបន់បឹងស្នេហ៍ ក្រុមការងារនៃអាជ្ញាធរ និងមន្ទីរពាក់ព័ន្ធ ខេត្តព្រៃវែង បានចុះទៅដល់ទីតាំង ដើម្បីប្រមូលវត្ថុសំណាក ដើម្បីបញ្ជាក់ពីមូលហេតុពិតប្រាកដនៃការស្លាប់ និងបានដុតសត្វស្លាបទាំងនោះនៅនឹងកន្លែងតែម្តង។
សូមបញ្ជាក់ថា ដោយតំបន់អភិរក្សទួលពាន់តាឡី បឹងស្នេហ៍ ស្ថិតនៅស្រុកបាភ្នំ ខេត្តព្រៃវែង គឺមានផ្ទៃដីធំល្វឹងល្វើយ រហូតដល់ ៨២ហិកតា ឯណោះ ហើយក្រុមការងារបានប្រមែប្រមូល តាមកន្លែងដែលបានទៅដល់តែប៉ុណ្ណោះ ហើយនៅថ្ងៃទី២៣ ខែមីនា ឆ្នាំ២០២១ ក្រុមមន្ត្រីជំនាញអគ្គនាយកដ្ឋាន សុខភាពសត្វ និងផលិតកម្មសត្វ មន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង មន្ត្រីនៃមន្ទីរបរិស្ថានខេត្ត លោកអភិបាលស្រុកបាភ្នំ រួមជាមួយកម្លាំងកងរាជអាវុធហត្ថស្រុក ប្រជាសហគមន៍ បានចុះប្រមូលយកសំណាកវត្ថុវិភាគបន្ថែម និងប្រមូលសត្វដែលបានស្លាប់បាន ១២៥ក្បាល ដើម្បីអនុវត្តវិធានការដុតកំទេចចោល និងបានបាញ់ថ្នាំសម្លាប់មេរោគនៅទីតាំងនោះបានមួយចំនួន ក្នុងនោះដែរ អាជ្ញាធរស្រុកបានចាត់វិធានការបិទតំបន់នោះ មិនឱ្យប្រជាពលរដ្ឋ និងអ្នកទស្សនាសត្វ ចូលទៅទីនោះបន្តទៀតទេ៕
