ខេត្តប៉ៃលិន ៖ មានករណីភ្លៀងមួយមេធំលាយឡំដោយខ្យល់កន្ត្រាក់ បណ្តាលឲ្យប៉ើងដំបូលស័ង្កសី ប៉ះពាល់ផ្ទះប្រជា ពលរដ្ឋចំនួន០៣ខ្នង ។ តែមិនបណ្តាលឱ្យមនុស្សណាម្នាក់រងរបួសនោះទេ ។
ហេតុការណ៍នេះបានកើតឡើងកាលពីវេលាម៉ោង០៣ និង៣០នាទីរសៀលថ្ងៃទី០៨ ខែមីនា ឆ្នាំ២០២១ ។
ប្រភពព័ត៌មានបានឱ្យដឹងថា ៖ មុនពេលកើតហេតុ គេឃើញមេឃខ្មៅងងឹតនៅទិសខាងលិច ស្រាប់តែមួយស្របក់ក្រោយមក បង្កទៅជាភ្លៀងមួយមេយ៉ាងធំ លាយឡំដោយផ្គរលាន់ គួរឱ្យខ្លាច ស្រាប់តែបក់បោកប៉ើងដំបូលផ្ទះប្រជាពលរដ្ឋខាងលើតែម្តង ។
ប្រភពបន្តទៀតថា ៖ ផ្ទះប្រជាពលរដ្ឋដែលរងគ្រោះ មានម្ចាស់ ទី១. ឈ្មោះ ជួន ប៉ែត ភេទប្រុស អាយុ៥២ឆ្នាំ ប៉ើងដំបូលផ្នែកខាងមុខ ខូចស័ង្កសី អស់ចំនួន០៩សន្លឹក ទី២. ឈ្មោះ ដួង ផូ ភេទប្រុស អាយុ៥៦ឆ្នាំ ត្រូវខ្យល់បក់ប៉ើងរមូរស័ង្កសីចំនួន០៦សន្លឹក ទាំងពីរនាក់រស់នៅភូមិស្រែអន្ទាក់ ឃុំស្ទឹងត្រង់ ស្រុកសាលាក្រៅទី៣. ឈ្មោះ សំ ចិន្តា ភេទប្រុស អាយុ៤៨ឆ្នាំ រស់នៅក្នុងភូមិអូរឈេីក្រំ ឃុំស្ទឹងកាច់ ស្រុកសាលាក្រៅ ត្រូវខ្យល់បក់ប៉ើង ខូចខាតដំបូលប្រក់ស័ង្កសីចំនួន០៨សន្លឹក ដែលផ្ទះមានទំហំ5x12ម៉ែត្រ ។
ប្រភពបញ្ជាក់ថា ក្រោយកើតហេតុ អាជ្ញាធរមូលដ្ឋានបានចុះពិនិត្យមើល ដើម្បីនាំក្រុមការងារចុះជួយនៅពេលក្រោយ ៕
