សត្វចាបព្រៃវែងជាង២០ក្បាល ត្រូវបានប្រទះឃើញឡើងវិញនៅតំបន់ការពារទេសភាពបឹងព្រែកល្ពៅ ដែលជាប្រភេទសត្វស្លាបកម្រ ជិតផុតពូជនិងបាត់ខ្លួនអស់ជាង៣ឆ្នាំមកហើយ ។
លោក ប៊ូ វរសក្ស នាយកកម្មវិធីប្រចាំកម្ពុជានៃអង្គការជីវិតសត្វស្លាបអន្តរជាតិ បានឱ្យដឹងថា បច្ចុប្បន្ននេះ សត្វចាបព្រៃវែង កំពុងរងការគំរាមកំហែងខ្លាំង ដោយសារការដាក់អន្ទាក់ ការបរបាញ់ និងការចាប់យកមកបរិភោគ និងធ្វើអាជីវកម្ម នៅតាមទីផ្សារ ដែលធ្វើឱ្យចំនួនសត្វស្លាបប្រភេទនេះ មានការថយចុះជាង៨០ភាគរយ ក្នុងប៉ុន្មានឆ្នាំចុងក្រោយនេះ។
លោកបន្តថា ថ្មីៗនេះមានវត្តមានចាបព្រៃវែងប្រមាណ២០ក្បាល នៅតំបន់ការពារទេសភាពបឹងព្រែកល្ពៅ ខេត្ដតាកែវ ក្រោយពី បានបាត់បង់អស់រយៈពេលជាងបីឆ្នាំមកហើយ។ លោកបានបញ្ជាក់ថា ចាបព្រៃវែងនេះ បានបង្កកំណើតនៅអឺរ៉ុប និង អាស៊ីខាងជើង ដោយបានផ្លាស់ទីមកកាន់តំបន់អាស៊ីយើងនេះ ហើយដល់រដូវត្រជាក់ សត្វនេះនឹងត្រឡប់ទៅប៉ែកអឺរ៉ុបវិញ។
« អ៊ីចឹង កាលពីមុនគឺជាប្រភេទសម្បូរនៅកម្ពុជាយើង ការឱ្យឈ្មោះថាចាបព្រៃវែងនេះ គឺគេឃើញសម្បូរនៅខេត្ត ព្រៃវែង ដល់ពេលរដូវច្រូតស្រូវហ្នឹងវាមកដល់ហើយ ក៏ប៉ុន្តែដោយសារកត្តាគំរាមកំហែងនិងមានការចាប់ចងនៅកម្ពុជា ទាំងនៅចិន ទាំងនៅប្រទេសមួយចំនួនទៀត ដែលវាបានឆ្លងកាត់ហ្នឹង ត្រូវបានគេបរបាញ់យកមកធ្វើម្ហូប បើនៅចិនផង អ្នកណាដែលបានហូបចាបព្រៃវែងហ្នឹងហាក់ដូចបានហូបបង្កងអ៊ីចឹង ការឱ្យតម្លៃបែបហ្នឹង ធ្វើឱ្យចាបព្រៃវែងមានការធ្លាក់ចុះ យ៉ាងគំហុក ប៉ុន្មានឆ្នាំចុងក្រោយនេះ »
លោកបន្ថែមថា ការបង្ហាញខ្លួននៃសត្វចាបព្រៃវែងនេះ បញ្ជាក់ពីសារសំខាន់របស់តំបន់ដីសើមបឹងព្រែកល្ពៅ ក្នុងការផ្ដល់ ជាជម្រកដល់ការរស់នៅ និងពងកូនរបស់ពពួកសត្វស្លាបទឹកជាច្រើនប្រភេទផ្សេងទៀត។
សូមបញ្ជាក់ថា កាលពីឆ្នាំ ២០០០ នៅប្រទេសកម្ពុជាមានសត្វចាបព្រៃវែងជាហ្វូងធំៗ រហូតដល់រាប់ពាន់ក្បាល តែសព្វថ្ងៃ ឃើញមានវត្តមានជាក្រុមតូចៗ ជូនកាលមានតែ ២ឬ ៣ក្បាលប៉ុណ្ណោះ៕ ក្រសួងព័ត៌មាន