ពលករខ្មែរប្រមាណ ៥ពាន់នាក់ បានសម្រុកចេញពីប្រទេសថៃតាមច្រកនានានៅតាមបណ្ដោយព្រំដែននៃប្រទេសទាំង ២ ក្នុងរយៈពេលប្រមាណជាង ១០ ថ្ងៃ ក្រោយពីផ្ទុះរីករាលដាលនូវវីរុសកូវីដ ១៩ ក្នុងខេត្តសាមុតសាខន ដោយហេតុពួកគេមានក្ដីកង្វល់អំពីការឆ្លងមេរោគនេះ។
អាជ្ញាធរកម្ពុជានៅតាមខេត្តជាប់បណ្តោយព្រំដែននៅតែបន្តចំណាត់ការ និងវិធានការចម្បងៗរបស់ខ្លួនក្នុងការការពារ និងអនុវត្តនូវបទបញ្ជារបស់រាជរដ្ឋាភិបាល និងក្រសួងសុខាភិបាលដោយប្រកាន់ខ្ជាប់នូវការណែនាំ និងដាក់ពលករដែលទើបបានឆ្លងមកពីប្រទេសថៃធ្វើចត្តាឡីស័កយ៉ាងត្រឹមត្រូវចំនួន ១៤ ថ្ងៃ។ គិតចាប់ពីថ្ងៃទី ២០ ខែ ធ្នូ ឆ្នាំ ២០២០ រហូតដល់ពេលនេះពលករខ្លះត្រូវបានអនុញ្ញាតឱ្យចាកចេញពីមណ្ឌលចត្តាឡីស័ក បន្ទាប់ពីការធ្វើចត្តាឡីស័កគ្រប់ ១៤ ថ្ងៃ និងការធ្វើតេស្តសំណាកលើកទី ២ របស់ពួកគេមិនមានវិជ្ជមានកូវីដ ១៩។
លោក ឌី រ៉ាដូ អភិបាលរងខេត្តឧត្តរមានជ័យ កាលពីថ្ងៃទី០៤ ខែមករា ម្សិលមិញ បានថ្លែងថា ពលករខ្មែរប្រមាណជា ១ ៩០០ នាក់ បានវិលត្រឡប់មកពីប្រទេសថៃមកកាន់ខេត្តឧត្តរមានជ័យចាប់ពីថ្ងៃទី ២០ ខែធ្នូ រហូតមកដល់ថ្ងៃទី ៤ ខែ មករា ឆ្នាំ ២០២១ ហើយសំណាករបស់ពួកគាត់ត្រូវបានយកធ្វើតេស្តប៉ុន្តែសម្រាប់ខេត្តឧត្តរមានជ័យគឺមិនទាន់មានពលករណាម្នាក់មានវិជ្ជមានវីរុសកូវីដ ១៩ ទេ មកដល់ពេលនេះ។
ចំណែកលោក លី សារី អភិបាលរងខេត្តបន្ទាយមានជ័យ ក៏បានបញ្ជាក់ដែរថា ជាង ២ សប្តាហ៍កន្លងមកនេះ ពលករខ្មែរជាង ១ ០០០ នាក់ បានវិលត្រឡប់មកពីប្រទេសថៃចូលតាមខេត្តបន្ទាយមានជ័យនេះ ដោយក្នុងនោះពួកគាត់ត្រូវបានធ្វើចត្តាឡីស័កនៅតាមទីតាំងចំនួន ១២ យ៉ាងត្រឹមត្រូវតាមវិធានរបស់រាជរដ្ឋាភិបាល និងក្រសួងសុខាភិបាល។
ដោយឡែក បើតាមអាជ្ញាធរខេត្តបាត់ដំបង ចាប់តាំងពីមានការផ្ទុះវីរុសកូវីដ ១៩ ចូលក្នុងសហគមន៍ក្នុងប្រទេសថៃ មកមានពលករខ្មែរដែលបានវិលត្រឡប់ពីថៃមកវិញឆ្លងតាមខេត្តបាត់ដំបងគិតត្រឹមថ្ងៃម្សិលមិញគឺមានចំនួន ១ ៨១៥ នាក់ ហើយក្នុងចំណោមនោះមានពលករចំនួន ៦ នាក់ ត្រូវបានរកឃើញមានវីរុសកូវីដ ១៩។
រីឯខេត្តព្រះវិហារ វិញ ពលករដែលបានធ្វើចត្តាឡីស័កគ្រប់ចំនួន ១៤ ថ្ងៃ និងធ្វើតេស្តសំណាកលើកទី២ មិនមានវីរុសកូវីដ ១៩ ត្រូវបានអាជ្ញាធរអនុញ្ញាតឱ្យត្រឡប់ទៅកាន់គេហដ្ឋានវិញជាបណ្តើរៗហើយបើតាមលោក គង់ ឡូ ប្រធានមន្ទីរសុខាភិបាលខេត្តបានឱ្យដឹងថា មានពលករប្រមាណ ១០ នាក់ទៀតប៉ុណ្ណោះ ដែលនៅធ្វើចត្តាឡីស័ក៕
