ខេត្តប៉ៃលិន ៖ ប្រជាពលរដ្ឋជាច្រើនគ្រួសារ ដែលប្រកបមុខរបរដាំបន្លែលក់ សម្រាប់ផ្គត់ផ្គង់ជីវភាពប្រចាំថ្ងៃ បាននិយាយរៀបរាប់និងត្អូញត្អែរដូចៗគ្នាថា តម្លៃទីផ្សារបន្លែពេលនេះ មានការធ្លាក់ចុះជាងមុន ខណ:បន្លែ ហូរចូលផ្សារយ៉ាងច្រើនជាងសព្វដង។ តែទោះបីជាយ៉ាងណា ក៏ពួកគាត់នៅតែខិតខំប្រឹងប្រែង ដាំបន្ថែមទៀត សម្រាប់ប្រមូលផលលក់យកថវិកាផ្គត់ផ្គង់ជីវភាពប្រចាំថ្ងៃ ព្រោះមិនដឹងជាទៅរកអីបើពួកគាត់ធ្លាប់តែប្រកបមុខរបរដាំបន្លែទៅហើយ។
ជាក់ស្តែងមានកសិករម្នាក់ ឈ្មោះ មាស ណាត ភេទស្រី អាយុ៥៤ឆ្នាំ ប្តី ឈ្មោះ តេង សុង រស់នៅភូមិភូមិវាល់វង់ សង្កាត់ទួលល្វា ក្រុងប៉ៃលិន ខេត្តប៉លិន បានដាំបន្លែជាច្រើនមុខ ដូចជា ស្ពៃក្រញ៉ាញ់ ខាត់ណា សាឡាត់ ត្រកួន ស្លឹកខ្ទឹមជាដើម សរុបចំនួន១៥រង ។
បើតាមការរៀបរាប់ពីស្ត្រី ឈ្មោះ មាស ណាត បានឱ្យដឹងកាលពី ថ្ងៃទី១៦ ខែធ្នូ ឆ្នាំ២០២០នេះថា ៖ គ្រួសាររបស់គាត់ បានប្រកបរបរដាំបន្លែអស់រយ:ពេលជាច្រើនឆ្នាំមកហើយ សម្រាប់ផ្គង់ផ្គង់ជីវភាពប្រចាំថ្ងៃ និងសល់ថវិកាខ្លះៗ ទុកសងជំពាក់បំណុលគេ ។
គាត់បន្តទៀតថា ប៉ុន្តែ រហូតមកដល់ចុងឆ្នាំ២០២០នេះ បន្លែ មានការធ្លាក់ចុះជាងមុន ដោយស្ពៃក្រញ៉ាញ់ ១គីឡូក្រាម លក់បានត្រឹមតែ១០០០ទៅ១៥០០រៀលប៉ុណ្ណោះ ដែលពីមុនអាចលក់បានថ្លៃ ១គីឡូក្រាម៣៥០០រៀល ទៅ៤០០០រៀល ។ ចំណែកបន្លែសាឡាត់វិញ ១គីឡូក្រាមលក់បានត្រឹមតែ១គីឡូក្រាម តម្លៃ៣០០០រៀលទៅ៤០០០រៀល ដោយកាលពីមុន១គីឡូក្រាមលក់បានថ្លៃចាប់ពី៦០០០រៀលទៅ៧០០០រៀលឯណោះ ។
គាត់បញ្ជាក់ថា បន្លែមានការធ្លាក់ចុះបែបនេះ ដោយសារតែកសិករជាច្រើនរស់នៅតាមភូមិ នានា និងនៅតាមចម្ការ បាននាំគ្នាដាំបន្លែជាច្រើន ហើយក៏មានការហូរចូលមកពីតាមបណ្តាខេត្តផ្សេងៗ មួយចំនួនទៀត ដូចជា ខេត្តបាត់ដំបង បន្ទាយមានជ័យ ជាដើម៕