ខេត្តប៉ៃលិន ៖ គេសង្កេតឃើញប្រជាពលរដ្ឋស្ទើរគ្រប់ទីកន្លែងក្នុងខេត្តប៉ៃលិន បាននាំគ្នាសម្រុកប្រមូលផលដំឡូងមី ដោយជួលកម្មករឱ្យចូលទៅដកដើមដំឡូង នៅក្នុងចម្ការរបស់ខ្លួន រួចដឹកយកមើមទៅលក់នៅតាមស្តង់នានាក្នុងខេត្ត ខណ:ទីផ្សារដំឡូងមីហក់ឡើងខ្ពស់ជាងមុននិងអ្នកខ្លះមើមដំឡូងមីមិនទាន់ដល់ពេលដកក៍ដោយនិងម្យ៉ាង បើទោះបីជាជម្ងឺកូវីដ១៩ កំពុងវាយលុកចូលសហគមន៍ក៍ដោយ ។
ជាក់ស្តែងកាលពីថ្ងៃទី១១ខែធ្នូ ឆ្នាំ២០២០នេះ មានកសិករ ជាច្រើនគ្រួសារ កំពុងមមាញឹកប្រមូលផលដំឡូងមី ក្នុងចម្ការរបស់ខ្លួន ស្ថិតនៅភូមិបរថ្មី សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
បើតាមប្រភពព័ត៌មានពីបុរសម្នាក់ ឈ្មោះ បូ រី អាយុ៤០ឆ្នាំ ប្រពន្ធ ឈ្មោះ សុង ណែម អាយុ៤០ឆ្នាំដូចគ្នា រស់នៅភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន ដោយជួលដីគេដាំដំឡូងមី ចំនួន១.៥ហិកតា តម្លៃ៧០០០បាត(ប្រាក់ថៃ)ស្មើជិត១លានរៀល ស្ថិតនៅភូមិបរថ្មី សង្កាត់បរយ៉ាខា ក្រុងប៉ៃលិន បានរៀបរាប់ឱ្យដឹងថា ៖ ពួកគាត់ពិតជាសប្បាយរីករាយយ៉ាងខ្លាំង ដោយសង្កេតឃើញនៅដើមខែធ្នូ ឆ្នាំ២០២០នេះ តម្លៃទី ផ្សារដំឡូងមី ហក់ឡើងខ្ពស់ជាងឆ្នាំមុនៗ ដោយ១គីឡូក្រាម ឈ្មួញទិញ តម្លៃ២.៧បាត(ប្រាក់ថៃ)ស្មើជាង៣០០រៀល ប៉ុន្តែមួយអាទិត្យក្រោយមក ស្រាប់តែទីផ្សារមានការធ្លាក់ចុះបន្តិចវិញ ដោយឈ្មួញទិញត្រឹមតែ១គីឡូក្រាម ២.៥០បាត ប៉ុណ្ណោះ ដែលធ្វើឱ្យពួកគាត់មានការព្រួយបារម្ភក្រែងតម្លៃទីផ្សារដំឡូងមី បន្តធ្លាក់ចុះថែមទៀត ទើបនាំគ្នាម្នីម្នាក់ជួលកម្មករឱ្យដក ដឹកយកទៅលក់នៅស្តង់ក្បែរចម្ការតែម្តង ។
ប្រភពដដែលបន្តទៀតថា តម្លៃទីផ្សារប៉ុណ្ណឹងអាចទទួលយកបានទោះបីជាធ្លាក់ចុះបន្តិចក៏ដោយ ព្រោះឆ្នាំមុនៗ តម្លៃទីផ្សារដំឡូងមី ត្រឹមតែ១គីឡូក្រាម ១.៥០ ទៅ២.១៥បាត(ប្រាក់ថៃ)ប៉ុណ្ណោះ ហើយពួកគាត់ក៏សំណូមពរឱ្យអាជ្ញាធរខេត្តប៉ៃលិន ជួយសម្របសម្រួល ដើម្បីឱ្យតម្លៃទីផ្សារនៅថេរ ដដែល ឬឡើងខ្ពស់ជាងនេះ ព្រោះពួកគាត់ត្រូវការជួលដីគេដាំដំឡូងមី ជួលកម្មករប្រមូលផល និងជួលរថយន្តគេដឹកយកទៅលក់ផងដែរ បើតម្លៃទីផ្សារនៅខ្ពស់ គាត់អាចនឹងសល់ថវិកាខ្លះៗ សម្រាប់ យកទៅផ្គត់ផ្គង់ជីវភាពគ្រួសារ ។
ចំណែកបុរសម្នាក់ទៀតមាន ឈ្មោះ ហែម ភីន អាយុ៧១ឆ្នាំ បានរៀបរាប់ឱ្យដឹងថា ៖ គាត់បានដាំដំឡូងមី ចំនួន៤ហិកតា នៅលើដីចម្ការរបស់ខ្លួន តាំងពីដើមឆ្នាំ២០២០មកម្លេះ ហើយបន្ទាប់ពីប្រមូលផលនៅក្នុងចម្ការខាងលើរួចរាល់ គាត់នឹងហៅកម្មករទាំងអស់នេះ ទៅប្រមូលផលនៅក្នុងចម្ការរបស់ខ្លួន ដែរ ដើម្បីលក់យកប្រាក់សងបំណុលគេ ។ គាត់បន្ថែមទៀតថា ដោយសង្កេតឃើញតម្លៃទីផ្សារដំឡូ ងមីឡើងខ្ពស់ត្រដែតបែបនេះ គាត់ពិតជាមានការរំភើងយ៉ាងខ្លាំង ហើយក៏មិនបង្អង់យូរដែរ ក្រែង តម្លៃទីផ្សារធ្លាក់ចុះវិញ នាំឱ្យលក់ខាតអស់ច្រើន ។
ពាក់ព័ន្ធនឹងបញ្ហានេះ លោក ឃឹម ប៉េងថុង ប្រធានការិយាល័យច្រកទ្វារអន្តរជាតិព្រំ បានឱ្យដឹងកាលពីរសៀលថ្ងៃទី១០ ខែធ្នូ ឆ្នាំ២០២០នេះថា ៖ តម្លៃទីផ្សារដំឡូងមី បានស្ទុះឡើងជាងឆ្នាំមុនៗ ក្នុង១គីឡូក្រាម ឈ្មួញទិញ រហូតដល់២.៧បាត(ប្រាក់ថៃ) ដែលពុំធ្លាប់មានពីមុនមក ។
បើទោះបីជាបញ្ហាជម្ងឺកូវីដ១៩ កំពុងវាយប្រហារពិភពលោកក៏ដោយ ។ លោកបន្តទៀតថា ប៉ុន្តែក្រោយមកតម្លៃដំឡូងមីស្រស់ មានការធ្លាក់ចុះវិញបន្តិច ដោយ១គីឡូ ក្រាមឈ្មួញទិញត្រឹមតែ ២.៥បាតប៉ុណ្ណោះ ដោយសារតែខាងក្រសួងសាធារណការ និងដឹកជញ្ជូនថៃ និងអាជ្ញាធរថៃ ចុះមកត្រួតពិនិត្យនៅព្រំដែន កម្ពុជាថៃ ដោយមិនអនុញ្ញាតិឱ្យដឹកកសិផលដំឡូងមីលើសទម្ងន់នោះឡើយ ។
លោកបញ្ជាក់ថា ដូច្នេះ សូមឱ្យប្រជាពលរដ្ឋទូទាំងខេត្តប៉ៃលិន ប្រញាប់ប្រមូលផលឱ្យទាន់ពេលវេលា ខណ:ពេលដែលកសិផលដំឡូងមីកំពុងឡើងថ្លៃ បើទុកយូរទៀត អាចនឹងនៅដដែល ឬក៏ធ្លាក់ចុះជាងមុន ។
ចំពោះការបង់ប្រាក់ថ្លៃនាំចេញ ខាងយើងមិនទាមទារឱ្យឈ្មួញបង់ប្រាក់ហួសកំណត់នោះទេ ដើម្បីឱ្យខាងមន្ត្រីប្រចាំការនៅច្រកទ្វារ មានថវិកាសម្រាប់ទិញទឹកផឹក និងទិញនំចំណីខ្លះៗ ដែរ ហើយចំពោះបញ្ហាចោទថា ខាងមន្ត្រីនៅស្ថាប័នទាំងអស់ទារយកថវិកាពីឈ្មួញច្រើន គឺមិនពិត ប្រាកដនោះទេ គឺឈ្មួញមានការរកស៊ីកាច់កុងគ្នា ទើបទម្លាក់កំហុសទៅលើច្រកទ្វារ ហើយខាងលោក ក៏ខិតខំធ្វើការសម្របសម្រួលឱ្យភាគីថៃ មានការបញ្ចុះការបង់ថ្លៃកសិផលដែលនាំចូល ទៅប្រទេសរបស់ខ្លួនផងដែរ ៕