ក្រសួងការពារជាតិតួកគី កាលពីថ្ងៃទី០១ ខែធ្នូ ម្សិលមិញ បាននិយាយថា ប្រទេសតួកគី និងរុស្ស៊ី បានបញ្ចប់កិច្ចព្រមព្រៀងមួយដើម្បីបង្កើតមជ្ឈមណ្ឌលរួមមួយសម្រាប់ឃ្លាំមើលបទឈប់បាញ់នៅតំបន់ណាហ្គោណូ – ការ៉ាបាក់។
សេចក្តីថ្លែងការណ៍បាននិយាយថា «កិច្ចចរចាត្រូវបានបញ្ចប់អំពីព័ត៌មានលម្អិតបច្ចេកទេសទាក់ទងនឹងមូលដ្ឋានគ្រឹះ និងគោលការណ៍នៃប្រតិបត្តិការនៃមជ្ឈមណ្ឌលរួមគ្នារវាងតួកគី – រុស្ស៊ី។ កិច្ចព្រមព្រៀងមួយនេះត្រូវបានចុះហត្ថលេខា។ ការងារចាំបាច់កំពុងដំណើរការសម្រាប់មជ្ឈមណ្ឌលនេះដើម្បីដំណើរការឱ្យបានឆាប់តាមដែលអាចធ្វើទៅបាន»។
ភាគីតួកគីមិនបានបង្ហាញព័ត៌មានលម្អិតណាមួយនៃកិច្ចព្រមព្រៀងដែលបានបញ្ចប់នោះទេ។
កាលពីថ្ងៃទី ៩ ខែវិច្ឆិកា ប្រធានាធិបតីរុស្ស៊ី លោក វ្ល៉ាឌីមៀរ ពូទីន ប្រធានាធិបតីអាស៊ែបៃហ្សង់ លោក Aliyev និងនាយករដ្ឋមន្ត្រីអារមេនី លោក Pashinyan បានចុះហត្ថលេខាលើសេចក្តីថ្លែងការណ៍រួមមួយស្តីពីបទឈប់បាញ់ពេញលេញមួយនៅតំបន់ណាហ្គោណូ – ការ៉ាបាក់។ ដូចដែលមេដឹកនាំរុស្ស៊ីបាននិយាយថា កងកម្លាំងអាស៊ែបៃហ្សង់ និងអារមេនី នឹងនៅតែស្ថិតក្នុងទីតាំងបច្ចុប្បន្នរបស់ពួកគេ ខណៈដែលកងរក្សាសន្តិភាពរុស្ស៊ីនឹងត្រូវបានដាក់ពង្រាយនៅតំបន់នោះ។
កាលពីថ្ងៃទី ១១ ខែវិច្ឆិកា រុស្ស៊ី និងតួកគីបានព្រមព្រៀងគ្នាបង្កើតមជ្ឈមណ្ឌលឃ្លាំមើលបទឈប់បាញ់នៅតំបន់ណាហ្គោណូ – ការ៉ាបាក់។ អនុស្សរណៈនេះត្រូវបានចុះហត្ថលេខាបន្ទាប់ពីកិច្ចពិភាក្សាតាមវីដេអូរវាងរដ្ឋមន្ត្រីការពារជាតិរុស្ស៊ី លោក Sergey Shoigu និងសមភាគីតួកគី គឺលោក Hulusi Akar ៕
