ឯកឧត្ដម នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដាក់បទបញ្ជាដល់ស្នងការនគរបាលខេត្ត ដែលទទួលបានពលករត្រឡប់មកពីប្រទេសថៃ និងប្រទេសវៀតណាម ដែលបានចូលមកដល់ក្នុងប្រទេសហើយ ពុំបានឲ្យធ្វើចត្តាឡីស័កនៅតាមព្រំដែន ត្រូវស្រាវជ្រាវសាកសួរពួកគាត់ភ្លាមៗ ដើម្បីចង់ដឹងថាតើពួកគាត់ចូលតាមច្រកណា និងនរណាជាមេខ្យល់។
ឯកឧត្ដម នាយឧត្តមសេនីយ៍ នេត សាវឿន បានថ្លែងយ៉ាងដូច្នេះថា «បណ្ដាស្នងការខេត្ត នៅក្នុងផ្ទៃក្នុងប្រទេស មានករណីខេត្តណាខ្លះ ដែលទទួលពលករមកពីថៃក្ដី មកពីវៀតណាក្ដី ដែលចូលមកហើយ នៅតាមព្រំដែនអត់បានឃាត់ធ្វើចត្តាឡីស័ក មកដល់ផ្ទៃក្នុងប្រទេស ស្នងការខេត្តគឺថា ឲ្យកម្លាំងស្រាវជ្រាវសួរភ្លាម គាត់មកតាមផ្លូវណា តាមប៉ុស្ដិ៍ណា នរណាជូន អ្នកណាមេខ្យល់ រកឲ្យឃើញ ដើម្បីបើកការស្រាវជ្រាវ តាមគោលការណ៍ប្រមុខរាជរដ្ឋាភិបាល ត្រូវរកអ្នកនាំមកឲ្យបាន ដើម្បីទប់ស្កាត់ការនាំចូលកូវីដ-១៩ ពីខាងក្រៅចូលក្នុង ត្រូវយកចិត្តទុកដាក់អនុវត្តបានម៉ឺងម៉ាត់ភ្លាម គ្រប់ស្នងការខេត្តធ្វើផ្ទាល់»។
ការចេញបទបញ្ជាជាថ្មីនេះ បន្ទាប់ពីសម្ដេចតេជោនាយករដ្ឋមន្ត្រី បានទទួលបានព័ត៌មានថា មានពលករមកពីប្រទេសថៃ ក៏ប៉ុន្តែបែរពួកគាត់ទៅធ្វើចត្តាឡីស័កនៅឯខេត្តតាកែវវិញ៕