សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៣០ ខែវិច្ឆិកា ឆ្នាំ២០២០ នេះ បានអញ្ជើញបើកការដ្ឋានស្ថាបនា និងកែលម្អហេដ្ឋារចនាសម្ព័ន្ធផ្លូវថ្នល់ ៣៨ខ្សែ និងកែលម្អដងស្ទឹងសៀមរាប នៅក្រុងសៀមរាប។
ក្នុងឱកាសនោះ សម្តេចបានហៅថាការឆ្លងជំងឺកូវីដ១៩ ចូលសហគមន៍ជាលើកដំបូងថាជា «ព្រឹត្តិការណ៍សហគមន៍២៨ វិច្ឆិកា»។ សម្តេចបានផ្តាំផ្ញើថា «ដើម្បីយកឈ្នះកូវីដ១៩ គឺត្រូវធ្វើជាអ្នកចាញ់ ជាអ្នកខ្លាច ប៉ុន្តែមិនត្រូវភ័យតក់ស្លុត ស្លន់ស្លោរនោះទេ»។ កម្ពុជាត្រូវយកចិត្តទុកដាក់តាមដានទប់ស្កាត់ការវិវត្តន៍សភាពការណ៍នេះក្នុងរង្វង់ជាង១៤ថ្ងៃ និងមានការចូលរួមគ្រប់មជ្ឈដ្ឋាន ដើម្បីបញ្ចប់ព្រឹត្តិការណ៍សហគមន៍ឲ្យបានលឿន។
សម្តេចក៏បានស្នើទៅក្រសួងសុខាភិបាល ចាត់ចែងបែងថវិកាសប្បុរសជួយដល់ក្រុមគ្រួសារដែលធ្វើចត្តាឡីស័ក។ សម្រាប់អ្នកក្រីក្រក្នុងមួយគ្រួសារទទួលបាន ២ម៉ឺនរៀលក្នុងមួយថ្ងៃ។
សម្តេចតេជោបានថ្លែងថា៖ ថវិកាពីបានពីការបរិច្ចាគពីសប្បុរជនកន្លងមកជាង ៤២ពាន់លាន បានចូលធនាគារបាន ៣៧ពាន់លាន ផ្តល់ថវិកាដល់ខេត្ត ដើម្បីឲ្យខេត្តនោះផ្តល់ទៅមូលដ្ឋានចែកជូនដល់គ្រួសារនៃអ្នកធ្វើចត្តាឡីស័ក បើមិនដូច្នោះទេ ពូកគាត់ធ្វើចត្តាឡីស័កដោយគ្មានអង្ករច្រកឆ្នាំង គឺវាមិនមែនជារឿងសមរម្យទេ។
សម្តេចតេជោ បញ្ជាក់ថា អ្នកធ្វើតេស្តពាក់ព័ន្ធ «ព្រឹត្តិការណ៍សហគមន៍២៨វិច្ឆិកា» នៅទូទាំងប្រទេស មានចំនួន ៣,៣៣២សំណាក មកពី៧ខេត្ត។ មនុស្ស១៤នាក់ហើយ បានរកឃើញវិជ្ជមានកូវីដ១៩ ក្នុងព្រឹត្តិការណ៍ «សហគមន៍២៨វិច្ឆិកា»។ ដូច្នេះ ប្រតិបត្តិការរុករកជំងឺកូវីដ១៩ ត្រូវធ្វើក្នុងល្បឿនលឿន និងទ្រង់ទ្រាយធំ។
សម្តេចរំពឹងថា ពលរដ្ឋខ្មែរទាំងអស់នឹងចូលរួមសហគ្នា ដើម្បីប្រយុទ្ធប្រឆាំងនឹងជំងឺកូវីដ១៩ ហើយអាចយកឈ្នះលើព្រឹត្តិការណ៍នេះ។ សម្តេចក៏បានអំពាវនាវឱ្យចូលរួមអនុវត្តន៍វិធានការការពារជំងឺកូវីដ១៩ កាត់បន្ថយការជួបជុំ ប្រមូលផ្តុំ និងចេញក្រៅផ្ទះ។ បើសង្ស័យកុំប៉ះពាល់គ្រួសារ ហើយប្រញាប់ធ្វើតេស្ត។ ព្រឹត្តិការណ៍ «សហគមន៍២៨វិច្ឆិកា» គឺជាការបាត់ដានជំងឺកូវីដ១៩ ជាករណីបាត់ដាន និងនាំដល់មហន្តរាយបើទើបស្កាត់មិនទាន់ទេ។ ដូចនេះ ដើម្បីឱ្យប្រយុទ្ធបានជោគជ័យក្នុងរយៈពេល ១៥ថ្ងៃនេះ មិនអាចពឹងតែលើរាជរដ្ឋាភិបាល និងអាជ្ញាធរនោះទេ គឺត្រូវតែមានការចូលរួមពីប្រជាពលរដ្ឋ៕
