ខេត្តបាត់ដំបង៖ កម្លាំងផ្នែកប្រឆាំងគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាល តាប៉ុន នៃអធិការដ្ឋាននគរបាលស្រុកសង្កែ បានចុះធ្វើការបង្ក្រាបនិងបំផ្លាញចោលនូវដំណាំកញ្ឆាស្រស់ចំនួន០២ទីតាំងផ្សេងគ្នាក្នុងបទល្មើសជាក់ស្តែង។
លោកវរសេនីយ៍ឯក ស៊ុន សុវណ្ណ អធិការនគរ បាលស្រុកសង្កែ បានអោយដឹងថា កិច្ចប្រតិបត្តិការខាងលើនេះធ្វើឡើងកាលពីថ្ងៃទី១២ ខែសីហា ឆ្នាំ២០២០ម្សិលមិញ នៅចំណុចក្រុមទី១៦ ភូមិសម្តេច ឃុំតាប៉ុន ស្រុកសង្កែ ខេត្តបាត់ដំបង ក្រោយពីទទួលបានសេចក្តីរាយការណ៍ថាមានប្រជាពលរដ្ឋលួចលាក់ដាំកញ្ឆានចំនួន០២កន្លែងនៅក្នុងមូលដ្ឋានខាងលើ។
នៅក្នុងកិច្ចចុះប្រតិបត្តិការនេះដែរជាលទ្ធផលក្នុងបទល្មើសជាក់ស្តែង សមត្ថកិច្ចបានកាប់បំផ្លាញដើមកញ្ឆាស្រស់ចំនួន ៧៨ដើម ដែលមានម្ចាស់ទី១-ឈ្មោះ អឿន រ៉េត ភេទស្រី អាយ៥២ឆ្នាំទី២-ឈ្មោះ ចៅ ផុន ភេទស្រី អាយ ៦០ ឆ្នាំ ទាំងពីរនាក់រស់នៅភូមិសម្តេច ឃុំតាប៉ុន ស្រុកសង្កែ ខេត្តបាត់ដំបង។
នៅចំពោះមុខការសាកសួររបស់សមត្ថកិច្ច អ្នកដាំកញ្ឆាទាំងពីរនាក់បានឆ្លើយថា ការដាំកញ្ឆារបស់ពួកគាត់គឺសម្រាប់ប្រើប្រាស់ធ្វើជាឱសថព្យាបាលជម្ងឺផ្ទាល់ខ្លួនតែប៉ុណ្ណោះ។
ការដាំដុះសម្រាប់ព្យាបាលជម្ងឺផ្ទាល់ខ្លួនរបស់គាត់មានចំនួនច្រើនដើមបែបនេះ ទើបសមត្ថកិច្ចពិ បាកនឹងជឿបានដែរ តែទោះបីជាយ៉ាងនេះក៏ ដោយនៅក្រោយពេលធ្វើការសាកសួរអំពី មូល ហេតុនៃការដាំដើមកញ្ឆាមានចំនួនច្រើនដើម បែបនេះរួចមក ម្ចាស់ជាអ្នកដាំកញ្ឆាទាំងពីរនាក់ខាងលើត្រូវបានសមត្ថកិច្ចនគរបាលនាំខ្លួនយកមកធ្វើកិច្ចសន្យាអប់រំណែនាំដោយមិនអនុញ្ញាតឱ្យគាត់បន្តការដាំដុះបែបនេះជាបន្តទៀតទេ៕