ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការសម្រាប់ដោះស្រាយ បញ្ហាកូដកម្ម បាតុកម្មនៅតាមគ្រប់មុខសញ្ញា បានរំឭកដល់គណៈកម្មការនេះឲ្យបន្តខិតខំទប់ស្កាត់ និងដោះស្រាយរាល់កូដកម្ម បាតុកម្មដាច់ខាតមិនទុកឲ្យរាលដាលពីតូចទៅធំ ក្លាយទៅជាបដិវត្តន៍ពណ៌បំផ្លាញសន្តិសុខសណ្ដាប់ធ្នាប់ សង្គមបំផ្លាញស្ថិរភាពជាតិ។
ឯកឧត្តម បានសរសេរលើទំព័រហ្វេសបុក កាលពីថ្ងៃទី១២ សីហា ម្សិលមិញថា គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា ពិតជាបានរួមចំណែកដ៏សំខាន់ក្នុងការចូលរួមថែរក្សាការពារនូវសុខសន្តិភាព សណ្តាប់ធ្នាប់សង្គម និងការពង្រឹងនីតិរដ្ឋ ដើម្បីជីវភាពសុខសាន្តរបស់ប្រជាពលរដ្ឋ។
តែអ្វីដែលគិតស្មានមិនដល់ និងមិនអាចព្យាករជាមុនបាននោះគឺការផ្ទុះឡើងនូវជំងឺកូវីដ១៩ ដែលបានរាតត្បាតសកល និងបង្កផលប៉ះពាល់យ៉ាងធ្ងន់ធ្ងរសម្រាប់ពិភពលោកទាំងមូល។ កម្ពុជាក៏ទទួលរងឥទ្ធិពលពីការផ្ទុះឡើងនៃជំងឺនេះដែលប៉ះពាល់ខ្លាំងទៅលើវិស័យសេដ្ឋកិច្ចសង្គម និងជីវភាពរស់នៅរបស់ប្រជាជន។
ឯកឧត្តមបន្តថា រដ្ឋាភិបាលបានអនុវត្តដោយពេញលេញនូវសិទ្ធិសេរីភាពរបស់ពលរដ្ឋក្នុងការបញ្ចេញមតិការជួបជុំដើម្បីធ្វើកូដកម្ម បាតុកម្មស្របតាមច្បាប់ជាធរមាន។ កម្ពុជានៅតែបន្តធ្វើដំណើរឆ្ពោះទៅមុខយ៉ាងត្រឹមត្រូវតាមគន្លងនៃលទ្ធិប្រជាធិបតេយ្យ សេរីពហុបក្ស ការប្រព្រឹត្តទៅនៃនីតិរដ្ឋ សិទ្ធិសេរីភាពរបស់បុគ្គល សេរីភាពខាងសារព័ត៌មាន និងការបញ្ចេញមតិសិទ្ធិធ្វើបាតុកម្ម សកម្មភាពនៃបណ្តាគណបក្សនយោបាយអង្គការសង្គមស៊ីវិល និងសហជីព ការចូលរួមរបស់ប្រជាពលរដ្ឋជាដើម ត្រូវបានគោរព និងការពារ៕