ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី២៤ ខែវិច្ឆិកា ឆ្នាំ២០២១នេះ បានដាក់ឱ្យដំណើរការជាផ្លូវការនូវប្រព័ន្ធជាតិអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយ ឬតាមអនឡាញ ដោយមានការអញ្ជើញចូលរួមពី ឯកឧត្តមបណ្ឌិត ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ និងលោកស្រី NADIA OTTIGER នាយិការងនៃទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ(SDC) ព្រមទាំងមានការចូលរួមពីក្រសួងពាក់ព័ន្ធនានា, គណៈកម្មាធិការបណ្តុះបណ្តាលខេត្ត, គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ, វិស័យឯកជន រួមទាំងដៃគូអភិឌ្ឍន៍នានា តាមប្រព័ន្ធបញ្ជូនរូបភាព និងសម្លេង ប្រមាណជាង ៨០០រូប។
ប្រព័ន្ធជាតិអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយ ឬតាមអនឡាញ ដើម្បីផ្តល់នូវឱកាសបណ្តុះបណ្តាលជំនាញបច្ចេកទេស និងវិជ្ជាជីវៈ ជាបន្តបន្ទាប់ និងបត់បែនបានក្នុងអំឡុងពេលនៃការរាតត្បាតនៃជំងឺកូវីដ-១៩ និងក្រោយវិបត្តិនៃជំងឺកូវីដ-១៩ ។
មួយវិញទៀតក៏ដើម្បីបង្កើនការទទួលបាននូវកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ ប្រកបដោយសមធម៌ ក្នុងចំណោមយុវជននៅទូទាំងប្រទេសកម្ពុជា និងធ្វើឱ្យប្រសើរឡើងនូវកម្មវិធីសិក្សាសម្រាប់បណ្តុះបណ្តាលពីចម្ងាយ ឬអនឡាញ ជាពិសេសគឺកែលម្អរគុណភាព TVET ឱ្យមានការឆ្លើយតបទៅនឹងទីផ្សារការងារ និងមានប្រសិទ្ធភាពខ្ពស់។ អ្នកប្រើប្រាស់ចូលតាមគេហទំព័រឈ្មោះ www.tvet-elearning.com និងតាមរយៈកម្មវិធីឈ្មោះ TVET E-Learning អាចទាញយកពី AppStore សម្រាប់ iOS, Play Store សម្រាប់ Android និង AppGallery សម្រាប់ Huawei។
នាឱកាសនោះ ឯកឧត្តមបណ្ឌិត ពេជ សោភ័ន បានមានប្រសាសន៍ថា ប្រព័ន្ធជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈពីចម្ងាយ ឬតាមអនឡាញគឺជាប្រព័ន្ធបច្ចេក វិទ្យាព័ត៌មានមួយដែលផ្ដល់នូវមធ្យោបាយក្នុងការសិក្សាតាមរយៈការមើលវីដេអូ និងឯកសារអេឡិចត្រូនិកផ្សេងៗដោយខ្លួនឯងផ្ទាល់ តាមរយៈកុំព្យូទ័រ ថេប្លេត ឬស្មាតហ្វូនរបស់ពួកគេ នៅគ្រប់ទីកន្លែង និងគ្រប់ពេលវេលា។ ប្រព័ន្ធជាតិនេះ មាន៣តួអង្គសំខាន់ៗដែលរួមមាន៖ ក្រសួងការងារ និងបណ្តុះបណ្តាលវិជ្ជាជីវៈ គ្រឹះស្ថាន អ.ប.វ. និងសិក្ខាកាម សិស្ស និស្សិត ដែលក្នុងនោះក្រសួងការងារ និងបណ្តុះបណ្តាល វិជ្ជាជីវៈ មានភារកិច្ចគ្រប់គ្រង ថែទាំ និងធ្វើបច្ចុប្បន្នភាពប្រព័ន្ធជាតិទាំងមូល, ផលិតរបាយការណ៍រួម ត្រួតពិនិត្យ តាមដាន និងវាយតម្លៃការអនុវត្តការងាររបស់គ្រឹះស្ថាន អ.ប.វ.។ គ្រឹះស្ថាន អ.ប.វ. មានភារកិច្ចបង្កើតមាតិកាមេរៀន, វីដេអូបង្រៀន, ឯកសារមេរៀន, គ្រប់គ្រងការបង្រៀន និងរៀនរបស់ខ្លួន និងផ្សព្វផ្សាយព័ត៌មានផ្សេងៗ រីឯសិក្ខាមកាម សិស្ស និស្សិត មានភារកិច្ចចូលរៀន, ធ្វើកិច្ចការ, ប្រឡង និងស្វ័យវាយតម្លៃការសិក្សារបស់ខ្លួន។
ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រី បញ្ជាក់បន្ថែមថា ក្រសួងការងារ និងបណ្តុះបណ្តាលវិជ្ជាជីវៈមិនទាន់បញ្ចប់មហិច្ឆតារបស់ខ្លួនក្នុងការធ្វើកំណែទម្រង់វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ ត្រឹមនេះទេ គឺក្រសួងមានផែនការអភិវឌ្ឍប្រព័ន្ធជាតិធ្វើតេស្តបញ្ជាក់សមត្ថភាពតាមអនឡាញ ឬពីចម្ងាយ អភិវឌ្ឍប្រព័ន្ធគ្រប់គ្រងគ្រឹះស្ថាន អ.ប.វ. រៀបចំ និងអភិវឌ្ឍមជ្ឈមណ្ឌលទិន្នន័យ ដោយបន្តអភិវឌ្ឍសមត្ថភាពស្ថាប័ន, ថ្នាក់ដឹកនាំ, មន្ត្រីរាជការ និងសាស្ត្រាចារ្យ គ្រូបច្ចេកទេស ក៏ដូចជាបន្តកសាងហេដ្ឋារចនាសម្ព័ន្ធរូបវ័ន្តនៅតាមគ្រឹះស្ថាន អ.ប.វ. ជាដើម។
លោកស្រី NADIA OTTIGER អញអាងថា ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ នឹងបន្តចូលរួមសហការជាមួយក្រសួងការងារ និងបណ្តុះបណ្តាលវិជ្ជាជីវៈក្នុងការអភិវឌ្ឍន៍ជំនាញនៅកម្ពុជា និងបន្តគាំទ្រទាំងផ្នែកបច្ចេកទេស និងហិរញ្ញវត្ថុដល់ប្រព័ន្ធជាតិអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយ ឬតាមអនឡាញ ដើម្បីឱ្យមានលក្ខណៈពេញលេញ និងគ្រប់គ្រាន់ស្របតាមតម្រូវការងាររបស់អ្នកប្រើប្រាស់ និងការរីកចម្រើននៃបច្ចេកវិទ្យា។
សូមបញ្ជាក់ថា គិតត្រឹមថ្ងៃទី២៣ ខែវិច្ឆិកា ឆ្នាំ២០២១ នេះមាន៖
- គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈក្រោមឱវាទក្រសួងចំនួន៥៧ កំពុងប្រើប្រាស់ប្រព័ន្ធជាតិនេះសម្រាប់ការបង្រៀន និងរៀនពីចម្ងាយ ឬតាមអនឡាញ
- សិក្ខាកាម សិស្ស និស្សិតចំនួន ៣១ ៥២៩នាក់បានចូលរៀនក្នុងប្រព័ន្ធជាតិ
- មាតិកាមេរៀន និងវីដេអូមេរៀនចំនួន ៣ ៥២២ ត្រូវបានបញ្ចូលក្នុងប្រព័ន្ធជាតិ
- ចំនួនអ្នកទាញយកកម្មវិធី TVET E-Learning ដាក់ក្នុងថេប្លេត ឬស្មាតហ្វូនពី AppStore (iOS), Play Store (Android) និបងAppGallery (Huawei) សរុបប្រមាណជិត១ម៉ឺននាក់៕