(ភ្នំពេញ)៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបង្ហាញពីជំហរគាំទ្រចំពោះអង្គការ ហេឡែន ខេលល័រ ដែលនឹងត្រូវអនុវត្តសាកល្បងគម្រោងលើកកម្ពស់សុខភាព និង អាហារូបត្ថម្ភ នៅតាមបណ្តារោងចក្រមួយចំនួន តាមរយៈការ ស្នើឲ្យមានការរៀបចំជាកិច្ចព្រមព្រៀងអនុស្សារណៈនៃការយោគយល់គ្នារវាងក្រសួង ជាមួយអង្គការ ដើម្បីធ្វើឲ្យគម្រោងនេះ អនុវត្តទៅទទួលបានប្រសិទ្ធភាព និងជោគជ័យរួម។
ការគាំទ្ររបស់ឯកឧត្តមរដ្ឋមន្ត្រី បានធ្វើឡើងក្នុងឱកាសឯកឧត្តមអនុញ្ញាតឲ្យលោកស្រី Gwyneth Cotes នាយិកាប្រចាំប្រទេស អង្គការ ហេឡែន ខេលល័រ អន្តរជាតិ ចូលជួបសម្តែងការគួរសម នៅទីស្តីការក្រសួងការងារ នាព្រឹកថ្ងៃទី៣០ ខែវិច្ឆិកា ឆ្នាំ២០២១ ដើម្បីស្នើសុំកិច្ចសហការពីក្រសួងការងារ និងបណ្តុះបណ្តាលវិជ្ជាជីវៈ លើការសាកល្បងគម្រោងលើកកម្ពស់សុខភាព និងអាហារូបត្ថម្ភនៅតាមបណ្តារោងចក្រមួយចំនួន។
ឯកឧត្តមរដ្ឋមន្ត្រី បានធ្វើការវាយតម្លៃខ្ពស់ចំពោះ អង្គការហេឡែន ខេលល័រ ដែលបានបានចាប់ផ្តើមធ្វើសកម្មភាពរបស់ខ្លួនតាំងពីឆ្នាំ១៩៩២ ពិតជាបានរួមចំណែកជាច្រើនក្នុងការអភិវឌ្ឍសង្គមសេដ្ឋកិច្ចកម្ពុជា។ កម្ពុជា បានចាត់ទុកអង្គការក្រៅរដ្ឋាភិបាល ជាដៃគូសង្គមមួយ ដែលមិនអាចខ្វះបាន ហើយភាពជាដៃគូ រវាងរដ្ឋាភិបាល និងអង្គការក្រៅរដ្ឋាភិបាលនេះ ពិតជាជួយជំរុញបន្ថែមដល់និរន្តភាពសកម្មភាពរបស់អង្គការតទៅមុខទៀត។
ឯកឧត្តមបណ្ឌិត ក៏បានលើកឡើងពីវិបត្តិកូវីដ-១៩ ដែលធ្វើឲ្យមានការរាំងស្ទះ ដល់គ្រប់វិស័យ ជាពិសេសសម្រាប់វិស័យការងារ ជាវិស័យមួយជួបនូវការលំបាកផងដែរ ធ្វើឲ្យកម្មករនិយោជិតបាត់បង់ការងារ និងប្រាក់ចំណូលសម្រាប់ដោះស្រាយជីវភាព ដែលទាមទារឲ្យរាជរដ្ឋាភិបាលខិតខំដោះស្រាយតាមរយៈវិធានការឧបត្ថម្ភជាកញ្ចប់។ ប៉ុន្តែរាជរដ្ឋាភិបាល បានជ្រើសរើសយុទ្ធសាស្ត្រចាក់វ៉ាក់សាំងជាគន្លឹះ ធ្វើឲ្យប្រជាពលរដ្ឋ មានភាពស៊ាំនៅក្នុងសហគមន៍ ហើយអាចបើកដំណើរការប្រទេសឡើងវិញ។
ជាមួយគ្នានោះ លោកស្រី Gwyneth Cotes បានជម្រាបជូនឯកឧត្តមរដ្ឋមន្ត្រីថា អង្គការ ហេឡែន ខេលល័រ ជាអង្គការមនុស្សធ៌មមិនមែនរដ្ឋាភិបាល ដែលបានកំពុងអនុវត្តកម្មវិធីលើកកម្ពស់សុខភាពសន្តិសុខស្បៀង និងអាហារូបត្ថម្ភនៅកម្ពុជា ដោយមានកិច្ចសហការយ៉ាងជិតស្និត ជាមួយក្រុមប្រឹក្សាស្តារអភិវឌ្ឍន៍ វិស័យកសិកម្ម និងជនបទ នៃទីស្តីការគណៈរដ្ឋមន្ត្រី ក្រសួងសុខាភិបាល ក្រសួងពាណិជ្ជកម្ម ក្រសួងផែនការ ក្រសួងអប់រំយុវជន និងកីឡា និងបណ្តាក្រសួងស្ថាប័នពាក់ព័ន្ធមួយចំនួនទៀត។
បច្ចុប្បន្ននេះ អង្គការ ហេឡែន ខេលល័រ កំពុងរៀបចំដំណើរការសាកល្បងគម្រោងលើកកម្ពស់ សុខភាពនិងអាហារូបត្ថម្ភ ស្ត្រី និងកុមារនៅតាមបណ្តារោងចក្រមួយចំនួន តាមរយៈការគាំទ្រថវិការបស់គម្រោង GIZ-MUSEFO ដើម្បីរួមចំណែកលើកកម្ពស់ សុខភាព ផលិតភាព និងសេដ្ឋកិច្ចកម្ពុជា។
ឯកឧត្តមរដ្ឋមន្ត្រី ក៏បានបញ្ជាក់ជូនផងដែរថា គម្រោងនេះ គឺយើងធ្វើនៅតាមរោងចក្រ មិនមែនអនុវត្តនៅតាមសហគមន៍ទេ ដូច្នេះនៅទីតាំងរោងចក្រ គឺជាទីកន្លែងអាជីវកម្មមួយ ដែលមានការគ្រប់គ្រងពីនិយោជក មានម៉ោងធ្វើការច្បាស់លាស់ យើងត្រូវប្រាកដថា មានទំនាក់ទំនងវិជ្ជាជីវៈល្អជាមួយអ្នកពាក់ព័ន្ធ ដូច្នេះ ឯកឧត្តមបណ្ឌិត ស្នើឲ្យមានកិច្ចសហការផ្លូវការ ដោយមានអនុស្សារណៈរវាងអង្គការជាមួយក្រសួង ដើម្បីមានសកម្មភាពសម្រាប់យកទៅអនុវត្ត និងមានគោលដៅច្បាស់លាស់ ទទួលបាននូវលទ្ធផលគាប់ប្រសើរ៕